«Assambleıa quramasy» – sahnada memlekettik tilde ǵana óner kórsetemiz degen maqsatpen qurylǵan. Bul – Assambleıanyń «Memlekettik til – etnosaralyq qatynas tili» jobasynyń bir bóligi.
Túri basqa bolǵanymen tili bir, tilegi ortaq etnos ókilderinen quralǵan komandanyń qatarynda ózbek, koreı, slavıan jáne qyrǵyz jastary bar. Olar bir sahnada qoǵamdaǵy túıtkildi máselelerdi astarly ázilmen jetkizedi. О́nerpazdary – elimizdiń ár óńirinen jınalǵan jastar.
«Assambleıa quramasy» komandasynyń kapıtany retinde «Qazaqstan KVN Odaǵy» respýblıkalyq jastar qoǵamdyq birlestiginiń Astana qalasy KVN ókildiginiń basshysy Fýrhat Kýrbanovtyń tańdalýy da beker emes. Qaıbir isti bastaýdyń ózindik qıyndyǵy bar. О́zine artqan úmitti aqtaǵan Fýrhat Kýrbanov iskerligimen kózge túsip, Assambleıanyń quramasyn jasaqtaýǵa atsalysyp keledi. Ol jan-jaqtan kózge túsip júrgen qabiletti jastardy komandaǵa shaqyryp, bir shańyraq astyna jınady, áli de talantty qyz-jigitterdi iriktep, jol siltep júr.
«Astanadan Denıs Romanov, Rahat Batyrhan, Qyzylordadan Álibı Basarov, Aqtaýdan Andreı Peredelskıı, Jetisýdan Ekaterına Podgornova, Túrkistannan Beksultan Joldyqojaev «Assambleıa quramasynyń» aınasyna aınaldy. О́nerimen qatar barlyǵy da memlekettik tildi jetik meńgergen. Eń bastysy qurmetpen qaraıdy. Osy qasıetteri komandany alǵa jetelep, ózgelerden erekshelendirip turady», deıdi komanda kapıtany.
Árbir jeńis pen qýanyshqa komanda músheleriniń úlesi bar. Komandanyń jetekshisi Álibı Basarov Qyzylorda oblysy Qoǵamdyq damý basqarmasy «Jastar resýrstyq ortalyǵynyń» dırektory bola júrip, árbir oıynǵa janashyrlyqpen qatysyp, baryn salyp oınaıdy. Sahnada 15 jyldyq tájirıbesi bar ónerpazdyń «Assambleıa quramasyna» kelýi de kezdeısoqtyq emes.
«Kúlki ómirdiń bir bólshegi ǵoı. Ásirese ol qoǵamdaǵy kúrdeli máselelerdi ázilmen bere bilse... Degenmen ol sheberlik pen joǵary biliktilikti qajet etedi. Eń bastysy kúldiremin dep búldirip almaý kerek», deıdi Á.Basarov.
Al «Spectrum halyqaralyq mektebiniń» qazaq tili muǵalimi qyzmetin atqaratyn Denıs Romanov oqýshy kezinde «Myń bir el» is-sharasy aıasynda etnos ókilderi arasynda «Jaıdarman» oıyny ótip, sol básekede úzdik oıynshy atanady. Kózge túsken talantty jigitti birden «Assambleıa quramasy» shaqyrady.
«Meniń ómirim kóńildi tapqyrlar klýbymen baılanysty sekildi. 10-synypta alǵash ret kóńildi tapqyrlar klýbynda oınadym. Sodan beri qol úzgen emespin. 2019-2024 jyldar aralyǵynda Pavlodar bilim-ınnovasııa lıseıinde eńbek etip júrgenimde oqýshylardan komanda jınap, olardyń avtory-jetekshisi boldym. Osy jyly «Spectrum» mektebinde túrli etnostardan quralǵan komanda jasaqtadym. Olar aımaqtyq Kóńildi tapqyrlar lıgasynda óner kórsetti», deıdi óz jetistikterimen bólisken D.Romanov.
Komandadaǵy «arpa ishindegi bir bıdaı», sahnalyq laqap aty «Sary qyz» atanyp ketken Ekaterına Podgornova – Taldyqorǵan qalasynyń týmasy. Qazir Ilııas Jansúgirov atyndaǵy Jetisý ýnıversıteti janyndaǵy kolledj stýdenti. 2022 jyly Jezqazǵan qalasynda ótken «Jaıdarman» oıyndarynda Jetisý oblysynyń «Assambleıa jastary» músheleri birinshi oryn alady. «Sary qyz» sol oıynda kózge túsip, «Assambleıa quramasyna» qabyldanady.
«Men Jetisý oblysyndaǵy kishkene ǵana Abaı aýylynda óstim. Qazaq mektebinde oqydym, dostarym, kórshilerim, tanystarym túgel qazaqtar boldy. Sondyqtan meniń qazaqsha sóılemeýim múmkin emes edi», deıdi E.Podgornova memlekettik tilge degen súıispenshiligin bildirip.
Qurama ishinde «Maloı» sahnalyq ázil atymen tanylǵan Andreı Peredelskııdiń de ózindik orny men kórermeni bar.
«Qazaq tiliniń ázildesýge yńǵaıly sóz oramdary jeterlik. Maǵan sahnada oınaý da, kórermendi kúlkimen qýantý da unaıdy», deıdi ol.
Alda talaı alaman bar. «Jaıdarman» úzdikteri «Assambleıa qurama» komandasynyń qataryn tolyqtyrýdy josparlap otyr. «El ishi – óner kenishi» degen máteldi negizge alǵan komanda óńirlerge shyǵyp, talantty jastar arasynda oıyndar uıymdastyryp, bolashaq komanda múshelerin iriktemek.
«Ázil álemine úkilep darabozdaryn qosqan Assambleıa memlekettik tildi etnos ókilderi arasynda damytýǵa kúsh sala beredi. Al «Assambleıa quramasynyń» jeńisti de jemisti kúnderi áli alda!», deıdi komanda jetekshisi Á.Basarov.
Rasynda, kúlkiniń qoǵam ómirinde atqarar paıdasy kóp. Máselen, qazirgi ýaqytta ázilqoılar men tapqyrlardyń ordasyna aınalǵan «Jaıdarman» naǵyz jas daryndylardyń mekeni bolyp keledi. Joba jastar arasynda kreatıvti platformalardyń birine aınalǵan.
