VVS taratqan málimetke súıensek, Olaf Sholsti qoldap 207 depýtat sóz sóılegen, 394-i qarsy daýys berip, 116-sy qalys qalǵan. Bul máseleni Olaf Sholstiń ózi parlament aldynda kótergen. Endi el prezıdenti 21 kún ishinde Býndestagty taratý-taratpaý týraly sheshim qabyldaýy qajet. Al Frank-Valter Shtaınmaıer buǵan deıin elge turaqtylyq pen áreket ete alatyn úkimet qajet dep málimdegen edi. Osyǵan qarap Býndestagty taratady dep aıtýǵa sebep bar. Jańa saılaý Germanııada 2025 jyldyń 23 aqpanynda ótedi.
Saýalnamalar nátıjesi kórsetkendeı, Frıdrıh Mers basqaratyn HDO/HSO hrıstıandyq partııalarynyń koalısııasy áskerı shyǵyndardy ulǵaıtýǵa, zańsyz ımmıgranttarǵa shekarany jabýǵa, Ýkraınaǵa «Taýrýs» zymyrandaryn jetkizýge ýáde bergen edi. Endi oǵan saılaýshylardyń 30%-dan astamy qoldaý kórsetpek. Ekinshi orynda ońshyl popýlıstik «Germanııa úshin balama» partııasyna saılaýshylardyń 20%-ǵa jýyǵy daýys berýge daıyn. Áleýmettik-demokratııalyq partııa shamamen 17%, al jasyldar 11% daýys jınaı alady-mys.
Shols koalısııasy qarashanyń basynda Germanııa kansleri Erkin demokratııalyq partııanyń jetekshisi, qarjy mınıstri Krıstıan Lındnerdi qyzmetinen bosatqannan keıin ydyraǵan. Onyń artynan úsh áriptesiniń ekeýi otstavkaǵa ketken, bul is júzinde basqarýshy koalısııanyń ydyraýyna ákeldi. Qazir Mınıstrler kabınetinde sosıal-demokrattar men jasyldar qaldy, al Parlamentte kópshiliktiń qoldaýynyń bolmaýy onyń jumysyn qıyndatyp otyr. О́ıtkeni Sholstiń ortalyq solshyl sosıal-demokrattary men jasyldary ınfraqurylymdy modernızasııalaýdy, jasyl energııaǵa kóshýdi qarjylandyrýdy jáne qaryz qarajatyn paıdalanyp ónerkásip pen Ýkraınaǵa kómektesýdi qalaıdy. Biraq Krıstıan Lındnerdiń Germanııanyń lıberaldy erkin demokratııalyq partııasy qaryz alýǵa úzildi-kesildi qarsy bolyp, onyń ornyna salyqty, áleýmettik shyǵyndardy qysqartýdy jáne kómirtegi beıtaraptyǵyna kóshýdi keıinge qaldyrýdy talap etip otyr.
