Bank te, kompanııa da – bári osynda
Otbasy bankpen birge 17 qurylys kompanııanyń satý bólimi kelip halyqqa turǵyn úı alý jóninde keńes berdi. Jalpy áıgili konsert zalynyń holy máz-meıram. Bir jaǵynda salymshylar qurylys kompanııalarynyń, bankterdiń ókilderimen sóılesip jatsa, ekinshi jaǵynda bank kelýshilerdiń kóńilin kóterý úshin shaǵyn konserttik baǵdarlama da uıymdastyrǵan. Bir qaraǵanda toıdaǵy kóńil-kúı sekildi. Biraq sol «toıǵa» kelgen halyq jaı júrmeı, baspana máselesin rettep júr.
«Jaı kúnde mundaı múmkindik bola bermeıdi ǵoı. Úı alǵysy kelip júrgen adam biraz qurylys kompanııanyń esigin qaǵatyny anyq. Dostarymnan osy jerge banktiń adamdary, qurylys kompanııasynyń ókilderi keletinin estidim. Birden keldim. Bylaıǵy kúnde bankte uzaq kezekte turasyń nemese qurylys kompanııalarynyń satý bólimderin izdep júresiń. Al munda bári bir jerde», deıdi Astana qalasynyń turǵyny Aslan Kenjebekov.
Aslan sekildi «Ipoteka DAY» is-sharasyna kelgenderdiń qatary kóp. Sonyń biri – alty balanyń anasy Shynaraı Dáýletbekova «Naýryz» baǵdarlamasy boıynsha baspana alǵan.
«2020 jyly kópbalaly ana retinde kezekke turdym. Qudaıǵa shúkir, úı alyp, qýanyp jatyrmyz. О́zim aspazshymyn. Eńbektenseń, baspanaǵa ıe bolasyń. Tek sený kerek», dedi ol.
Is-sharaǵa kelgenderdiń biri bankke, biri qurylys kompanııasyna baryp, máselelerin sheship júr. Astana qalasynyń turǵyny Sholpan Nazarova da «Naýryz» baǵdarlamasymen baspanaly bolǵan. Jaqynda sý jańa úıine kóship barmaq.
«2019 jyly men Otbasy bankte depozıt ashtym. «Otaý» jáne «Naýryz» baǵdarlamasy biriktirilgen eken. OP jınalyp, depozıtke 18 aı toldy. Dekrettegi ana retinde «Otbasy bank» maǵan ıpotekany maquldady. Biz ózimizdiń zeınetaqy jınaǵymyzdy da paıdalandyq. Ákem zeınetaqy jınaǵynyń bir bóligin maǵan aýdardy. Solaısha, bastapqy aqshany jınap aldyq. Turǵyn úı keshenin tańdap, baspana satyp aldyq. Jyldar boıy etken eńbektiń jemisi osy! О́z úıiń bolǵanǵa ne jetsin!?» dedi Sholpan.
Munda «Otbasy banktiń» barlyq ónimi boıynsha aqparat berilip jatyr
Is-shara Astana turǵyndary men qala qonaqtary úshin ótkizildi. Is-sharada konserttik baǵdarlama da qarastyrylǵan, jyljymaıtyn múlik salasyndaǵy táýelsiz sarapshylar sóz sóılep, qurylys salýshylardan obektiler men páterlerge jeńildikter týraly aqparattary jan-jaqty berildi. Sondaı-aq, is-sharada «Naýryz» baǵdarlamasy boıynsha qonystanýshylarǵa baspana kiltteri tabystaldy.
Biz «Otbasy bank» basqarma tóraǵasynyń orynbasary Jansultan Mataıdy sózge tarttyq. Onyń sózinshe, jalpy «Otbasy bank» turǵyn úı júıesin júrgizip jatqan biregeı banktiń biri. Bul júıeniń artyqshylyǵy – árbir azamattyń tabysyna qaraı otyryp, ózine sáıkes, memlekettik qoldaý sharalary, bolmasa ózine qajetti úı beretin júıe. 2024 jyldyń 11 aıynda bank 63 myń shamasynda nesıe bergen. Onyń 32 myńy alǵashqy naryqtaǵy úıler. Iаǵnı elge bank bergen nesıelerdiń 50 paıyzy alǵashqy naryq arqyly.
«Salymshylarǵa búkil qalany aralap, qurylys kompanııalaryna barýdyń qajeti joq. Barlyǵy osy jerde ornalasqan. Qurylys kompanııalary tarapynan qandaı usynys bar? Kelesi jyly qandaı jańadan úıler salady? Sonyń bárin aıtyp berip jatyr. Oǵan qosa osy jerde bizdiń salymshylar óziniń tólem qabilettiligin jaǵdaıyn anyqtap, baspanany qandaı jolmen alýǵa bolatynyn naqty bile alady. «Otbasy banktiń» barlyq ónimderi boıynsha keńes alyp jatyr», dedi ol.
Baǵdarlamalar jaıly
«Otbasy banktegi» 2024 jyldyń jańalyǵy – «Naýryz» baǵdarlamasy. Aldynda «Otaý» baǵdarlamasy shyqqan. Ol «Otbasy banktiń» óz jeke qarajatyna bastalǵan baǵdarlama bolsa, «Naýryz» memlekettiń qoldaýymen bastalǵan baǵdarlama. «Naýryz» baǵdarlamasy kelesi jyly da jalǵasyn tabady. Jalpy memlekettiń qoldaý sharalarynyń arqasynda 2-5 paıyzben nesıege kezekte turǵan azamattar jeterlik. Al «Naýryzda» basty talap – atynda úıi joq Qazaqstannyń kez kelgen azamaty qatysa alady. Sondyqtan bul – óte yńǵaıly, tıimdi baǵdarlama.
