Qazaq-Majar strategııalyq seriktestiginiń jańa belesin aıqyndaǵan sapar

Mádenı-gýmanıtarlyq baılanys nyǵaıa túsedi

Sodan soń Shandor saraıynda Qasym-Jomart Toqaevty Majarstan Prezıdenti Tamash Shýıok qarsy aldy. Birge sýretke túsý rásiminen keıin Qazaqstan Prezıdenti Qurmetti qonaqtar kitabyna estelik jazba qaldyrdy.

Túski as formatynda ótken kezdesý barysynda prezıdentter ekijaqty yntymaqtastyqtyń keń aýqymdy baǵyttaryn talqylady. Memleket basshysy dıplomatııalyq qarym-qatynas ornaǵan otyz jyldan asa ýaqytta baýyrlas qos halyq arasynda tyǵyz saıası dıalog, nátıjeli ekonomıkalyq seriktestik jáne berik mádenı-gýmanıtarlyq baılanystar jolǵa qoıylǵanyn atap ótti.

– Qazaqstan men Majarstan ortaq tarıh pen mádenıetke arqa súıeı otyryp, ekijaqty berik baılanys ornatty. Eýropadaǵy alǵashqy elshiligimiz osydan 30 jyl buryn Býdapesht qalasynda ashylǵan edi. Eki eldiń nátıjeli yntymaq­tastyqty damytýda zor áleýeti bar. Majarstan Qazaqstannyń táýelsizdigin alǵashqylardyń biri bolyp moıyndady. Muny erekshe atap ótý kerek. Meniń osy saparym kópqyrly yqpaldastyqty odan ári tereńdetýge Qazaqstan men Majarstannyń nıetti ekenin kórsetedi, – dedi Qasym-Jomart Toqaev.

Prezıdent saýda-ekonomıkalyq jáne ınvestısııalyq yntymaqtastyq aıa­syn keńeıtýdiń mańyzyna aıryqsha toq­taldy. Onyń aıtýynsha, energetıka, kólik-logıstıka, metallýrgııa, jańar­tylatyn energııa kózderi, aýyl sharýa­shylyǵy, farmasevtıka, tamaq ónerká­sibi jáne basqa da salalardy damytý máse­le­sinde eki eldiń múddeleri saı keledi.

О́z kezeginde Tamash Shýıok Qazaqstan men Majarstan geografııalyq turǵydan alshaq jatqanymen, qos halyqtyń tarıhy men múddesi ortaq ekenin aıtty.

– Uly Jibek jolynyń boıynda ornalasqan Qazaqstan – búginde Ortalyq Azııada ekonomıkalyq damý turǵysynan jetekshi el. Sizdiń elińiz úshin halyqtar arasyndaǵy dostyq pen yntymaqtastyqty saqtaý – mańyzdy basymdyq. Qazaqstan beıbitshilik pen turaqtylyqqa zor úles qosyp keledi. Búginde elderimiz kópqyrly yntymaqtastyqty nyǵaıtýǵa jáne turaqty baılanystardy ilgeriletýge kúsh salyp otyr. Bizdiń mádenı qarym-qatynasymyz ǵasyrlardan tamyr tartady. Majarlar qazaqtardyń turmys-saltymen jaqsy tanys. Almaty qalasynyń ataýy bizdiń ana tilimizde áýezdi estiledi. О́ıtkeni halqymyz almany «alma» dep aıtady, – dedi Majarstan Prezıdenti.

Áńgimelesý barysynda taraptar eki eldiń mádenı-gýmanıtarlyq baılanys­taryn kúsheıtýge aıryqsha mán berdi. Ásirese Qazaqstan men Majarstannyń jetek­shi joǵary oqý oryndary arasyn­daǵy akademııalyq jáne ǵylymı baılanysty jandandyrý qajet ekenine nazar aýdardy.

Sonymen qatar prezıdentter óńirlik jáne halyqaralyq kún tártibi, sonyń ishinde kópjaqty qurylymdar aıasyndaǵy yqpaldastyq jóninde pikir almasty.

Majarstan ınvestısııasy 370 mln dollarǵa jetti

Prezıdent Qasym-Jomart Toqaev Qazaq-majar ınvestısııalyq dóńgelek ústeline qatysty. Memleket basshysy, eń aldymen, eki el arasyndaǵy eko­nomıkalyq qarym-qatynas qar­qyn­dy damyp kele jatqanyn atap ótip, Býdapeshtke alǵashqy memlekettik sapary qazaq-majar strategııalyq seriktestiginiń jańa kezeńine jol ashatynyn jetkizdi.

