Álem jáne Azııa chempıonatynyń fınalısi tusaýkeser kezdesýin taıpeılik Vang Chıýanǵa qarsy ótkizdi. Báseke bastalǵan bette Dýlat damylsyz shabýyldap, qarsylasyn tyǵyryqqa tiredi. Ekinshi raýnda Chıýan ájeptáýir taıtalasty. Biraq Bekbaýov sheginbeı aıqasty. Úshinshi kezeńde bizdiń jigittiń basymdyǵy anyq baıqaldy. Nátıjesinde, barlyq tóreshi Dýlattyń myqtylyǵyn biraýyzdan moıyndady.
Kelesi kúni Orazbek Asylqulov (57 kg) malaızııalyq Zýlhaılan Mohamadpen, Beıbarys Jeksen (60 kg) ózbekstandyq Dilshod Abdýmýrýdovpen kúsh synasty. Qos qandasymyz eresekter arasyndaǵy osyndaı dúbirli dodaǵa alǵash ret qatysyp otyr. Soǵan qaramastan ekeýi de sharshy alańdy shıraq qımyldap, óz básekelesterinen basym tústi. Orazbek Malaızııa ókilin tehnıkalyq nokaýtpen utsa, Beıbarys upaı sanymen jeńiske jetti.
Keshe burymdylar óz jarysyn bastady. Álem chempıonatynyń eki dúrkin júldegeri, qurlyqtyń eki dúrkin chempıony Alýa Balqybekova (50 kg) Chýthamat Raksatpen (Taıland), al Uljan Sársenbek (57 kg) Karına Vovkpen (Ýkraına) sheberlik baıqasty. Búgin álem chempıony Mahmud Sabyrhan (54 kg) Iаn Lın Laımen (Taıpeı), Aıda Ábikeeva (63 kg) Dılfýza Bekovamen (О́zbekstan), Mılana Safronova (67 kg) Mın Lımen (Taıpeı) judyryqtasady.
Sóz oraıy kelgende, bes birdeı boksshymyzdyń qatysýshylar sanynyń azdyǵynan birden júldeger atanǵanyn aıta ketken jón. Máselen, jartylaı fınalda álem chempıony Bekzad Nurdáýletov (86 kg) Danııl Jasanmen (Ýkraına), Azııa chempıony Aıbek Oralbaı (+92 kg) jastar arasyndaǵy álem chempıony Jahongır Zokırovpen (О́zbekstan) judyryqtasady. Natalıa Bogdanova (70 kg) men Gúlsaıa Erjan da (81 kg) jekpe-jekke shyqpaı-aq sol mejege jetti. Al Eldana Tálipova (81 kg) birden fınalǵa joldama alyp otyr. Sheshýshi básekede ol Oltınoı Sotımboeva (О́zbekstan) men Marına Lovchınskaıa (Ýkraına) arasyndaǵy kezdesýdiń jeńimpazymen kúsh synasady. Iаǵnı qazirdiń ózinde keminde tórt qola, bir kúmis medal qorjynǵa tústi.
