Baspasózge jazylý – saıası naýqan. Buryndary qyzmet oraıymen 10–15 túrli gazet-jýrnalǵa jazylatynbyz. Baǵalary da qaltaǵa salmaq salmaıtyn. Qazirgi basylymdardy da sonshalyqty qymbat deı almasaq kerek, tek olarǵa degen ynta-yqylas bolsa, jetip jatyr.
Jyl saıyn jaz ben kúz aılarynda «Qazposhta» mekemesine arnaıy baryp, ózim qalaǵan basylymdarǵa jazylamyn. Respýblıkalyq «Egemen Qazaqstan», oblystyq «Ońtústik Qazaqstan», aýdandyq «Sozaq úni» gazetterin mindetti túrde aldyryp oqımyn. Oqyp qana qoımaı, daǵdyly ádetime basyp, ara-tura ózimdi tolǵandyryp júrgen máselelerge qatysty qalam tartyp qoıatynym bar.
Bir ókinishtisi sol, jurt gazet-jýrnal oqýdan qalyp barady. Oǵan sebep: ınternet, áleýmettik jeli, aqparat taratatyn túrli qural da óziniń eleýli áserin tıgizedi. Onyń ústine qazir buqaralyq aqparat quraldarynyń ornyna buqaralyq kommýnıkasııa degen uǵym ómirge keńinen enip, jedel beleń ala bastady. Desek te basylymdarymyz tarıhymyz ben mádenıetimizdi, áleýmettik-rýhanı baǵyttaǵy ulttyq qundylyqtarymyzdy urpaqtan-urpaqqa jetkizetin negizgi qural ekeni daýsyz.
Sózimdi qoryta kele aıtaıyn degenim, gazet-jýrnalǵa jetetin dúnıe joq. Sebebi, odan izdegen adam bárin tabady. Áleýmettik-rýhanı azyq degenimiz, mine, osy!
Gazet eń aldymen qoǵamǵa, onda turatyn adamdarǵa kerek. Shúkirshilik, aınalamyzda áli de kózi ashyq, kókiregi oıaý saýatty jandar bar. Ony az deseńiz, joǵary damyǵan órkenıetti elderde de basylymdardyń san mıllıondaǵan taralymmen shyǵyp jatqanyn qaıda qoıamyz? Eń bastysy, gazet-jýrnal áleýmettik jeli emes, olar – rýhanııat quraly, solaı bolyp qala beredi de!
Olaı bolsa, gazet-jýrnal oqıyq, aǵaıyn!
Káribaı ÁMZEULY,
baspasóz salasynyń ardageri
Túrkistan oblysy