– Bıyl Qazaqstan men Majarstan­nyń Strategııalyq seriktestik týraly deklarasııaǵa qol qoıǵanyna 10 jyl toldy. Osy ýaqyt aralyǵynda biz ózara senim men ortaq maqsattarǵa negizdelgen tyǵyz yntymaqtastyqtyń irgesin qaladyq. Majarstannyń Qazaqstanǵa quıǵan ınvestısııasy 370 mln dollarǵa jetti. Elimizde majarlardyń 70-ten asa kompanııasy tabysty jumys istep jatyr. Olardyń qatarynda «MOL Group» jáne «Gedeon Richter» sekildi kompanııalar bar. Qazirgi tańda mashına jasaý, aýyl sharýashylyǵy jáne logıstıka salalarynda jalpy ınvestısııa kólemi 540 mln dollardan asatyn birlesken jobalardy júzege asyrý máselesi pysyqtalyp jatyr, – dedi Prezıdent.

Memleket basshysy Qazaqstan jańa saıası jáne ekonomıkalyq paradıgmaǵa bet burǵanyn aıtty. Bilim men ınnovasııany tý etken ózgerister bul úderistiń basty qaǵıdatyna aınalady.

Prezıdent Majarstan bıznes­menderine energetıka, sırek kezdesetin materıaldardy óndirý, kólik jáne logıs­tıka, aýyl sharýashylyǵy, farmasevtıka, sıfrlandyrý, qarjy naryǵy sekildi mańyzdy salalarda ınvestısııalyq yntymaqtastyqty nyǵaıtýdyń keleshegi zor ekenin málimdedi.

Qasym-Jomart Toqaev sózin qory­tyndylaı kele, majar kompa­nııa­larynyń basshylaryn kelesi jyly mamyr aıynda ótetin Astana halyqaralyq forýmyna qatysýǵa shaqyrdy.

Investısııalyq dóńgelek ústel bary­synda Majarstannyń Qarjy mınıstri, Qazaq-majar ekonomıkalyq yntymaq­tasty­ǵy jónindegi úkimetaralyq komıssııa­nyń teń tóraǵasy Mıhaı Varga men iri kom­panııalardyń jetekshileri sóz sóıledi.

Jıyn qorytyndysynda aýyl sharýashylyǵy, kólik ınfraqurylymyn sıfrlandyrý, bilim salalaryna jáne birlesken ınvestısııalyq jobalardy qoldaýǵa qatysty 7 kommersııalyq qujatqa qol qoıyldy.

Parlamentaralyq yqpaldastyqtyń mańyzy

Prezıdent Majarstannyń Mem­lekettik jınalys Tóraǵasy Laslo Kıovermen kezdesti. Qasym-Jomart Toqaev Laslo Kıovermen áńgimelesý barysynda óziniń Majarstanǵa sapary eki eldiń san qyrly yntymaqtastyǵyn jańa beleske kóteretinin aıtty.

Bul oraıda Prezıdent eki eldiń par­lamentaralyq yqpaldastyǵy mańyzdy ról atqaratynyn erekshe atap ótti.

– Qazaqstan men Majarstannyń zań shyǵarýshy organdary arasyndaǵy qarym-qatynasty jandandyrýdy quptaımyn. Bul qos halyqtyń ózara túsinistigin nyǵaıtýǵa yqpal etedi dep sanaımyn. Oraıly sátti paıdalana otyryp, Sizdi Qazaqstanǵa saparmen kelýge shaqyramyn, – dedi Prezıdent.

Qasym-Jomart Toqaev bul baǵyttaǵy birlesken is-qımyl saýda-ekonomıkalyq árip­testikti keńeıtip, mádenı-gýmanı­tarlyq baılanysty tereńdetýge tyń serpin beretinine senim bildirdi.

Memleket basshysy joǵary bilim sala­syndaǵy qatynastardy arttyrýǵa basa mán berdi.

– Jańa ǵana Majarstannyń jetekshi jo­ǵary oqý oryndarynda bilim alyp jat­qan qazaqstandyq stýdenttermen kezdes­tim. Siz­diń elińizde oqıtyn jáne bilim alýǵa nıet­ti jastardy árdaıym qoldaımyz. Bul baı­­lanystar elderimiz arasyndaǵy «altyn kópirge» aınalady, – dedi Qasym-Jomart Toqaev.

