Qazaqstan – Qytaı: Týrıster qatary arta tústi

Týrızm jyly jobasynyń jabylý rásimine elimiz ben Qytaıdyń týrıstik ındýstrııasynyń 300-den asa ókili qatysty. Ataýly jyl ishinde QHR-dyń túrli qalalarynda 30-dan asa iri is-shara ótkizildi, eki eldiń kompanııalary men uıymdary arasynda 200-den asa kelisimge qol qoıyldy. Iskerlik, mádenı mıssııalar týrıstik, mádenı almasýlardy damytýǵa, elimizdiń tartymdy týrıstik baǵyt retindegi pozısııasyn nyǵaıtýǵa yqpal etti. Nátıjesinde, kórshi elden keletin týrıster sany aldyń­ǵy jyldarmen salystyrǵanda shamamen 50%-ǵa artty.

«Bıylǵy jyl elimiz ben Qytaıdyń týrızm salasyndaǵy ózara is-áreketiniń aıtarlyqtaı keńeıýimen erekshelendi. Eki el arasyndaǵy týrıstik aǵyn eleýli ósimdi kórsetti. Bul bizdiń tatý kórshi eken­digimizdi, ózara túsinistik pen mádenı almasýǵa degen ortaq umtylysymyzdy kór­setedi», dedi Týrızm jáne sport mınıstriniń orynbasary Erjan Erkin­baev.

Shekara qyzmetiniń derekterine sáıkes, otandastarymyzdyń Qytaıǵa sapary – 31%, al Qytaıdan elimizge kelgen meımandar qatary 50%-ǵa ósti. Bıylǵy jyldyń alǵashqy on aıynda 400 myń otan­dasymyz Qytaıǵa bardy. Qytaıdan elimizge 550 myńǵa jýyq adam kelse, byltyr 367 myń adam kelgen eken. Demek bul kórsetkish te eki eldiń bir-birine degen qyzy­ǵý­shylyǵy arta túskenin, týrızm jyly aıasynda júzege asyrylǵan joba­lardyń jaqsy nátıje bergenin kórsetedi.

Bıyl Beıjiń, Sıan, Shanhaı, Gon­kong, Úrimshi qalalarynda elimizdiń qa­la­lary men oblystarynyń týrızm kúnderi ótip, bizdiń el 4 týrıstik kórmede (COTTM, ITB China, ITE Hong Kong, Qytaı medısınalyq týrızm jármeńkesi) usynyldy. Shandýn, Hebeı provınsııalarynda eki úlken konsert ótti. Tıanszın qalasynda uıymdastyrylǵan «Altyn adam», «Uly dala» kórmelerinde Ulttyq mý­zeı­diń kolleksııalarynan eksponattar usy­nyldy.

Sondaı-aq mádenı-aqparattyq is-sharalarmen qatar aýqymdy jobalar da uıym­dastyryldy. Máselen, «Jibek joly» avtokerýenine, Peking-Paris Motor Challenge rallıine, Jibek joly boıymen júrip ótken mototýrǵa 500-ge jýyq adam qatysty. Qytaıdyń iri medıa korporasııalary elimizdiń týrıstik áleýetin belsendi túrde nasıhattady. QHR-daǵy Qazaqstan týrızmi jylynyń jalpy medıa nátıjesi 1,8 mlrd qaralymǵa jet­se, áleýmettik jelilerde elimiz týraly ja­­rııalanymdardyń qamtylý deń­geıi 160 mln paıdalanýshyny qurady. Qys­qasy, týrızm jylynyń nátıjesi saıahatshylarǵa jańa kókjıekter ashsa, týrıstik ındýs­trııa ókilderine seriktestik baılanystardy keńeıtýge múmkindik berdi. Eki el arasynda áýe qatynasy edáýir ul­ǵaıdy. Tikeleı, charterlik reıster eli­mizdi Qytaıdyń negizgi qalalarymen baı­lanystyryp, saıahattaý aıasyn keńeıtti.

Keler 2025 jyl Qazaqstandaǵy Qytaı týrızmi jyly bolyp belgilendi. Bul kelisim eki memleket basshylarynyń bir­lesken baspasóz máslıhatynda resmı túrde jarııalandy. Sarapshylardyń piki­rinshe, atalǵan is-shara elimizde týrıstik segmenttiń jańa betterin ashpaq. Damyǵan elderde toptyq týrlar ótkenniń enshisine aınalyp úlgerdi. Qazir smartfonǵa júktelgen jol nusqaǵyshpen jeke saıahattap júrgen shetel azamattaryn kóp­tep kezdestirýge bolady. Demek ke­ler jyly IT ındýstrııasynyń týrızm segmentiniń júgin jeńildetetin baǵdarlamalary uıaly telefondarǵa júkteledi degen úmit bar.

QHR-dyń Almatydaǵy Bas konsýly Szıan Veı hanym Qytaıda Týrızm jyly jarııalanǵan sátten bastap mádenı, týrıstik baǵyttaǵy tıisti uıymdar Qonaev, Túrkistan sııaqty qalalarda kóp­tegen is-shara ótkizgenin aıtty. Uly Jibek joly boıynda jatqan óńirlerge erekshe nazar aýdarylǵanyn atap ótti.

«2025 jyly Qazaqstan Qytaıdyń Týrızm jylyn qabyldaıdy. Biz QHR-daǵy kóptegen týrıstik ónimmen, tanymal baǵytpen tanystyrýdy josparlap otyrmyz. Maqsatymyz – eki el arasyndaǵy ózara túsinistikti nyǵaıtyp qana qoımaı, yntymaqtastyǵymyzdy jańa deńgeıge shyǵarý», dedi bas konsýl.

Forým, saıyp kelgende, atqarylǵan jumystardy qorytyndylaýdyń, sondaı-aq yntymaqtastyqty odan ári nyǵaıtýdyń mańyzdy is-sharasyna aınaldy. 80-ge jýyq qazaqstandyq jáne qytaılyq týroperator iskerlik baılanystardy nyǵaıtý, áriptestik ornatý maqsatynda B2B kelissózder júrgizdi.

«Kazakh Tourism» Ulttyq kompa­nııasynyń Basqarma tóraǵasy Qaırat Sádýaqasovtyń aıtýynsha, qazir álemdik týrıstik ındýstrııa Qytaıdyń jeke saıahatshylarynyń ynta-yqylasyn týdy­rýǵa kúsh salyp jatyr. Elimizge kelip ketken qytaılyq týrıst ortasha eseppen 1000 dollar jumsaıdy.

«Biraq Mastercard aqparatynda 573 dollar ekeni aıtyldy. Bul jerde Mastercard málimetteri osy kartaǵa ıe paıdalanýshylardy ǵana eskeretinin atap ótken jón. Basqa sarapshylardyń aıtýynsha, qytaılyq týrısterdiń jartysynan astamy (57%) somanyń kóp bóligin qolma-qol aqshamen jumsaıdy. Sondyqtan týrısterdiń naqty shyǵystary Mastercard usynatyn derekterge qaraǵanda edáýir joǵary dep sanaımyz. Orta eseppen alǵanda qytaılyq týrıster elimizde 4 kúnnen 7 kúnge deıin bolady: týrıster 5-7 kúnge keledi, al qysqa merzimdi jumys vıza­symen kelgen qonaqtar 3-4 kúnnen keıin qaıtady», deıdi «Kazakh Tourism» basshysy.

QHR-daǵy Qazaqstan týrızmi jyly týrızm segmentiniń jańa deńgeıin, dıplomatııalyq qyryn tanytty. Beınelep aıtar bolsaq, resmı dıplomatııanyń aıaǵy jetpegen jerge týrızmniń jetetinin dáleldedi. Infraqurylymnyń joǵary deńgeıi, týrıstik menedjmenttiń damýy jaǵynan Qytaıdyń týrızm ındýstrııasy kóp elge úlgi bola alady.

Qazir elimizde respýblıkalyq deń­geıde kólik ınfraqurylymyn da­mytýǵa qajet qarajat qarastyrylyp jatyr. Bul qarajat esebinen 18 myń shaqyrymnan astam jol tıisti jóndeý, qaıta salý jumystarmen qamtamasyz etiledi. Memlekettik kepildikpen beriletin qaryzdar esebinen respýblıkalyq mańyzy bar avtomobıl joldarynyń 10 toraby rekonstrýksııalanady. 7292 temirjol vagondary jyljymaly qura­mynyń parki jańar­tylady.

«Qytaımen aradaǵy týrızmdi damytý­dyń saraptalǵan strategııasy, óńir­lerdiń qansha týrıst qabyldaý múm­kindigi bar ekendigi týraly naqty jospar bolýy kerek. Infraqurylymǵa qatys­ty máseleler memlekettik deńgeıde zer­de­lendi. Ár oblystar men qalalarda ma­mandan­dyrylǵan gıdterdi kóptep daıyn­daý, trans­ferlerdiń jetispeýshiligi máselesin sheshý, saýda úılerin daıyndap, marke­tıngti keńeıtip, elimizdiń óz brendin ja­saýdy qoldaý qajet», deıdi Q.Sádýa­qasov.

Forým barysynda oǵan qatysýshylar áıgili ánshi Dımash Qudaıbergenniń «Kıeli mekenim» ánine jazylǵan jańa klıpin tamashalady. Týǵan el týraly patrıottyq kompozısııa elimizdiń kórikti jerlerin kórsetedi. Kórermender kórnekti týrıstik oryndarǵa vızýaldy saıahat jasaı alady. Onyń ishinde Sharyn shatqaly, Kólsaı kólderi, Aqmeshit úńgiri, Áziret Sultan murajaı-qoryǵy, Bozjyra shatqaly, Torysh alqaby tárizdi biregeı oryndar bar. Beınebaıanda Býrabaı, Katon­qaraǵaı, Altynemel, Jońǵar Ala­taýy ulttyq parkteriniń kadrlary da kórinis tapqan.

Saltanat sońynda taraptar arasynda birqatar iskerlik memorandýmǵa qol qoıyldy.

ALMATY