Sonymen qatar, byltyr pılottyq joba retinde bastalǵan, áıelderge arnalǵan «Umaı» baǵdarlamasy da kelesi jyly jalǵasady. «Jasyl ıpoteka» baǵdarlamasy da úzilip qalmaıdy. Sebebi bul –Azııalyq Damý bankimen birlese júrgiziletin joba.
«Salymshylar eger keleshekte «úıli bolam» dese, bizdiń qyzmetterge júginýi kerek. Bizdiń qyzmetterdi alý óte ońaı. Kóp qyzmetterdi onlaın formatqa shyǵarǵanbyz. Iаǵnı, eń basty keregi – kelip tegin depozıt ashý. Jınaqqa memleket tarapynan kómek bolady. Bankten 2% syıaqy qosylady. Sol arqyly azamattar baspanasyna qol jetkize alady», dedi Jansultan Mataı.
«Ipoteka DAY» basqa óńirlerde de ótkiziledi
«Otbasy bank» basqarma tóraǵasynyń orynbasary Nurlan Aqshanovtyń sózinshe, «Ipoteka DAY» – jyl saıyn ótkizetin is-shara. Astanada ǵana emes, «Otbasy bank» barlyq óńirde uıymdastyrylady.
«Biz qurylys salasyndaǵy seriktesterimizdi shaqyramyz. Olarmen sóılesken klıentterge biz birden banktiń sharttary, «Naýryz», «Umaı», «Jasyl ıpoteka» sekildi baǵdarlamalarymyz týraly keńes beremiz. Jylyna eki-úsh ret ótkiziledi. Bıyl tipti Qazaqstanda qala-qala boıynsha marafon sııaqty uıymdastyryldy. Sol sebepti salymshylarǵa bizdiń Instagram paraqshamyzdy qarap otyrýǵa keńes beremiz.
«Naýryz» baǵdarlamasy bizde bıyl bastaldy. Ol úshin bastapqy jarna – 20 paıyz. Paıyzdyq ósim 9 paıyz (JTSM 9,3%-dan 11,8% deıin) , eger kategorııańyz jaqsy bolsa, 7 paıyzben (JTSM 7,3%-dan 8,9% deıin) qaryz beriledi. Osy baǵdarlamamen birinshi naryqta Almaty, Astana jáne Shymkentten, oblys ortalyqtarynan úı ala alasyz. Eger aýyl jaqtan, monoqalalardan alam deseńiz, onda ekinshi naryqtan alýǵa bolady. Ol úshin sizdiń jáne otbasyndaǵy týǵan-týystaryńyzdyń atynda bes jyl boıy eshqandaı baspana bolmaýy kerek», dedi ol.
Ulttyq damý ınstıtýty
Eske sala keteıik, ótken aıda «Otbasy bankke» ulttyq damý ınstıtýty mártebesi berilgen edi. Iаǵnı, tyń ózgeris boıynsha baspana kezegine qoıý, kezektiń saqtalýyn qadaǵalaý, kezektegilerge turǵyn úı úılestirý jumystary «Otbasy bank» pen sonyń janynan qurylatyn Turǵyn úımen qamtý ortalyǵyna beriledi. Qujatty ótken aıda Májilis Senat usynǵan ózgeristermen birge qabyldap, Prezıdentke joldaǵan bolatyn. Kóp ótpeı qujatqa Memleket basshysy qol qoıdy.
Jańa zań sheńberinde jergilikti ákimdikter jeńildetilgen áleýmettik turǵyn úı qurylysyn jalǵastyrady. Al Otbasy bank jańa turǵyn úılerdi kezekte turǵan azamattar arasynda bólip, retteıdi. Otbasy bank ulttyq damý ınstıtýty bola otyryp, Ulttyq bank jáne Qarjy naryǵyn retteý jáne damytý agenttiginiń retteýimen, ekinshi deńgeıli bankter, sondaı-aq Qazaqstannyń depozıtterge kepildik berý qory júıesinde jumysyn jalǵastyrady. «Otbasy banktiń» qyzmeti qazirgi tańda 8 memlekettik organnyń jınaqtalǵan derekter bazasymen ıntegrasııalanǵan. Keleshekte mundaı ıntegrasııa ulǵaıa bermek.
Resmı derekterge qaraǵanda, Qazaqstanda qazirgi tańda 650 myńnan astam azamat baspana kezegine tirkelgen. Olardyń bárin túgendeý jumystaryn aldaǵy ýaqytta ákimdikter júrgizýi kerek. О́nerkásip jáne qurylys mınıstrligi baspana kezegindegi azamattardyń málimetterin qaıta óńdeý kerek dep esepteıdi. Anyqtalǵan aqparattardyń bári de ákimdikterge sheshim qabyldaý úshin usynylǵan. «Otbasy bank» ulttyq damý ınstıtýty bolǵan soń, kezekte turǵandardyń qazirgi, qalyptasqan biryńǵaı respýblıkalyq bazasyn júrgizetin jáne «Turǵyn úımen qamtamasyz etý ortalyǵy» jańa elektrondyq bazasymen baspanaǵa muqtaj azamattardyń bárinen ótinim qabyldaıdy.