О́z kezeginde Majarstannyń Memleket­tik jınalysynyń Tóraǵasy parlament­aralyq yqpaldastyqty damytýǵa jan-jaqty qoldaý kórsetkeni úshin Qazaqstan Prezıdentine alǵys aıtyp, zań shyǵarý­shy organdardyń yntymaqtastyǵyn odan ári nyǵaıtýǵa bar kúsh-jigerin jumsaıty­nyn jetkizdi. Sonymen qatar ekijaqty kún tártibiniń barlyq baǵyty boıynsha strategııalyq seriktestikti tereńdetý qajet ekenine nazar aýdardy.

Kezdesýde halyqaralyq arenadaǵy jaǵ­daı da talqylandy. Budan keıin Qasym-Jomart Toqaev pen Laslo Kıover Majarstan Parlamentiniń ǵımaratyn aralap kórdi.

Serpindi Býdapesht kelisimi

Qazaqstan Prezıdenti Qasym-Jomart Toqaev Majarstanǵa memlekettik sapary aıasynda Premer-mınıstr Vıktor Orbanmen kelissóz júrgizdi. Kezdesý dostyq ráýishte ótti. Bul eki el arasyndaǵy ózara senimniń joǵary ekenin kórsetedi.

Kelissózder barysynda ynty­maq­­tastyqtyń basym baǵyttary men ekijaqty qarym-qatynasty odan ári tereń­detý keleshegi talqylandy. Qazaqstan Prezıdenti Majarstandy elimizdiń Eýropa Odaǵyndaǵy senimdi strategııalyq seriktesi, sondaı-aq dostas ári baýyrlas memleket retinde atap ótti.

Prezıdenttiń aıtýynsha, Majarstanǵa memlekettik sapary ekijaqty yntymaqtas­tyqty damytý, sonyń ishinde energetıka, kólik-logıstıka sııaqty baǵyttarǵa tyń serpin berýdi kózdeıdi. Bul rette munaı-gaz sektory men aýyl sharýashylyǵy, lo­gıs­­tıka, atom ónerkásibi jáne qarjy sala­laryn­daǵy birlesken jobalardy júzege asyrý máselelerine basa mán berildi.

Qasym-Jomart Toqaev pen Vıktor Or­ban josparlanǵan bastamalardy tabysty oryndaý úshin eki el úkimetteri qolaıly jaǵdaı jasaýǵa daıyn ekenin rastady.

Majarstan Premer-mınıstri sapar barysynda qol jetkizilgen ýaǵdalastyqtar ózara yqpaldastyqty odan ári keńeıte túsetinine senim bildirdi.

Buǵan qosa taraptar aımaqtyq jáne halyqaralyq kún tártibindegi máseleler, sonyń ishinde kópjaqty qurylymdar aıasyndaǵy baılanystar jóninde pikir almasty. Qasym-Jomart Toqaev Vıktor Orbannyń Túrki memleketteri uıymynyń halyqaralyq arenadaǵy rólin arttyrýǵa qosqan úlesin joǵary baǵalady.

Býdapeshttegi kelissózder qos taraptyń strategııalyq seriktestikti damytýǵa beıil ekenin kórsetip, eki el arasyndaǵy yntymaqtastyqty nyǵaıtýǵa jol ashty.

Qazaqstan – Majarstan ınvestısııalyq qory qurylady

Qazaqstan Prezıdenti Qasym-Jomart Toqaev pen Majarstan Premer-mınıstri Vıktor Orban eki eldiń resmı delegasııa músheleriniń qatysýymen keńeıtilgen quramda kelissóz júrgizdi.

Qasym-Jomart Toqaev majar tarapyna arnaıy shaqyrýy jáne kórsetken syı-qurmeti úshin rızashylyǵyn bildirip, qos halyqtyń tarıhı jáne mádenı jaqyn­dyǵyn atap ótti.

– Dostas ári baýyrlas Majarstannyń astanasyna kelgenime qýanyshtymyn. Búgingi saparymnyń basty maqsaty – eki el arasyndaǵy kópjosparly yntymaq­tastyqqa tyń serpin berý, – dedi Memleket basshysy.

Taraptar ekijaqty yqpaldastyqtyń ózekti máselelerin talqylap, birqatar m­ańyz­dy ýaǵdalastyqqa qol jetkizdi. Atap aıt­­qanda, Qazaqstan – Majarstan ınves­­tı­­­sııa­l­yq qoryn qurýǵa kelisti. Kelis­sóz ba­­r­y­synda saýda-ekonomıka, ener­­getıka, mu­naı-gaz, kólik, bilim sala­laryn­daǵy baı­lanystardyń negizgi baǵyttary talqylandy.

