Sýretti túsirgen – Erlan OMAR, «EQ»
Platforma uıymdarǵa balanstan balansqa jetý rásimin sátti júrgizedi. Birlesken sharttar tetigin odan ári jeńildetip, talap etilmegen múliktiń biryńǵaı tizilimin qalyptastyrady. Qazir «Tapsyru» servısine 700-den astam qatysýshy, 313 myń aktıv tirkelip úlgergen. Úkimet basshysy Oljas Bektenovtiń sózinshe, osyndaı mańyzdy salalardyń sıfrlanýy – bıýdjet qarajatyn utymdy josparlaýǵa kómektesedi. Ári kóleńkeli ekonomıkany álsiretip, joıady.
Oǵan qosa keler jyly «Kásipkerdiń biryńǵaı jeke kabıneti» portalyn iske qosý josparda tur. Ol memlekettik organdar men kásipkerlerdiń ózara is-qımylyn jeńildetedi. Nátıjesinde, salyqtyq, kedendik ákimshilendirýdiń tıimdiligi artyp, bıýdjet qarjysy utymdy jumsalmaq. Sonymen qatar bıznes-jaǵdaılardy basqarýdy ońtaılandyryp, memlekettik organdar men kásipkerler arasyndaǵy ózara is-qımyl úderisterin utymdy etpek.
Jalpy, qarjy salasyn sıfrlandyrý bir izge túskendeı. Joǵaryda aıtqan bastamalardan bólek, Qarjy mınıstrligi «Onlaın bıýdjettik monıtorıng» jobasyn iske asyryp jatyr. Ol memlekettik bıýdjettiń oryndalýyn qadaǵalap, qarajatty tıimdi josparlap, jumsalýyn baqylaıdy. Mysaly, buryn tekserýler «qolmen basqarý rejiminde» júrgiziletin edi. Qazir júıede 150 mln-nan astam tólem avtomatty túrde óńdelip jatyr. Túsindirer bolsaq, Ishki memlekettik aýdıt komıteti tólemder bóliginde táýekeldiń aldyn alýdy taldaıdy. Osynyń arqasynda bıýdjetke 4 mlrd teńge qarajat qaıtaryldy.
Damyǵan elder áldeqashan osyndaı servısterdi paıdalaný arqyly aıtarlyqtaı paıdaǵa kenelgen. Máselen, AQSh-ta «OpenGov» platformasynyń arqasynda keıbir shtattar ákimshilik shyǵyndardy 20%-ǵa deıin azaıtqan. Germanııa bolsa, «SAP Public Sector» júıesi arqyly bıýdjetti josparlaý ýaqytyn qysqartyp, jylyna mıllıondaǵan eýro únemdegen. Eger atalǵan jobalar qoldanysqa sátti ener bolsa, biz de osy kóshke ilesip qalarmyz.
