Memlekettiń barlyq resýrsy el azamattarynyń ál-aýqatyn jaqsartýǵa baǵyttalǵan. Sebebi bul – Prezıdenttiń saıası jáne áleýmettik reformalarynyń basty maqsaty. Jıynǵa qatysýshylarǵa qarata aıtqan sózinde «Amanat» partııasynyń tóraǵasy Erlan Qoshanov halyqtyń qarjylyq saýatyn arttyrýǵa arnalǵan «Qaryzsyz qoǵam» jobasy eldegi jańa saıası mádenıettiń úlgisine aınalǵanyn atap ótti. Jobany tabysty júzege asyrý maqsatynda partııa, Parlament, Úkimet, jergilikti bılik organdary, qarjy sektorynyń ókilderi men belsendi azamattar birlesip jumys istedi.
Májilis tóraǵasy halyqtyń shekten tys nesıe qaryzyna batýy qoǵamdaǵy eń ótkir problemalardyń biri ekenin jetkizdi. Ony sheshý maqsatynda Memleket basshysy Qasym-Jomart Toqaev júıeli sharalar qabyldap jatyr. Prezıdent tapsyrmasy boıynsha jeke tulǵalardyń bankrottyǵy jáne nesıe berý kezinde táýekelderdi barynsha azaıtý týraly zańdar qabyldandy, al bes jyl buryn birjolǵy kredıttik amnıstııa jarııalanyp, 500 myń adamnyń nesıesi keshirildi.
Alaıda E.Qoshanov atap ótkendeı, jaǵdaıdy túbegeıli túzetý úshin máseleniń saldarymen emes, sebebimen kúresý mańyzdy. Dál osy maqsatta «Amanat» partııasy Memleket basshysy joǵary baǵa bergen azamattardyń qarjylyq saýatyn arttyrý jobasyn bastady.
«Shyn máninde, «Qaryzsyz qoǵam» jobasy partııalyq jobadan jalpyulttyq deńgeıge kóterildi. Biz Prezıdent alǵa qoıǵan aýqymdy, strategııalyq mindetti – qoǵam mádenıetin ózgertý máselesin birlese sheship kelemiz. Biz azamattarǵa máseleni memleket sheship bergenin kútip otyra bermeı, ómirdi óz kúsh-jigerimen jaqsartýyna múmkindik beremiz, óziniń jáne jaqyndarynyń taǵdyryna jaýapkershilik alýǵa úıretemiz. Sonymen qatar azamattardyń boıyna adal eńbek etip, laıyqty tabysqa jetýge jáne bolashaqqa senimmen qaraýǵa múmkindik beretin jańa qabiletterdi darytamyz. «Qaryzsyz qoǵam» jobasy – jańa memlekettik strategııanyń bir bóligi. Bul – Memleket basshysynyń Ádiletti Qazaqstandy qurý baǵytynyń negizgi ıdeıasy jáne «Adal azamat» bastamasynyń ózegi», dedi Májilis spıkeri.
Búginde jobaǵa qatysýshylardyń 40%-dan astamy qaryz júktemesin, 70%-y aı saıynǵy nesıe tólem mólsherin, al 41%-y nesıelerdiń jalpy sanyn azaıtty. Sondaı-aq jazǵy kanıkýl kezinde «Qaryzsyz qoǵam» sarapshylary mektepterdiń, kolledjderdiń jáne joǵary oqý oryndarynyń 7,5 myń ustazyn qarjylyq saýatty arttyrý ádistemesine oqytty. Bıyl 500 myńnan asa oqýshy men 100 myń stýdent bilim aldy. Osy sharanyń barlyǵy memlekettiń aralasýymen problemalyq nesıeler úlesin 18%-dan 7%-ǵa deıin tómendetýge múmkindik berdi. Munyń bári – Memleket basshysynyń tapsyrmalaryn júıeli júzege asyrý kezindegi memlekettik organdardyń, depýtattyq korpýstyń jáne partııanyń úılesimdi, komandalyq jumysynyń nátıjesi.
Sonymen qatar «Amanat» partııasynyń tóraǵasy «Qaryzsyz qoǵam» jobasynyń aýqymyn keńeıtý qajet ekenine toqtaldy. Atap aıtqanda, joba aıasynda qarjylyq ınternet-alaıaqtyqqa qarsy kúres, bıznesti damytý, turǵyn úı alý, bilim alý sııaqty memlekettik qarjylaı qoldaý baǵdarlamalary arqyly usynylatyn jańa qarjylyq quraldardy úıretý baǵyttary qarastyrylýǵa tıis.
О́z kezeginde Premer-mınıstrdiń orynbasary – Ulttyq ekonomıka mınıstri Nurlan Baıbazarov Úkimet azamattardy qoldaýdyń mańyzdy ári tıimdi quraly retinde «Qaryzsyz qoǵam» jobasyn iske asyrýǵa erekshe nazar aýdaratynyn jetkizdi. Atap aıtqanda, stýdentter men oqýshylardy qarjylyq saýattylyqqa jáne kásipkerlik negizderine oqytý jumysy jalǵasady. Jobanyń aýqymyn keńeıtý maqsatynda memlekettik organdar tarapynan turaqty ári jan-jaqty qoldaý kórsetiledi. Iаǵnı joba túlekteriniń jumysqa ornalasýyna járdemdesýge jáne qarjylyq alaıaqtyqqa qarsy is-qımyldy kúsheıtýge basa mán beriledi.
Budan ári Qarjy naryǵyn retteý jáne damytý agenttiginiń tóraǵasy Mádına Ábilqasymova qaryz alýshylardyń boryshtyq júktemesin esepteýge qoıylatyn talaptardyń qatańdatylǵanyna jáne nesıe boıynsha syıaqynyń shekti mólsherlemeleri tómendetilgenine nazar aýdardy. Sonymen qatar kollektorlarǵa azamattardyń nesıelerin satýǵa ekijyldyq moratorıı engizildi. Onyń aıtýynsha, osy jáne ózge de sharalar qaryz alýshylardyń jaǵdaıyn aıtarlyqtaı jaqsartýǵa múmkindik beredi.
«Halyk Bank» basqarma tóraǵasy Úmit Shaıahmetova bank «Qaryzsyz qoǵam» jobasyn qarjylandyrýmen ǵana emes, azamattardy oqytýǵa tikeleı atsalysý arqyly da belsendi qoldaý kórsetetinin atap ótti. Bastamanyń mańyzdy bóligi – azamattardy jumyspen qamtý. Bul qadam nesıe alýshylardyń qaryzyn óteýine jáne qarajat jınaýyna kómektesedi.
Is-sharaǵa Eńbek jáne halyqty áleýmettik qorǵaý mınıstri Svetlana Jaqypova, Oqý-aǵartý mınıstri Ǵanı Beısembaev, Ǵylym jáne joǵary bilim mınıstri Saıasat Nurbek, sondaı-aq elimizdiń barlyq óńirinen kelgen mentorlar men joba qatysýshylary qatysty. Kezdesý sońynda seriktester men joba sarapshylaryna alǵyshattar men estelik syılyqtar tabystaldy.
Aıta keteıik, jobany júzege asyrýǵa 12 kommersııalyq bank pen 11 memlekettik organ qatysyp jatyr. Jobaǵa qatysýǵa nıet bildirgen azamattarǵa yńǵaıly bolýy úshin qogamfin.kz onlaın-platformasy ázirlendi. Saıt arqyly oqý kýrsyna jazylyp, paıdaly materıaldar men beınesabaqtardy júktep alýǵa bolady.