О́z kezeginde Vıktor Orban ekijaqty qa­rym-qatynasty jandandyrýdyń mańyz­dy eke­nin atap ótip, qol jetkizilgen kelisim­­der­diń tabysty júzege asatynyna senim bildirdi.

– Eki eldiń tarıhy ortaq jáne yntymaq­tastyqty nyǵaıtýǵa múmkindigi mol. Búgingi kelissózder halyqtarymyzdyń múddeleri úshin ózara yqpaldastyqty odan ári damytýǵa negiz bolady, – dedi Majarstan Premer-mınıstri.

Kezdesý sońynda Qasym-Jomart Toqaev Vıktor Orbandy Astanaǵa saparmen kelýge shaqyrdy.

Kelissóz qorytyndysynda eki eldiń strategııalyq seriktestigin odan ári nyǵaıtýdy jáne ortaq bastamalardy júzege asyrýdy kózdeıtin Birlesken málimdeme qabyldandy.

Sonymen qatar Qazaqstan men Majar­stannyń resmı delegasııa músheleri mynadaı qujattarǵa qol qoıdy:

1. Qazaqstan Respýblıkasynyń Syrtqy ister mınıstrligi men Majarstannyń Syrtqy ekonomıkalyq baılanystar jáne syrtqy ister mınıstrligi arasyn­daǵy konsýldyq máseleleri boıynsha yntymaqtastyq jónindegi ózara túsinistik týraly memorandým;
2. «Samuryq-Qazyna» ulttyq ál-aýqat qory» aksıonerlik qoǵamy men Majarstannyń «National Capital Holding» ulttyq kompanııasy arasyndaǵy birlesken ınvestısııalyq jobalardy júzege asyrý jónindegi yntymaqtastyq týraly kelisim;
3. Qazaqstan Respýblıkasynyń Aýyl sharýashylyǵy mınıstrligi, «Kazakh Invest» jáne «UBM Group» kompanııalary arasyndaǵy Qazaqstanda qurama jem jáne premıks óndirisi jobasyn iske asyrý jónindegi úshjaqty negizdemelik kelisim;
4. «Qazaqstan temir joly» ulttyq kompanııasy» aksıonerlik qoǵamy (Qazaqstan), «L.A.S Holding» (Majarstan) jáne «Xi’an Free Trade Port Construction and Operation Co» (Qytaı) arasyndaǵy yntymaqtastyq týraly memorandým;
5. «QazMunaıGaz» ulttyq kompanııasy» aksıonerlik qoǵamy men Majarstannyń «MOL GROUP» kompanııasy arasyndaǵy yntymaqtastyqty keńeıtý týraly memorandým;
6. Qazaqstan Respýblıkasynyń Qarjy naryǵyn retteý jáne damytý agenttigi men Majarstannyń Ulttyq banki arasyndaǵy bank salasyndaǵy ózara túsinistik týraly memorandým.

Aldaǵy meje – alys-beristi 1 mlrd dollarǵa deıin arttyrý

Qazaqstan Prezıdenti Qasym-Jomart Toqaev pen Majarstan Premer-mınıstri Vıktor Orban kelissózder qorytyndysy boıynsha BAQ ókilderiniń aldynda brıfıng ótkizip, birlesken málimdeme jasady.

Memleket basshysy qazaq pen majar tereńnen tamyr tartatyn týys halyq ekenin atap ótti. Prezıdenttiń aıtýynsha, áıgili Dýnaı men kóne Altaıdyń arasy alshaq bolsa da, taǵdyrlas eki memlekettiń tilegi – ortaq, armany – bir.

