Segiz júz adam jumys isteıtin mekemedegi tirshilik tym erte bastalady. Júrgizýshiler tań atpaı áýeli medısınalyq baıqaýdan ótedi, artynsha bulardyń daıyndyǵyn mehanık baqylaıdy. Tańǵy saǵat alty jarymda avtobýstar túrli tarapqa jolǵa shyǵady.
«Qaladaǵy ár baǵyttyń ózindik ereksheligi bar. Mysaly, men júrgizetin №12 avtobýs jolynda oqý oryndary, saýda úıleri men bazarlar jıi ornalasqan. Sondyqtan da salonnyń bos bolatyn kezi sırek, kerisinshe syımaı qalatyndar kóp. Tańerteń jumysqa, keshke úıge asyqqandardyń bárin ala ketýge tyrysamyz. Bizdiń baǵyttaǵy 1 avtobýs kúnine 360 shaqyrymnan astam jol júrip, 600–700 jolaýshy tasymaldaıdy. Qansha adam bolsa, sonsha minez bar. Sonyń bárine qaltqysyz qyzmet kórsetýimiz kerek», deıdi ol.
Osy salada uzaq jyl tájirıbe jınaǵan maman jergilikti «Bolashaq» ýnıversıteti men «Aqmeshit» ınstıtýtyn bitirgen. Biraq mamandyǵyna sáıkes jumys isteý buıyrmapty. Tipti ony izdemedi de, úırengen kásibin jalǵastyra berdi. Oılap otyrsa, osy ýaqytqa deıin jarty mıllıon shaqyrymnan astam jol júrip, júzdegen myń adamdy tasymaldapty. Kóshesinde kóligi qaıshylasqan qalada mundaı kásippen aınalysý aıtýǵa ǵana ońaı, árıne. Sonda da mekeme qaqpasynan enip, áriptesterine jetkennen-aq bárin umytyp sala beredi.
Jolaýshy retinde ózimiz de qala ishindegi avtobýstar jumysy burynǵymen salystyrǵanda kóp jaqsarǵanyn baıqaımyz. Degenmen salaǵa syn aıtqyshtar áli de bolsa tabylady. Biraq olar da jol júrý mádenıetin, jolaýshy jaýapkershiligin sezinse deısiń. Keıde aıaldamadan mingen kóligiń sál júrip, qaıta toqtap jatady. Esigi ashylǵannan taǵy bireýdiń minetinin bilip, aıaldamaǵa jete almaı, amaly quryǵan qart kisiniń nemese júrýi qıyn naýqas jannyń enetinin kútip turǵanyńda qol-aıaǵy balǵadaı jap-jas ini-qaryndastarymyzdyń kerdeńdeı basyp kirgenin kórip, talaı márte bas shaıqaǵanbyz. Qazir kóp adamnyń kóńiline syımaıtyn osyndaı kórinis azaıyp keledi.
«Keıde avtobýsqa ádeıilep janaı júrip, yǵystyrǵysy keletinder bolady. Odan bólek, júzdegen adam tıegen kólik aldynan aıaqasty atyp shyǵatyndar da az emes. Osydan da eki kózimiz jolda bolady. Sondaıda aıaldamasy joq tustan qol kóterip turatyndar «Nege jan-jaqtaryńa qaramaısyńdar?» dep keıip jatady. Tipti esigińniń aldynan minip-túskisi keletinder bar. Úlkender bolsa túsiner edik, qarǵa adym jer jaıaý júrgisi kelmeıtin jap-jas qyz-jigitterdi búgin tárbıelemesek, erteń barmaq tistep qalamyz. Stýdent kezimizde talaı márte qurylys materıaldaryn túsirip, aqsha taptyq. Qazirgiler ondaıǵa jolamaıdy. Keıde avtobýsqa túrli qorǵa aqsha jınaıtyn jastar minedi. Tepse temir úzetin solardyń bolymsyz tirlik sońynda júrgenine qarnym ashady. Talaıyna aqyl aıtyp jiberesiń, biraq kóp uzamaı qaıta aınalyp kelip turǵanyn kóresiń. Túrli kásiporyn osy kúni kolledjderde bilim alyp jatqan jastarymyzdy dıplomy qolyna tıisimen jumysqa alýǵa ázir. Biraq keıingi tolqynnyń soǵan qulqy joq. Memleket basshysy bastamashy bolǵan «Jumysshy mamandyqtar» jyly osyndaı olqylyqtardy joıyp, jumysshy mártebesin kóteredi dep úmittenemiz», deıdi keıipkerimiz.
Joly túsip, basqa oblys ortalyǵyna saparlaı qalsa, eń aldymen ondaǵy jolaýshylar tasymalyna nazar aýdaratyny bar. Almaty men Astanada bul jaǵy jaqsy jolǵa qoıylǵan. Qaraǵandy, Jezqazǵanda da jańa kólikter júıtkip júr. Qyzylordadaǵy avtobýs parkiniń qazirgi jaǵdaıyn burynǵymen salystyra almaısyz. Tehnıka jańardy, jalaqy ósti. Osydan onshaqty jyl buryn syqyrlaǵan eski kólikpen júretin qyzylordalyqtar qazir jazda salqyn, qysta jyly avtobýstarmen qatynaıdy.
Ony qulanıektenip atqan tańmen talasyp, jumysyna asyqtyratyn qudiret – eldiń senimi men jaýapkershilik. Ár aıaldamada jolyn tosqan jandardy dittegen jerine jetkizip, jolaýshynyń amandyǵyna alańdaıtyn avtobýs júrgizýshisi árdaıym el alǵysyn tynys-tirligine arqaý etip keledi.
QYZYLORDA
