Foto: Ashyq derekkóz
«Jalpy aýdıt nátıjeleri boıynsha 142 mlrd teńge bıýdjet qarajatynyń tıimsiz josparlanǵany jáne paıdalanylǵany, 2 mlrd teńgege qarjylyq buzýshylyqtar anyqtaldy. Ekonomıkalyq shyǵyndar men jiberip alǵan paıda shamamen 5 mlrd teńgeni qurady. Bıýdjetke 2 mlrd teńge óteldi jáne qalpyna keltirildi», dedi Joǵary aýdıtorlyq palata tóraǵasy Álıhan Smaıylov.
Onyń aıtýynsha, 4 fakt boıynsha materıaldar quqyq qorǵaý organdaryna jiberiledi. 322 materıal ákimshilik jaýapkershilikke tartý úshin jiberilgen.
«Májilistiń Agrarlyq máseleler komıtetiniń barlyq usynysy Úkimetke berilgen usynymdarda jáne memlekettik organdarǵa berilgen tapsyrmalarda eskerildi. Aýyl sharýashylyǵyn damytý máseleleri boıynsha birlese jumys istep, jan-jaqty qarastyrǵany úshin Májilis depýtattaryna alǵys aıtamyz», dedi Á.Smaıylov.
Joǵary aýdıtorlyq palata tóraǵasy sýbsıdııalaýdyń qarapaıym jáne aıqyn algorıtmi qajet ekenin atap ótti.
«Salanyń strategııalyq qujattaryn iske asyrýǵa bólinetin qarajattyń áserin barynsha arttyratyndaı etip sýbsıdııalar tizbesin qaıta qaraý qajet. Sýbsıdııalar ónimdilikti arttyrýǵa jáne ozyq agrotehnologııalardy engizýge yntalandyrýy tıis.Sala sýbektilerine kredıt berý, saqtandyrý múmkindikterin jáne basqa da qoldaý quraldaryn keńeıtý qajet ekeni anyq. Mysaly, fermerde kepil múlki bolmaǵan nemese jetkiliksiz bolǵan jaǵdaıda memlekettik damý ınstıtýttary tarapynan kepildik berý mańyzdy», dedi Á.Smaıylov.
