Otyrysqa Qoǵamdyq palata múshelerimen qatar Májilis pen barlyq deńgeıdegi máslıhat depýtattary, múddeli memlekettik organdardyń, «Atameken» ulttyq kásipkerler palatasynyń ókilderi, kásipkerler men sarapshylar qatysty.
Aıdos Sarym Salyq kodeksiniń jobasyn talqylaýǵa arnalǵan jıyndy Almaty qalasynda ótkizýdiń mańyzyna toqtalyp, munda barlyq deńgeıdegi bıznes shoǵyrlanǵanyn jáne kásipkerler belsendi jumys isteıtinin atap ótti. Sondaı-aq ol Memleket basshysy qyrkúıektegi Joldaýynda salyq zańnamasy máselelerin Úkimet pen Parlamentte jan-jaqty talqylap, qajetti sheshimder shyǵarýdy tapsyrǵanyn eske saldy.
– Qyrkúıek aıynan bastap Májilis jańa Salyq kodeksiniń jobasyn ázirlep jatyr. Onyń tanystyrylymy kezinde qyzý talqylaý boldy. Árıne, túrli platformadaǵy talqylaýlarǵa, sarapshylardyń usynystaryna qaramastan, joba áli de biz oılaǵandaı deńgeıge jetpeı jatyr, tolyq pisip-jetilýi kerek, – dedi A.Sarym.
Depýtat túzetý engize bermeıtin, bolashaqta turaqty jumys isteıtin kodeksti qabyldaý mindeti turǵanyn atap ótti. Bul kásipkerlerdi ashyq jumys isteýge, salyq tóleýge májbúrlemeı, yntalandyrýy qajet. Osy rette basty mindet «salyqty tóleý ony tólemeýden arzanyraq» bolýy kerek.
Ulttyq ekonomıka vıse-mınıstri Azamat Ámrın jańa Salyq kodeksi jobasynyń salyq saıasaty bóligindegi negizgi baǵyttary týraly aqparat berdi. Ol bul joba salyq tólemderin azaıtýǵa, salyq jeńildikterin ońtaılandyrýǵa, korporatıvti tabys salyǵy mólsherlemesin saralaýǵa jáne arnaıy salyq rejimderin reformalaýǵa baǵyttalǵanyn aıtty. Sondaı-aq jekelegen normatıvtik quqyqtyq aktilerde jer qoınaýyn paıdalanýshylar men jeke tulǵalar úshin ınvestısııalardy yntalandyrý jáne salyqtyq retteý qarastyrylǵan.
Sonymen qatar Qarjy mınıstrligi Memlekettik kirister komıteti tóraǵasynyń orynbasary Jánibek Nurjanov salyqtyq ákimshilendirýdiń servıstik modeli dep atalatyn túri engizilip, salyq eseptiligi qysqartylyp, adal salyq tóleýshilerge baqylaý azaıatynyn atap ótti. Salyq táýekelderin basqarý, qosymsha qun salyǵyn ákimshilendirý, májbúrlep óndirip alý, keıinge qaldyrý jáne bólip tóleý josparlaryn usyný jáne basqa da erejeler qamtylǵan.
Talqylaý barysynda Májilis depýtaty, kodeks jobasy boıynsha jumys tobynyń jetekshisi Berik Beısenǵalıev, sarapshylar Erlan Smaıylov pen Natalıa Malıarchýk, bıznes-qoǵamdastyq ókilderi men sarapshylar óz usynystarymen bólisti.
«Atameken» UKP basqarma tóraǵasynyń orynbasary, basqarma múshesi Tımýr Járkenov jańa Salyq kodeksiniń jobasyn ázirleý jáne talqylaý barysynda kásipkerler men Úkimet ustanymdarynyń kelispegen tustaryna toqtaldy. Atap aıtqanda, ol áleýmettik sala uıymdary, medısına, sondaı-aq turǵyn úı jyljymaıtyn múlikti bastapqy satý boıynsha qurylys salýshylar úshin qosymsha qun salyǵynan bosatý jeńildikterin saqtaýdy usyndy.
– Salyq kodeksiniń jobasynda kez kelgen nysandaǵy dárilik zattardy, medısınalyq maqsattaǵy buıymdardy, sondaı-aq tegin medısınalyq kómektiń kepildik berilgen kólemi jáne mindetti áleýmettik medısınalyq saqtandyrý sheńberinde ǵana olardy óndirýge arnalǵan materıaldar men jınaqtaýshy buıymdardy satýdy jáne ákelýdi qosymsha qun salyǵyn tóleýden bosatý boıynsha shekteýler qarastyrylǵan. Bul rette kommersııalyq segmentte satylatyn dári-dármekterge qosymsha qun salyǵy salynady, – dedi T.Járkenov.
Jıyn barysynda kásipkerlerdiń de pikirleri tyńdaldy. Olar ózderine tanys ári qolaıly normalardy alyp tastaýǵa baǵyttalǵan zańnamalyq túzetýlerge alańdaýly. «Alıans MarKo» JShS dırektory Oksana Marchenkonyń aıtýynsha, qoldanystaǵy zańnamaǵa sáıkes, salyq organy kameralyq tekserý týraly habarlamany oryndalmaǵan dep jarııalaǵan kezde tıisti sheshim qabyldaýǵa mindetti, biraq Salyq kodeksiniń jobasynda bul normany alyp tastaý usynylǵan. Sarapshylar munyń tıimsizdigin baıqap otyr, óıtkeni salyq tóleýshi budan bylaı kameralyq baqylaý nátıjeleri týraly tolyq ári senimdi aqparat ala almaıdy jáne ákimshilik aktige sotta narazylyq bildirý múmkindiginen aıyrylady.
Sońynda vıse-spıker Danııa Espaeva jalpy Salyq kodeksiniń jobasyn talqylaýǵa, jıynǵa belsene qatysqany úshin memlekettik organdar men bıznes ókilderine alǵysyn bildirdi.
– Salyqty azaıtý nemese jańa salyqtar engizýden bas tartý týraly usynystar jasaldy. Degenmen kúni keshe biz bıylǵy jáne aldaǵy úsh jyldyq bıýdjetke ózgerister men tolyqtyrýlardy qarastyrǵanymyzdy umytpaýymyz kerek jáne qandaı tapshylyq bar ekenin kórip otyrmyz. Bıýdjetti tolyqtyrý ádisteriniń biri – salyq bazasyn ulǵaıtý. Sondyqtan men qatysýshylardy, ásirese sarapshylardy bıýdjet kiristerin ulǵaıtý máselesinde memlekettiń ustanymyn eskerýdi suraımyn. О́ıtkeni búginde shyǵystardyń 40 paıyzy áleýmettik salaǵa tıesili, – dedi Májilistiń vıse-cpıkeri.
