«Parasat maıdany» — adamnyń ishki álemi men rýhanı qundylyqtary týraly syr shertetin psıhologııalyq drama. Qoıylym qazaq ádebıetiniń klassıgi Tólen Ábdik shyǵarmalarynyń negizinde («Oń qol» jáne «Parasat maıdany») sahnalanǵan. Qoıýshy rejısseri – Qazaqstannyń eńbek sińirgen qaıratkeri Gúlsına Mırgalıeva. Qoıýshy jáne kıim sýretshisi – Shynar Elembaeva. Horeograf – Karına Djırenbaeva.
Spektakldiń negizgi ózegi — adamnyń óz-ózimen kúresi, qoǵamdaǵy moraldyq qundylyqtardyń joǵalýy jáne aqıqattyń tereńine úńilý. Basty keıipker — jalǵyzdyq pen ishki qaıshylyqtyń qurbanyna aınalǵan jan. Ol adamdar arasyndaǵy ádiletsizdikke qarsy ún qatyp, qoǵamnyń qatal júıesine qarsy turýǵa tyrysady.
Qoıylym barysynda kórermender rýhanı qundylyqtar men materıaldyq álemniń qaıshylyqtaryn, adam bolmysynyń kúrdeliligin, jaqsylyq pen jamandyqtyń ara jigin ajyratý máselelerin tereń sezinedi.
«Parasat maıdany» — adamnyń rýhanı bıigine jetý jolyndaǵy kúresin beıneleıtin, kórermendi oılandyratyn, ómirdiń shynaıy mánin izdeýge jeteleıtin týyndy.
Spektaklde basty róldi Qazaqstannyń eńbek sińirgen qaıratkeri Nurken О́teýil somdaıdy.
