Sýretterdi túsirgen – Iýrıı BEKKER Sýretterde: fotograftar Vladıslav Iаkýshkın men Erbolat Shadrahov
Sonymen Almatyda «Qazaqstannyń tumsa tabıǵaty» veb-saıtynyń tusaýkeser rásimi ótip, saıt tanystyrylymy aıasynda attas fotokórme qatar ashylyp, jurtshylyq nazaryna joba derekqoryna kirgen jan-janýarlardyń tamasha sýretteri usynyldy. Osy arada jańa jobanyń birneshe jaqsy qyry bar ekenine toqtala ketý kerek, eger tek fotoónerdiń otyzǵa jýyq janry bolsa, bul osy baǵyttyń damýyna serpin bereri sózsiz. Bir jaǵynan jańa saıt ǵylymǵa degen qyzyǵýshylyqty arttyrýǵa septesip, bıoalýandyqty saqtaýdyń mańyzdylyǵyna qoǵam nazaryn aýdaratyny daýsyz.
Bir emes, úsh birdeı joǵary oqý ornynyń fotoónerdi meńgerip júrgen stýdentteriniń qyzyǵýshylyǵyn oıatqan ilkimdi jobany «Shevron» kompanııasynyń demeýshiligimen «EcoForming» ekologııa jáne bilim berý qorymen birge Qazaqstan Zoologııa ınstıtýty men «National Geographic Qazaqstan» jýrnalynyń qoldaýymen júzege asyrylyp jatyr.
Joba avtorlarynyń aıtýynsha, jańa saıt ınternet-paıdalanýshylarǵa elimizdiń jan-janýarlar álemin keńinen nasıhattaýdy, ań men qustardyń biregeıligin kórsetýdi maqsat etken. Soǵan oraı, árbir tirshilik ıesiniń túr-sıpaty men erekshelikterin tanytatyn joǵary sapaly portrettik fototúsirilimder jasalǵan. Fotogalereıa jobany damytý barysynda tyń derektermen, jańa fotosýrettermen tolyǵa bermek.
Bir jaǵynan «Qazaqstannyń tumsa tabıǵaty» veb-saıty stýdentter men oqýshylar úshin ǵana emes, baıtaq elimizdiń faýnasyn zertteýshilerge de kórnekti ári baǵaly derekqor retinde qyzmet atqarady. Boıaýy qanyq platformanyń biregeıligi sonda – munda tumsa tabıǵattaǵy jan-janýarlar dúnıesin tanyp-bilgisi keletin zertteýshiler men áýesqoılarǵa ańdar men qustardyń portrettik hám tabıǵı ortadaǵy joǵary sapaly fotosýretteri usynylmaq.
Tamasha jobanyń tusaýkeser rásiminde «Shevron» kompanııasynyń áleýmettik ınvestısııalar boıynsha keńesshisi Leıla Aıtmuhanova men jobalyq komanda ókili Qanat Abashov jumystardyń qalaı júrip jatqany týraly qyzyqty baıandady.
Osy jobadaǵy eń qıyn da qyzyqty jumysty atqarǵan fotograftar – «National Geographic Qazaqstan» jýrnalynyń shef-fotografy Erbolat Shadrahov pen tumsa tabıǵat fotografy Vladıslav Iаkýshkınge sóz berilgende, kózmergender elimizdiń zoobaqtary men ulttyq qoryqtardaǵy qyzyqty sátterdi erekshe ásermen áńgimeledi.
ALMATY
