Shybyn jannyń keıpi

Pablo Pıkassonyń my­na kartına­syn kórip, qyr qazaǵy qaraptan-qarap «aýy­ryp» qalýy bek múmkin. Ishi qatqan jylqy ma, indet shalǵan jylqy ma, áıteýir dimkás ja­nýar degen maǵynadaǵy sýret. Osy­nyń aldynda Salvador Dalı salǵan jylqylardy kórip, «janýardy osynshama qorlaýǵa bola ma eken? Jylqyǵa kúni túse bermeıtin jaqtyń balasy bolǵasyn óstıdi ǵoı», dep qoıǵanbyz. Múm­kin bir shyǵarmanyń jeli­simen asqan qasiretti nemese bolmystyń azǵyndaýyn kórsetkisi kelgen shyǵar, kim bilipti.

Al Pıkassonyń myna kartınasy sonaý bir jyldary juttan qaýsap qalǵan jylqylardy eske saldy. Qaı­bir jyldary elimizdiń batys aımaǵyndaǵy kóterem jylqylardyń sýreti men beınesi jelini alyp ketip edi. Sonda bir qanjylaǵanbyz. Pıkasso tipti kóterem qyl­ǵany óz aldy­na, ishek-qarnyn aqtaryp tastapty. Bala kúnimde jylqyda júrip jamanaýy­z (qasqyr) jaryp ketken bıeniń ústinen túsip, ondaıǵa da dýshar bol­ǵanym bar, janym ja­byrqap, solyq qysqan. Son­da úlken kók bıeniń ishin jaryp, jyly-jumsaǵyn jep ketipti. Jabaǵysynyń san etiniń jarymy salaqtap júr. Jylqyny ińirttep aýyl­dyń tusyna aıdap ákel­dim. Ertesine ıt-qus jaba­ǵysyn da jaıratyp ketken eken. Sonda ıt-qus alǵash shapqanda, bıe qulynyn qorǵashtap, ózin jazym etken bolyp tur ǵoı. О́limge ózin qıyp, balasyn aman alyp qalǵan. Meniń jylqyny úıge aıdap ákelmegen sha­lalyǵymnan kelesi túni qu­lyndy jáýkemdepti. Onyń da denesi tutas qalypty da, ishin aqtaryp jepti.

Pablonyń týyndy­syn­daǵy myna janýardyń kóterem bolyp, ishek-qa­rny súıretilgeni óz aldyna, aldyǵa qaraı sál etpettese, jerden shyǵyp turǵan úshkir temirge ja­ry­lyp qalardaı. Avtor qandaı da bir qasiretti, ty­ǵyryqqa tirelgendi salǵanyn ańǵaramyz. Jylqy emes, shyrqyraǵan shybyn jan dep qaraǵan jón shyǵar. Qashyp qutylar jol joq, jalǵyz-aq kókten kómek túspese. Tanaýyn aspanǵa tigip qoıǵany beker emes avtordyń. Jany murnynyń ushyna keldi deıdi qazaq. Jan alqymǵa kelgende, jylqy da Qudaıdan úmitti. Bál­kim, adamzatqa sony emeý­rin etkisi kelgen bolar.