Astyq jıǵan áýlet

J.Ahmetov burynǵy «Meń­geser» keńsharynyń ornyna qurylǵan «Mambetov ı K» JShS-da birneshe jyldan beri ozat kombaınshy ataǵyn bermeı kele jatqan jigit.

– Ákem kombaınshy boldy. Jańbyr jaýyp, jer saz bolyp, kombaın júre almaı qalǵanda egistik aýyl mańynda bolsa «Nıvasyn» úı­diń aldyna ákelip qoıatyn. Son­daıda balalardyń ermegi kom­baınnyń kabınasyna ki­rý bolatyn. Ákemniń «qulap qalasańdar, mertigesińder» dep urysqanyna qaramaı «Nı­vadan» túspeıtinbiz. Ásirese men onyń rýlin aınaldyrǵandy jaqsy kórýshi edim. Basqa balalardy oǵan jolatpaýǵa tyrysatynmyn. Túsime de kombaın kiretin. Aqyry sol, ákem­niń kombaınyna mingenniń áserimen men de kombaınshy boldym», deıdi eńbek maıtalmany. – Qazirgi kombaındar tamasha, ishi ystyq emes, kondısıonerleri bar, shań da kirmeıdi, aq kóılekpen otyryp, appaq jaǵańa kir shaldyrmaı shyǵýǵa bolady. Tek onyń jaǵdaıyn qatań baqylap, túrli kórsetkishterdiń talabyn úzbeı oryndaýyń kerek. Mysaly, maı azaıyp qaldy degen belgimen túımesheniń sary jaryǵy jansa, birden toqtap, maı quıýyń kerek. Bizde keıbireýler ondaıdy elemeı qyzyl jaryq janǵansha júre beredi. Sóıtip, tamasha kombaınnyń isten shyǵýyna ákep soqtyrady. Al men óz kombaınymdy qyzymdaı má­peleımin, sonyń arqasynda ol oraq boıy toqtamaı, mine bıyl úlken jetistikke jetip otyrmyz.

Shynynda, Jambyl Baıqýa­nyshulynyń bıylǵy jetistigi orasan. Ol 29 500 sentner as­tyq jınap, ózi úshin de, sharýa­shylyq úshin de rekord jasap otyr. Baıaǵyda «Nıvamen» eń kóp degender 10 myń sentnerden astyq jınaǵanǵa máz bolsa, qazirgiler odan úsh ese artyq astyq jınaýǵa qol jetkizýde eken. Ozyq tehnologııa degenniń artyqshylyǵy osy. «Mambe­tov ı K» seriktestigi oblystaǵy ozyq sharýashylyqtardyń biri. Kásiporyn úkimettiń kóme­gi­niń arqasynda nemistiń, amerı­kanyń joǵary sapaly kombaındaryn satyp alyp, tek solarmen ǵana jumys isteıdi. Sharýashylyqtyń bas dırektory Erkebulan Mámbetov – Májilis depýtaty.

Jambyl Ahmetov –  kópbala­ly otbasynyń túlegi. Olardyń otbasynda 12 bala ósip-óngen. Jambyl men Zýrashtyń shańy­raǵynda da úsh bala týyp-ós­ken. Úlken uly Astanada, bir qurylys kompanııasynda prorab bolyp isteıdi. Qyzy – bala­baqshanyń tárbıeshisi. Al kishi uly mektep jasynda.

Sharýashylyq J.Ahmetov­tiń eńbegin joǵary baǵalap, oǵan Býrabaıdaǵy sanatorıı-kýrort­tardyń birine tegin jol­dama syılady. Ol jıyrma jyldyq eńbek jolynda kóp­tegen qurmet gramotasy, Alǵyshattar, aqshalaı-zattaı syılyqtarǵa ıe bolǵan. Bıylǵy oraqta tapqan eńbekaqysy da joǵary bilikti kombaınshyǵa laıyq, asa qomaqty eken. Biraq kompanııanyń qol qoıǵyzǵan talaby boıynsha jalaqy kó­lemin kóldeneń jurtqa jarııa etpeıdi. «О́zim rıza bolsam boldy emes pe» dep kúledi.

Soltústik Qazaqstan oblysy