Saltanatty rásimdi ashqan departament bastyǵy polkovnık Álibek Kaıýpovtyń buıryǵymen alańǵa Jaýyngerlik Tý keltirilgen soń «Kúz-2024» shaqyrylymynyń sarbazdary ant qabyldaýǵa kirisken. Osylaısha, sarbazdardyń «Men, qatardaǵy jaýynger ....» dep sańqyldap shyǵyp jatqan daýystarynan shekarany qorǵaýdyń barlyq aýyrtpalyǵyn, týǵan eliniń tynyshtyǵy úshin jeldiń ótinde júrýge tas-túıin daıyn ekenin anyq baıqaýǵa bolatyn.
Budan ári rásimniń negizgi bólimi bastalyp, departament bastyǵy polkovnık Á.Kaıýpov, Uıǵyr aýdanynyń ákimi B.Eleýsizova sóz sóılep, sarbazdardy ant qabyldaýlarymen quttyqtady. Sondaı-aq sarbazdar atynan sóılegen qatardaǵy jaýynger Dııas Tilektes ózderine kórsetilgen senimdi aqtap, el shebin kózdiń qarashyǵyndaı kúzetýge ýáde berdi.
Taǵy bir aıshyqty oqıǵa, departament bastyǵy polkovnık Á.Kaıýpov kópshiliktiń aldynda «Srochnık 2.0» baǵdarlamasynyń grantyn jeńip alǵan «Kúz-2023» shaqyrylymynyń qos sarbazy, qatardaǵy jaýyngerler Rasýl Artyqjanov pen Edil Tileýbekke sertıfıkat tapsyryp, Otan aldyndaǵy qyzmetterine alǵys bildirdi.
Qatardaǵy jaýynger Nurjan Sýrovtyń ata-anasy Isqar aǵamyz ben Elmıra apaı búgingi is-sharaǵa qatysý úshin Jambyl oblysynyń Qordaı aýdanyna qaraıtyn Qyzylsaı aýylynan arnaıy at terletip jetipti.
«Ata-ananyń kóńili balada ǵoı. Ulymyzdy kórip, maýqymyzdy basý úshin saǵynyp jetken jaıymyz bar. Kózimizdiń qarashyǵy búgin ant qabyldaıyn dep jatyr. Bul da – ulymyzdyń er-azamat atanǵany. Biz úshin osy qýanyshyn kórýden asqan baqyt bar ma?», deıdi qatty tolqyǵan I.Sýrov.
Is-shara sońy shekara basqarmasynyń arnaýly maqsattaǵy utqyr is-qımyldar tobynyń sahnalyq kórinisine ulasty. Jeldiń ótinde júrýge jaralǵan saıypqyrandar shekara buzýshylardy ustaýdyń ádis-tásilderin sheber kórsete bilgen. Bul úshin alańdy naǵyz shaıqas dalasyna aınaldyrǵan shekarashylardyń ábjil qımyldary olardyń jaýyngerlik daıarlyǵy joǵary deńgeıde ekenin aıǵaqtaı tústi.
«Men qazaqpyn» áni shyrqaldy. Patrıottyq rýhtaǵy tamasha ánge 500 sarbazben birge alań shetine jınalǵan halyq ta qosylǵan. Osylaısha, qasqaǵym sátte óte shyqqan rásimnen keıin ata-analar uldarymen qaýyshyp, máre-sáre boldy.
Almaty oblysy
