Alash baıtaǵynyń aq marjany – Aqtaý qalasy 2025 jyly Túrki áleminiń mádenı astanasy retinde iske kirisedi. Túrikmenstandaǵy tarıhı qala Anaý bıyl túrki mádenıetiniń astanasy retinde jyl boıy túrkitildes baýyrlardy ózderinde qabyldap, túrli mádenı is-sharalar uıymdastyrǵan bolatyn. Mádenı astana bolǵandaǵy negizgi maqsat-mindet te sol – baýyr elderdi rýhanı-mádenı turǵyda biriktirip, mádenı-tarıhı qundylyqtardy nasıhattaý.
«Aqtaý – Túrki áleminiń mádenı astanasy» mereıli jyly aıasynda 2025 jyldyń naýryz aıynan bastap Aqtaý qalasynda atalǵan is-sharanyń saltanatty ashylýy bolady. Sonymen qatar túrkitildes ulttar arasyndaǵy baýyrlastyq qarym-qatynas pen dostyqty, ortaq mádenıet pen ónerdi urpaqtan-urpaqqa jetkizip, ony álemge tanytý maqsatynda túrkitildes memleketter ónerpazdarynyń qatysýymen teatr opera, bı, dástúrli óner jáne basqa da kóptegen baıqaý men festıval uıymdastyrylady. Aqyndar aıtysy, túrki álemi sýretshileriniń sımpozıýmy, qolóner sheberleriniń festıvali, tarıhı-ǵylymı konferensııalar, aqyn-jazýshylarmen kezdesýler, túrki áleminiń uly ǵulamalarynyń ómiri men eńbekterine arnalǵan jıyndar ótkizilip, ózge de maǵynaly, taǵylymdy is-sharalar da nazardan tys qalmaıdy.
Mańǵystaýlyq ónerpazdar Anaý qalasyndaǵy jabylý saltanatyna baryp, estafetany Aqtaýǵa jetkizdi. Mańǵystaýlyq ónerpazdardy áriptesteri áýezdi ánmen qýana qarsy aldy. «Jorǵa» bı ansambliniń kórkemdik jetekshisi Serik Sarıevtiń aıtýynsha, halyqaralyq deńgeıdegi sharada dostyq jáne yntymaqtastyq atmosferasy qatty sezilgen.
«О́nerpazdarmen birge tarıhı sáttiń kýási boldyq. Jalpy, is-shara aıasynda Qazaqstan, О́zbekstan, Qyrǵyzstan, Túrkııa jáne Túrikmenstannyń túkpir-túkpirinen kelgen aspapshylar men ánshilerdiń sherýi uıymdastyryldy. Halyqaralyq deńgeıdegi sharada dostyq jáne yntymaqtastyq atmosferasynyń jyly lebi esip turdy. Biz bul sharaǵa úlken daıyndyqpen 20 ónerpaz bolyp bardyq. Onyń ishinde «Aqshaǵyl» etnofolklorlyq ansambldiń 2 ónerpazy birneshe aspapta oınaý arqyly qoıylymdy erekshelendirdi. Maqtanyshymyz Aıgúl Qosanova men «Jorǵa» bı ansambliniń kórermenderge birikken qoıylymdy pash etti. Sondaı-aq sharada Mańǵystaý óńiri týraly bes mınýttyq fılm kórsetildi», dedi «Jorǵa» bı ansambliniń kórkemdik jetekshisi Serik Sarıev.
Mańǵystaý oblysy
