Jalpy, eseptegi eń úzdik komandaǵa marapatty 800 metrge júzýden 3-oryn alǵan «Samuryq-Qazyna» basqarma tóraǵasy Nurlan Jaqypov tabystady. Ekinshi oryndy «QazMunaıGaz» komandasy ıelense, qola júldeni «Samuryq-Energo» quramasy enshiledi.
«Spartakıada bul jaı ǵana sport emes, bizdiń qoǵamdyq ómir men korporatıvtik mádenıetke qosqan úlesimiz. Áriptesterimiz saıysty, baq synasty, biraq syılastyqtan ajyramady, nátıjesinde dostyq jeńiske jetti. Osy oraıda IH spartakıadanyń Sýperkýbok ıelerin quttyqtap qoıýǵa ruqsat etińizder. Otbasylaryńyzǵa baqyt, bastaryńyzǵa amandyq tileımin. Bıikterge birge jete bereıik, el ıgiligi jolyndaǵy eńbekterińiz jemisti bolsyn!», dedi jeńimpazdardy quttyqtaǵan «Samuryq-Qazyna» AQ-nyń basshysy.
Bas tóreshi Petr Belyı men ardager sportshy Serik Ábilǵazıevtiń ant berý rásiminen bastalǵan aýqymdy sharaǵa 15 kompanııanyń 900-ge jýyq qyzmetkeri qatysty. «Samuryq-Qazyna» – el ekonomıkasyna qomaqty úles qosýdan tys, korporatıvtik áleýmettik jaýapkershilikke de erekshe mán beretin eldegi eń iri jumys berýshi. Onyń kompanııalary tobynda búginde 250 myńnan astam adam qyzmet etse, olardyń 230 myńy – óndiris salasynyń jumysshylary, al 84 myńnan astamy – jas maman.
Qordyń tek densaýlyqty jaqsartyp, korporatıvtik rýhty asqaqtatyp qana qoımaı, kásibı sheberlik pen jumystyń tıimdiligine de oń áser etetin basty sport sharasynda 11 sport túrinen 210 medal sarapqa salyndy. Joǵaryda atalǵandardan tys, spartakıadaǵa «QazaqGaz» UK» AQ, «Qazatomónerkásip» AQ, «Qazaqtelekom» AQ, «Qazposhta» AQ, «KEGOS» AQ, «Taý-Ken Samuryq» UTK» AQ, «Samruk-Kazyna Construction» AQ, «Samruk-Kazyna Ondeu» JShS, «Samuryq-Qazyna Bıznes Servıs» JShS, «Túrkistan» BGQ, «PSA» JShS, «Samruk United» qurama komandasy qatysty. Elimizdiń jetekshi kompanııalarynyń sportshylary eń myqty ataǵyn sarapqa salyp, jeke sport túrleri: ústel tennısi, shahmat, toǵyzqumalaq, qol kúres, júzý, komandalyq sport túrleri: shaǵyn fýtbol, voleıbol, basketbol, arqan tartý, asyq atý, kıbersport boıynsha ózara baq synady.
Belsendi ári salamatty ómir saltyn nasıhattap, elimizdiń barlyq aımaǵynan «Sportqa «Iá!» de» urany aıasynda bas qosqan túrli qyzmet pen ártúrli jastaǵy eńbek adamdary úshin naǵyz merekege aınalǵan dúbirli jarys barysynda tutas otbasylar jankúıerlik tanytty. Ata-ájeleri men ata-analaryna erip kelgen balalarǵa bólek, tanymdyq, oıyn alańqaılary uıymdastyryldy. Jeńisti sáttermen birge jeńilistiń dámin tatqandardyń da júzinen renish baıqalmady. Sebebi ózara syılastyǵy, birligi men dostyǵy jarasqan sharaǵa qatysýshylar ózinen buryn basqalar úshin qýanyp, qoshemet bildirdi komandasy úshin baryn salyp, úzeńgilesteriniń abyroıy men namysyn qorǵaýdy oılady. Onyń ústine, Memleket basshysy kelesi 2025 jyldy «Jumysshy mamandyqtar jyly» dep jarııalaǵany aıan.
