Kollajdy jasaǵan – Qonysbaı ShEJIMBAI, «EQ»
Bankaralyq QR tólem qyzmeti – azamattarǵa QR arqyly tólemderdi tez ári yńǵaıly iske asyrýǵa kómektesetin Ulttyq sıfrlyq qarjylyq ınfraqurylymnyń (NDFI) mańyzdy bólshegi. Bul túrli banktiń birneshe termınalyn ornatý shyǵynyn azaıtady, azamattar kez kelgen banktiń termınaly arqyly QR-kodpen tólem jasaıdy. Sondaı-aq bankaralyq tranzaksııalardy óńdeý shyǵyndaryn tómendetip, klıentterge usynatyn tólem qyzmetteri keńeıe túsedi. Qazir buǵan bankter kezeń-kezeńimen qosylyp jatyr. Jobany keń aýqymda qosý keler jylǵa josparlanyp otyr.
– Qazir Ulttyq bank ınfraqurylymynyń negizinde bankaralyq QR tólemder júıesi qurylyp jatyr. Bul júıe búkil elge, barlyq naryq qatysýshysyna jáne olardyń klıentterine arnalǵan. Ony engizý bankterdiń tólem múmkindigi men qyzmet kórsetý aıasyn keńeıtedi, olardyń klıentterine kez kelgen bankter arasynda bankaralyq QR-tólemderdi qabyldaýǵa jáne júzege asyrýǵa múmkindik beredi. Bul tólem naryǵyndaǵy básekelestikti arttyryp, tutynýshylardyń quqyǵyn qorǵaýǵa jol ashady, – degen edi UB basshysy Tımýr Súleımenov «Egemen Qazaqstan» gazetiniń tilshisine bergen suhbatynda.
«Quick Response» (QR) júıesin alǵash ret 1994 jyly Japonııanyń «Denso Wave» kompanııasy jasaǵan. Avtokólik bólshekterin jyldam qadaǵalaýǵa arnalǵan ádis qarjy salasyn dúr silkindiredi dep eshkim de oılamady. Shtrıhkodtarǵa qaraǵanda áldeqaıda kóp aqparat saqtaıtyn, smartfon arqyly lezde skanerleýge bolatyny ony san salaǵa syıymdy etti. QR kodtyń ishine 7 myń tańbaǵa deıin mátin, sýretterge silteme nemese elektrondy vızıtka sııaqty málimetter salynady. QR kodtar pandemııa kezinde erekshe tanymal boldy. Olar baılanyssyz tólemder, tamaqqa tapsyrys berý, densaýlyq jaǵdaıyn baqylaý (Ashyq júıesi sııaqty), adamdar arasyndaǵy qashyqtyqty saqtaýǵa jıi qoldanyldy.
– Bul – kúrdeli tehnıkalyq tetik. Degenmen bankter jalpy alǵanda bul bastamany oń baǵalaǵanyn atap ótken jón. Qazir júıe tehnologııalyq turǵydan jumysqa daıyn, naryq qatysýshylarymen birge bıznes-prosesterdi talqylap, tehnıkalyq ıntegrasııalaý jumystary júrgizilip, bankter Jol kartasyna sáıkes júıege qosylyp jatyr. Qyzmet 2024 jyldyń aıaǵyna deıin iske qosylady, al naryq qatysýshylary óz klıentteri úshin onyń aıasyn 2025 jyldan bastap keńeıte bastaıdy, – dedi Ulttyq bank basshysy.
Elimizde barlyq bankke biryńǵaı QR-kod engiziletini 2022 jyly aıtylǵan edi. Sol arqyly qaı banktiń klıenti bolsa da, kez kelgen termınaldan QR arqyly tólem jasaýǵa bolatyny belgili bolǵan. Tipti UB tóraǵasy Tımýr Súleımenov bıyl 23 aqpandaǵy baspasóz máslıhatynda bankterdi biryńǵaı QR-kod qosylýǵa mindetteýi múmkin ekenin de aıtqan.
– Bankter Ulttyq qarjy ınfraqurylymynyń artyqshylyqtaryn kórýi kerek, onyń negizinde olar bir-birimen ózara árekettesý múmkindikteri bar. Ol erikti túrde jasalady. Barlyq bankter biryńǵaı QR-kod boıynsha tólemge qosylady dep úmittenemin. Eger erikti túrde qosylmasa, biz mindetteý sharasyn iske asyra alatynymyzdy joqqa shyǵarmaımyn, – degen edi ol.