– Otyz jyl buryn Qazaqstan Majarstannan óz elshi­ligin ashty. Bul elimiz­diń Ortalyq Eýropadaǵy tuńǵysh elshi­ligi boldy. Sodan beri eki el arasyn­daǵy qarym-qatynas oıdaǵydaı damyp keledi, aramyzda tek dostyq, jaqsy nıet bar. Elderimizdiń ekonomıkalyq áleýeti mol, ony tolyqqandy ıgerý óte mańyzdy. Sondyqtan bul saparymnyń bas­ty maqsaty – yntymaqtastyǵymyzǵa jańa serpin berý. Majar eli – Qazaqstannyń Eýropa Odaǵyndaǵy senimdi strategııalyq áriptesi. Búgingi berik saıası yntymaqtas­tyq pen tyǵyz ekonomıkalyq baılanys – sonyń aıqyn dáleli. Jańa ǵana Joǵary Mártebeli Vıktor Orban myrzamen mazmundy kelissózder ótkizdik. Premer-mınıstr myrzanyń byltyr Astanaǵa jasaǵan resmı saparynda kóptegen ýaǵdalastyqqa qol jetkizgen edik. Búgin sony qaıta pysyqtap, yqpaldastyqtyń jańa baǵyttary týraly áńgimelestik. Bıyl eki eldiń strategııalyq áriptestik ornatqanyna 10 jyl toldy. Kelissózder barysynda seriktestigimizdiń bolashaǵyn talqyladyq. Tıimdi saıası dıalog júrgizý jáne ortaq ekonomıkalyq jobalardy iske asyrý – óte mańyzdy mindet. Sondaı-aq kópjaqty yqpaldastyqty nyǵaıta túsý qajet. Osy oraıda búgin Birlesken málimdeme qabyldadyq. Qazaqstan men Majarstan arasyndaǵy san qyrly baılanysty kúsheıtý qos halyqtyń múddesine saı keledi, – dedi Prezıdent.

Kelissózder barysynda ekijaqty saýda-sattyq kólemin arttyrýǵa, ınvestısııalyq yntymaqtastyqty tereńdetýge basa mán berildi.

– Qazir álemde ekonomıkalyq jáne ener­getıkalyq daǵdarys beleń alyp tur. So­ǵan qaramastan, eki eldiń ózara taýar aına­lymy jyldan-jylǵa ulǵaıyp keledi. Byl­tyr bul kórsetkish aldyńǵy jylmen salys­tyrǵanda 9 paıyzǵa artty. Aldaǵy meje – ózara alys-beristi 1 mlrd dollarǵa de­ıin arttyrý. Biz Majarstanǵa jalpy quny 700 mln dollar bolatyn 95 taýar tú­rin jetkizýge daıynbyz. Energetıka, metal­lýrgııa, munaı-hımııa, mashına jasaý, aýyl sharýashylyǵy jáne qurylys sala­sy­nyń ónimderin eksportqa shyǵarýǵa múm­kin­digimiz bar. Majar kompanııalary Qazaq­stan­daǵy ınvestısııalyq jobalarǵa qyzyǵý­shylyq tanytyp otyr. Elimizge 2005 jyldan beri 370 mln dollar majar ınves­tısııasy tartyldy. Men búgin Majar­standaǵy iri kompanııa basshylarymen kezdestim («MOL», «OTP Group», «Gedeon Richter»). «UBM» holdıngimen jem shyǵaratyn úsh zaýyt salý týraly jobaǵa qol qoıdyq. Onyń quny – 62 mln dollar. Ekonomıkalyq baılanysty jandandyrý – ýaqyt talaby. Sırek metaldar, sý jáne aýyl sharýashylyǵy salasynyń áleýetin tolyq paıdalanýymyz kerek. Taýar túrin kóbeıtý, ınnovasııalyq tehnolo­gııa tartý, energetıka, sıfrlandyrý, kólik salasyndaǵy áriptestikti nyǵaıtý – óte ózekti másele. Sol arqyly seriktes­tiktiń jańa baǵyttaryn damytamyz. Qazaq­stan – Majarstan Úkimetaralyq komıs­sııasy men Strategııalyq keńesi saýda-eko­nomıkalyq jáne ınvestısııalyq yqpaldastyqqa zor úles qosyp keledi, – dedi Memleket basshysy.

Eki el delegasııalary kelissózder kezinde mańyzdy strategııalyq saýda jolynyń biri Transkaspıı halyqaralyq kólik dáliziniń áleýetin talqylady.

– Búgin «KTZh Express», «L.A.C. Holding» jáne «Xi’an Free Trade Port Construction and Operation» kompanııa­lary arasynda yntymaqtastyq týraly memorandýmǵa qol qoıyldy. Bul – aımaqtaǵy ekonomıkalyq qarym-qatynastyń jarqyn kórinisi. Qujat elderimiz arasyndaǵy saýda jáne kólik baılanysyn nyǵaıtýǵa jol ashady. Infraqurylym, logıstıka jáne halyqaralyq saýdany damytýǵa múm­kindik týady. Azııadan Eýropaǵa qurlyq­pen tasymaldanatyn júktiń 85 paıyzy Qazaqstan arqyly ótedi. Aldaǵy ýaqytta bul baǵytpen 10 mıllıon tonna júk jetkiziledi, – dedi Qasym-Jomart Toqaev.

