Foto: Vedomstvo
Jyl basynan beri Balqash kóline 15,4 mlrd tekshe metr sý keldi, bul byltyrǵy kórsetkishten 4 mlrd tekshe metrge artyq. Onyń ishinde tasqyn kezinde 3,3 mlrd tekshe metr sý tústi.
Jyl basynan beri Kaspıı teńizine 17 mlrd tekshe metr sý kelgen.
Almaty oblysyndaǵy Qapshaǵaı sý qoımasy sońǵy 10 jylda alǵash ret 100%-ǵa tolyp, 18 mlrd tekshe metrden astam sý jınaǵan.
Sý tasqyny kezinde Batys Qazaqstan oblysynyń Qamys-Samar kólderine 80 mln tekshe metr sý jiberilgen.
Ulytaý oblysynan Qyzylorda oblysyna 839 mln tekshe metr sý kelip, baqylaý tarıhynda alǵash ret bul sý Sarysý ózeni arqyly Qyzylorda oblysynyń kólder júıesine jetti.
Sý resýrstary jáne ırrıgasııa mınıstrliginiń baspasóz qyzmetiniń málim etýinshe Sý dıplomatııasy, sýdy dál bólý jáne sý únemdeý tehnologııalaryn engizý arqyly elimizdiń ońtústiginde sý balansyn jaqsartýǵa qol jetkizildi. Máselen, bıyl Soltústik Aralǵa shamamen 2,5 mlrd tekshe metr sý jiberildi, bul 2023 jylmen salystyrǵanda 400 mln tekshe metrge artyq. Bul rette, Qyzylorda oblysynyń sharýalary sý únemdeý tehnologııalaryn paıdalanǵandyqtan 200 mln tekshe metrge deıin sý únemdep, ol sý Soltústik Aralǵa jiberilgenin de aıta ketken jón. Jyl basynan beri Qyzylorda oblysynyń kólder júıesine 4,7 mlrd tekshe metrden astam sý jiberildi, (byltyr shamamen 4,3 mlrd tekshe metr).
«Biz árqashan sý resýrstaryn bólýde ekonomıkanyń qajettilikteri men sý nysandarynyń ekojúıesin qoldaý arasyndaǵy durys tepe-teńdikti izdeımiz. Bıyl sharýalarǵa jáne basqa da sý paıdalanýshylarǵa keri áserin tıgizbesten úlken jáne shaǵyn sý aıdyndaryn saqtaý-qalpyna keltirý boıynsha úlken jumys atqaryldy. Mysaly, ótken sýarý kezeńinde sharýa qojalyqtaryna shamamen 11 mlrd tekshe metr sý berildi. Bolashaqta bul baǵyttaǵy jumys jaqsarady. Onyń ishinde sýdy saýatty basqarý jáne tutynýǵa basymdyq beretin jańa normatıvtik-quqyqtyq baza qurý esebinen de nátıjege jetýge nıettimiz», dedi sala mınıstri Nurjan Nurjigitov.
