Sýret: ratel.kz
Bizde jyldam nesıe beretin 220-ǵa jýyq uıym bar. Solar bıylǵy 9 aıda 72 mlrd teńge taza paıda tapqan. Bas banktiń habarlaýynsha, tabystyń basym bóligi iri 20 mıkroqarjy uıymyna tıesili.
Sonyń ishinde byltyr otandastarymyzdyń jeke derekterin taratyp jibergen «Robokesh.kz» mıkroqarjy uıymy 10 mlrd teńge paıda túsirgen. Odan keıingi orynda bankke aınalǵysy kelip júrgen «KMF» mıkroqarjy uıymy tur. Uıym qańtar-qyrkúıek aılarynda 7,96 mlrd teńge tabys tapqan. Úzdik úshtikti Dýlat Tastekeıdiń «TAS Finance Group» kompanııasy aıaqtaıdy. Bul qarjy uıymy 9 aıda 6,28 mlrd teńge tapqan.
Baıqaǵanymyzdaı, otandastarymyz jyldam onlaın nesıege tym qumar. Jalpy qaryzy 1,2 trln teńgeden asqan. Alǵan shaǵyn nesıesin qaıtarmaı júrgenderdiń qatary da artyp barady. Jyl basynda tólenbegenine 3 aıdan asqan shaǵyn nesıe úlesi 6,1% bolsa, qazir 10 boryshkerdiń bireýi alǵan qaryzyn ýaqtyly tólemeıdi. Bul taqyrypqa qatysty daý da kóp.
Sondyqtan da mıkroqarjy ombýdsmany osy jyldyń 21 jeltoqsanynan bastap iske kirisedi. Ombýdsman mıkroqarjy uıymdarynyń klıentterine kómek berý úshin quryldy.
– Mıkroqarjy ombýdsmany otandastarymyzdyń mıkrokredıtke baılanysty daýlaryn, sonyń ishinde merzimi ótken qaryzdardy rettep, kollektorlyq agenttikterge qatysty máselelerdi qaraıdy. Ombýdsman táýelsiz tóreshi retinde áreket etip, daýlardy sotqa júginbeı sheshýge yqpal etedi, – dep málimdeıdi Qarjy naryǵyn retteý jáne damytý agenttigi.
Mańyzdysy, ombýdsman qabyldaǵan sheshimdi mıkroqarjy uıymy nemese qaryz alýshy 30 kún ishinde oryndaýy kerek. Biraq mıkroqarjy ombýdsmany sotqa joldanǵan ister nemese zańdy kúshine engen sot aktilerin qaramaıdy.
Mıkroqarjy ombýdsmanynyń qyzmeti mıkrokredıt berý naryǵyn quqyqtyq alańda damytýǵa yqpal etedi. Bul ınstıtýt mıkroqarjylyq uıymdardy zańnamany saqtaýǵa ári qyzmet kórsetýdiń ozyq tájirıbelerin engizýge yntalandyra túspek. Qazir elimizde tek bank pen saqtandyrý ombýdsmandary jumys isteıdi.