Memleket basshysy taraptardyń mádenı-gýmanıtarlyq baılanysty naqty is-sharalar arqyly kúsheıtý jóninde ýaǵdalasqanyn jetkizdi.

– Bıyl Astanada ótken Dúnıejúzilik kóshpeliler oıyndaryna Majar qurama komandasy belsene qatysty. Qoldaý­laryńyzǵa raqmet aıtamyn. Mundaı is-sharalar órkenıetimizdiń, tarıhymyzdyń tamyry ortaq ekenin kórsetedi. Baýyrlas halyqtardy jaqyndata túsedi. Majar úkimetiniń qoldaýymen keıingi 10 jylda Qazaqstan stýdentterine oqý granttary bólinip jatyr. Sonyń nátıjesinde birneshe myń jas Majarstannyń joǵary oqý oryndarynda bilim aldy, – dedi Prezıdent.

Qasym-Jomart Toqaev sózin qorytyn­dylaı kele, eki eldiń kópjaqty yntymaq­tastyǵy Birikken Ulttar Uıymy, Túrki mem­le­ketteri uıymy, Eýropadaǵy qaýipsiz­dik jáne yntymaqtastyq uıymy sııaqty qury­lymdar aıasynda tabysty damyp kele jat­qanyna nazar aýdardy. Ásirese Maja­rstan Premer-mınıstri Vıktor Orban­nyń Túrki memleketteri uıymynyń jumysyna belsene atsalysyp, túrki ıntegrasııasynyń órisin keńeıtýge eleýli úles qosyp júrgenin erekshe baǵalaıtynyn jetkizdi.

Vıktor Orban Qazaqstan Prezıdentiniń Majarstanǵa sapary sońǵy ret 17 jyl buryn bolǵanyn eske salyp, Qasym-Jomart Toqaevtyń memlekettik saparmen kelýi eki eldiń strategııalyq seriktestigin keńeıtý turǵysynan mańyzdy ekenine nazar aýdardy.

– Kelisózder barysynda saýda-ekono­mıkalyq baılanystardy nyǵaıtý máse­lesin ǵana talqylaǵan joqpyz. Sondaı-aq eki halyqtyń dostyǵy men tarıhı tamyr­lastyǵy týraly sóz qozǵadyq. Jalpy, saýda-sattyqty damytý, energetı­kalyq resýrstardyń jańa kózin izdeý jáne halyqaralyq energııa tasymaldaý baǵyt­taryn qurý eki eldiń ózara múdde­sine saı keledi. Biz búgin Prezıdent myrza­men majar-qazaq ekonomıkalyq yntymaq­tastyǵynyń áleýetin tolyq paıdalaný úshin barynsha kúsh-jiger jumsaýǵa ýaǵdalastyq, – dedi Vıktor Orban.

Budan soń Qasym-Jomart Toqaev Majarstan Premer-mınıstriniń saltanatty qabyl­daýyna qatysty. Qazaqstan Prezıdentiniń qurmetine uıymdastyrylǵan saltanatty qabyldaý Majarstan Premer-mınıstriniń keńsesi ornalasqan ǵımaratta ótti.

Qazaqstan Prezıdenti Qasym-Jomart Toqaev qazaq delegasııasyna kórsetken qonaqjaılylyǵy men dostyq peıili úshin Vıktor Orbanǵa rızashylyǵyn bildirdi.

Memlekettik sapar aıasynda Qasym-Jomart Toqaev Býdapesht qalasyndaǵy Halyqaralyq dzıýdo federasııasy­nyń shtab-páterine bardy. Onda Qazaqstan basshysy Halyqaralyq dzıýdo federasııasynyń (IJF) prezıdenti Marıýs Vızermen kezdesti.

IJF basshysymen áńgimelesý barysynda osy tanymal sport túrin elimizde damytý keleshegi talqylandy. Marıýs Vızer Qazaqstan dzıýdony qol­daýǵa arnalǵan dáıekti sharalardy júzege asyryp jatqanyn atap ótti. Sony­men qatar sportshylarymyzdyń halyqara­lyq jarystardaǵy nátıjelerine jáne Qazaqstan dzıýdo federasııasynyń jumy­syna joǵary baǵa berdi.

Memlekettik sapary keleli kezdesýlermen túıindelgen Qasym-Jomart Toqaevty Majarstan Premer-mınıstri Vıktor Orban qurmetpen shyǵaryp saldy.