Foto: vıdeodan kadr
«Búgin saǵat 15:30-da Azat aýylynda jerleý rásimin ótkizý kezinde qoǵamdyq tártip pen aınalasyndaǵylardyń, onyń ishinde kámeletke tolmaǵan balalardyń qaýipsizdigine qaýip tóndirgen oqıǵa oryn aldy. Azamat N., prokýrordyń zańdylyqty saqtaý týraly túsindirmelerin elemesten, ózin óte agressıvti ustaı bastady, aınalasyndaǵylarǵa qaýip tóndirip, sýısıd jasaımyn dep qorqytty. Sondaı-aq, polısııa qyzmetkerine pyshaqpen shabýyl jasady. Onyń minez-qulqy ózine de, aınalasyndaǵylarǵa da qaýip tóndirdi. Azamat N. jaǵdaıyna alańdaǵan týystary men advokattarynyń ótinishi boıynsha onyń ómiri men aınalasyndaǵylardyń ómirine zııan keltirmeý maqsatynda polısııa qyzmetkerleri ony ustaý úshin sharalar qabyldady», dep habarlady Almaty oblysy polısııa departamentiniń baspasóz qyzmeti.
Qazirgi ýaqytta ol polısııa bólimine jetkizildi, onymen psıhologtar jumys istep jatyr.
«Polısııa jaǵdaıdy turaqtandyrý boıynsha jumysty jalǵastyrýda jáne azamattardy sabyrly bolýǵa shaqyrady. Azamattardan tek resmı derekkózderge senýdi suraımyz jáne jalǵan málimetterdi taratý qylmystyq jaýapkershilikke deıin ákelýi múmkin ekenin eske salamyz», delingen habarlamada.
Aıta keteıik, 2024 jylǵy 4 qazanda Talǵarda jappaı tóbeles bolyp, saldarynan16 jastaǵy Sherzat Polat pyshaq jaraqatynan qaıtys boldy. Qoǵamdyq rezonans týdyrǵan jasóspirimdi óltirý faktisi boıynsha QR Qylmystyq kodeksiniń bes baby boıynsha tergeý júrip jatyr, 11 kúdikti qamaýǵa alyndy.
Sonymen qatar, keshe, 9 jeltoqsanda Talǵardyń shetinen Sherzat Polattyń aǵasynyń máıiti tabylǵan edi. Aldyn ala málimet boıynsha, 30 jastaǵy Nurǵanat Ǵaıypbaev asylyp ólgen. Keıinirek Almaty oblystyq polısııa departamenti 16 jastaǵy jasóspirimniń aǵasynyń ólerinen buryn jazǵan hatyn jarııalady.
