«Astana Hub» uıymdastyrǵan jobaǵa barlyǵy 250 ótinim túsip, 50 qatysýshy irikteýden ótken. Olar tórt aılyq qarqyndy oqytý aıasynda ıdeıa men komanda qurýdan bastap, naryqqa baǵyttalǵan startap ázirleýge deıingi úderisterdi meńgergen. Nátıjesinde, 21 startap qurylyp, olardyń 9-y baǵdarlamany sátti aıaqtady. Al úzdik jeti komanda «Seed Money» baǵdarlamasy aıasynda qarjylandyrýǵa ıe boldy.
«AI'preneurs» túlekteri qysqa ýaqyttyń ishinde mańyzdy nátıjelerge qol jetkizdi. Máselen, «SalesFlow» shaǵyn jáne orta bızneske lıdterdi basqarý men satylym úderisterin ońtaılandyrýǵa kómektesetin JI platformasyn ázirledi. «Salyq.AI» jeke tulǵalarǵa salyq deklarasııalaryn toltyrýdy jeńildetýge arnalǵan bot jasap, salyq esep-qısabyn avtomattandyrýdy usynsa, «Qural.AI» kompanııalardyń HR bólimderine qyzmetkerlerdiń ónimdiligin arttyrýǵa baǵyttalǵan jasandy ıntellekt negizindegi joba jasady. «Skideo» fýtbol klýbtary men akademııalaryna arnalǵan platformasyn usynyp, oıynshylar týraly málimetterdi taldaýda joǵary nátıjege qol jetkizdi. Al «Re:create Video» áleýmettik jelilerdegi trendterdi taldap, tez taralatyn kontent jasaýǵa kómektesetin platforma. Ol daıyn ıdeıalar men quraldardy usyna otyryp, blogerler men bızneske oqyrmandaryn kóbeıtýge múmkindik beredi.
«AI'preneurs» baǵdarlamasy IT mamandaryn daıarlaýdyń joǵary deńgeıin ǵana emes, eldiń jasandy ıntellekt salasyndaǵy áleýetiniń zor ekenin de dáleldedi. Qatysýshylar baǵdarlamanyń aıasynda mentorlyq qoldaýǵa, tehnopark ınfraqurylymyna, halyqaralyq seriktestikterge qol jetkizip, óz startaptaryn jetildirýge múmkindik aldy. Akselerasııa úderisinde jetekshi trekerler Evgenıı Frolov pen Nıkolaı Tıan mańyzdy ról atqardy. Olar startaptarmen tyǵyz jumys istep, jobalardyń ár kezeńin muqııat qadaǵalap otyrǵan. Apta saıynǵy bordmıtıngterde gıpotezalardy taldap, qatysýshylarǵa naqty baǵyt-baǵdar berip, olardyń ıdeıalaryn iske asyrýyna jan-jaqty qoldaý kórsetti.
«Astana Hub» bas dırektory Maǵjan Mádıev «AI'preneurs» baǵdarlamasynyń mańyzyn atap ótti. Onyń aıtýynsha, joba elimizdiń tehnologııalyq ekojúıesine serpin berip, jasandy ıntellekt salasynda jahandyq deńgeıdegi tabystarǵa jetýge múmkindik ashady. Alǵashqy túlekterdiń jetistigi baǵdarlamanyń durys baǵytta damyp kele jatqanyn kórsetedi.
«AI'preneurs» – elimizdegi jasandy ıntellekt salasyndaǵy startaptardy damytýǵa arnalǵan alǵashqy biregeı baǵdarlama. Munda jobalar nólden bastalyp, qysqa ýaqyttyń ishinde tamasha nátıjelerge qol jetkizedi. Alǵashqy túlekterdiń nátıjesi óte joǵary boldy: «AI CARD» startaby elordalyq aýrýhanalarda óz sheshimderin engizse, «AVM.AI» iri kompanııalarmen kelisimshart jasasyp, jumys isteıtin MVP-di 30-dan astam paıdalanýshy arasynda sátti synaqtan ótkizip, Fransııa men AQSh-taǵy data-ortalyqtar arasynda 1 mıllıard parametri bar úlgini oqytty. «Chat Insider AI» qarapaıym ıdeıadan bastalyp, búginde jumys chattaryn taldaýǵa arnalǵan qyzmetin qazaqstandyq jáne eýropalyq klıentterge usynyp otyr, al «KAFTAN» túrki tilderin meńgerýge arnalǵan ınnovasııalyq ádisterdi usynyp, jańa baǵyttardy damytyp jatyr. Biz baǵdarlamany keńeıtip, odan da kóp talantty mamandardy tartýdy josparlap otyrmyz. «AI'preneurs» aıasynda qurylǵan jobalar jahandyq tabystarǵa jetip, tehnologııalyq damýǵa úlken úles qosady dep senemin», dedi M.Mádıev.
Aıta keteıik, aldaǵy ýaqytta «Astana Hub», «AI'preneurs» baǵdarlamasyn jalǵastyryp, talantty mamandardyń ekinshi legin qabyldaýdy daıyndalyp jatyr.