Farhad Nurmuhamed,
temirjolshy, voleıbolshy:
«Uıymdastyrýshylarǵa rahmet aıtamyz. Osynyń bári eńbektiń arqasy. Kúnine eki mezgil jattyǵý jasap otyrdyq. Jeńisimizge qýanyp jatyrmyz».
Tatıana Afanaseva,
«Samuryq-Energo» sport ádiskeri:
«Biz spartakıadaǵa daıyndyqqa naqty bir ýaqytty belgilep, jınalyp otyrdyq. Kóbine ol keshki ýaqyt. Basqa ýaqyt bizge yńǵaısyz. Sebebi bizdiń qyzmetkerler úsh nemese eki aýysymda eńbek etedi».
Balmıra Bekbosynova,
«Besasyq» oıynynyń tóreshisi:
«Bıyl oıynshylarymyzdyń jaqsy daıyndalyp kelgeni baıqalady. Asyǵy alshysynan túskenderdiń arasynda jańa esimder kóbeıdi. Ulttyq sportty ulyqtaǵan «Samuryq-Qazyna» jarady».
Iýrıı Nýshtaev,
«QazaqGaz» sportshysy:
«Qol kúresten 2014 jyldan bastap qatysyp júrmin. Bul spartakıadadaǵy qarsylastarym óte myqty boldy. Sondyqtan bıyl úshinshi oryn alyp qaldym».
Bekjan Turtaı,
QTJ kıbersportshysy:
«Spartakıadaǵa kıbersport degen sportty qosqanyna rahmet! Osy ótken úsh kún ishinde «energııa» kúshti boldy».
Nurdana Sákenqyzy,
«Samruk united» quramasy:
«Spartakıada óte keremet ótti. Aldaǵy ýaqytta da sportpen shuǵyldanýǵa zor ynta-jiger beredi. Biz jumysta otyrǵanda ýaqyttyń qalaı ótip jatqanyn baıqap ta úlgermeımiz. Al shyn máninde sport – ómirimizdiń mańyzdy bóligi».
Baýyrjan Tóle,
«Qazcloud» fýtzal quramasynyń múshesi:
«Bizge bul jarystyń mańyzy zor. Sebebi jyl saıyn qatysyp júrmiz. Bul is-sharanyń uıymdastyrylýy da árdaıym joǵary deńgeıde, barshaǵa qatty unaıdy. Búgingi jarysqa úlken daıyndyqpen keldik. Aptasyna 3 ret jattyǵamyz. Sol eńbektiń jemisin kórdik dep senemiz».
Sporttyq jetistikterden basqa, spartakıada qaıyrymdylyq, ekologııalyq bastamalarǵa da sep boldy. Árbir qatysýshy men jankúıer mektepterde ınklıýzıvti kabınetter ashýǵa qarajat jınaýǵa úles qosa alatyndaı aqparattyq taqtalarda arnaıy QR-kodtar ornalastyryldy. Sonymen qatar uıymdastyrý alqasy qatysýshylardy «Taza Qazaqstan» ekologııalyq aksııasy aıasynda qorshaǵan ortaǵa qamqorlyq tanytyp, tazalyq saqtaýǵa, plastık ónimderdi az qoldanýǵa shaqyrdy.
Basty qundylyǵy adam ómiri men densaýlyǵy sanalatyn qor qaramaǵyndaǵy kompanııalar tobynan tys, el kóleminde buqaralyq, ınklıýzıvti sporttyń qarqyndy damýyna qoldaý kórsetip keledi. Oǵan dálel, búginde biryńǵaı qaıyrymdylyq operatory – «Samruk-Kazyna Trust» áleýmettik jobalardy damytý qory arqyly keıingi birneshe jylda óńirde 40-qa jýyq qazirgi zamanǵy sport kesheni men oıyn alańy salynyp, buqaralyq sportpen 90 myńnan astam turǵyn, onyń ishinde aýyl jastary qamtyldy.
Aldabergen KEMPIRBAI
