Sýret: facebook.com/oquagartuministrligi/
Mınıstrliktiń taratqan aqparatyna súıensek, Atalǵan issapar Qazaqstan Premer-mınıstriniń tehnıkalyq jáne kásibı bilim júıesindegi stýdentterge qoldaý kórsetý ári salany damytý úshin elimizde Ulttyq quzyrettilik ortalyǵyn qurý týraly tapsyrmasyn júzege asyrý aıasynda uıymdastyryldy. Ǵ.Beısembaevtyń mamandardy daıarlaıtyn biregeı oqý ortalyǵy – Lý Ban sheberhanasyna barýy jumys sapary barysyndaǵy mańyzdy is-sharalardyń biri boldy. Keshen stýdentterdiń jańa óndiristik jáne sıfrlyq tehnolgogııalardy, ınjenerlik jobalaýdy meńgerýine múmkindik beretin zamanaýı qural-jabdyqtarmen, oqý materıaldarymen jaraqtandyrylǵan. Bul tájirıbeni elimizde ulttyq quzyrettilik ortalyǵyn ashý kezinde qoldaný josparlanyp otyr, bul tehnıkalyq jáne kásiptik júıe stýdentteri úshin jańa múmkindikterge jol ashady.
Tıanszınde Ǵ.Beısembaev Qytaıdyń jetekshi kolledjderiniń ókilderimen birneshe kelissóz ótkizdi. Taraptar ekijaqty yntymaqtastyqty damytý jáne jumysshy mamandardy daıarlaýda tájirıbe almasý máselelerin talqylady. Sondaı-aq 48 memlekettiń salalyq mınıstrleriniń qatysýymen ótken Dúnıejúzilik kásiptik jáne tehnıkalyq bilim berýdi damytý jónindegi konferensııaǵa qatysty. Otyrystyń plenarlyq sessııasynda sóz sóılegen mınıstr Qazaqstanda kásibı-tehnıkalyq bilim berý júıesin damytýdyń mańyzdylyǵyna toqtalyp ótti.
«Qazaqstan Prezıdenti jarııalaǵan «Jumysshy mamandyqtar jyly» aıasynda tehnıkalyq jáne kásibı bilim júıesin transformasııalaý júrgizilip jatyr. Ásirese kúrdeli óndiristik máselelerdi sheshý úshin qajet emosıonaldyq ıntellekt, ınjenerlik oılaý sııaqty jumsaq daǵdylardy damytýǵa erekshe nazar aýdarylyp keledi. Halyqaralyq tájirıbeni eskere otyryp, zańnamalyq normalardy jetildirýge, kolledjderdi basqarý júıesin kúsheıtýge basymdyq beriledi. Qazaqstan óz stýdentteriniń básekege qabilettiligin arttyrý úshin maman daıarlaý úrdisine álemdik kásibı qaýymdastyq pen aldyńǵy qatarly bilim tehnologııalaryn engizýge umtylyp otyr», dep málimdedi Ǵ.Beısembaev.
Sondaı-aq mınıstr Qytaı Halyq Respýblıkasynyń bilim mınıstri Hýaı Szınpenmen ekijaqty kezdesý ótkizdi. Taraptar bilim salasynda Qazaqstan-Qytaı yntymaqtastyǵyn arttyrý, tehnıkalyq jáne kásiptik bilimde eki eldiń tájirıbe almasýy máselesin talqylady.
