Býmakól aýyldyq okrýgine qarasty Oblavka aýyly shaǵyn bolǵanymen, shekaranyń irgesinde turǵan strategııalyq eldi meken. Memlekettik shekara dál aýyl janynan aǵatyn Jaıyq ózeni arqyly ótedi. Osydan 10 jyl buryn respýblıka qazynasynan qomaqty qarjy bólinip, ózenniń jyl saıyn sý qulatyp kele jatqan jaǵalaýy bekitilgen edi. Aýylda 228 eresek turǵyn bar. Jaqynda munda jańa medısınalyq pýnkt paıdalanýǵa berildi. Jańa nysan qurylysyna 160 mln teńge jumsalǵan. Joba «Aýylda densaýlyq saqtaýdy jańǵyrtý» baǵdarlamasy aıasynda júzege asty. Qurylys-montaj jumysy bıylǵy qyrkúıek aıynda ǵana bastalsa da, merdiger «Ýralskstroıınvest» kompanııasy medısınalyq pýnktti az ýaqyt ishinde sapaly etip salyp shyqty.
– Bizdiń buǵan deıin paıdalanyp kelgen ǵımaratymyz 1950-jyldary salynǵan kóne úı edi. Qazir kirip otyrǵan jańa ǵımaratymyzdyń aýmaǵy 155 sharshy metr. Munda dárigerge deıingi qaraý, em-shara, fızıoterapııalyq kabınetter, tehnıkalyq burysh bar. Qajetti qural-jabdyq daıyn. Shtatta medbıke, tehnıkalyq qyzmetker, kúzetshi, eki qazandyq operatory jumys isteımiz. Aýyl turǵyndarynyń densaýlyǵy udaıy nazarymyzda. Dál qazir aýylda bir jasqa deıingi 2 bala, 14 jasqa deıingi 48 bala bar. Biz bul jerde naýqastardy qabyldap, tekserip, fýnksıonaldyq mindetterimizge kiretin em-sharalardy júrgizemiz, – deıdi medbıke Gúlnár Temirǵalıeva. 40 jylǵa jýyq eńbek ótiliniń 35 jylyn osy aýylda medbıke bolyp ótkergen Gúlnár Temirǵalıqyzy – óz isiniń jetik mamany.
Aýyldaǵy jańa nysannyń ashylý saltanatyna Bórli aýdany ákiminiń orynbasary Muqtar Nurmaqov qatysyp, jańa medısınalyq pýnkttiń el ıgiligine qyzmet etýine tilek bildirdi. Aýyl turǵyndary atynan sóz alǵan Meıram Tataev memleket tarapynan jasalyp jatqan san salaly qamqorlyqtar úshin alǵys aıtty.
Sol kúni Bórli aýdanyndaǵy Aqsý aýyly turǵyndary da dál osyndaı sý jańa medısınalyq pýnktke ıe bolyp, qýanyshqa bólendi. Aqsý aýyldyq okrýgine qarasty Aqsý, Jańaqonys aýyldarynda 510 adam turady. Endi olar bas aýyryp, baltyr syzdasa aýdanǵa sabylmaı, jeńil-jelpi syrqat bolsa óz aýylynda sapaly em alady. Aýylǵa bıyl ǵana joldamamen kelgen medbıke Gúlnár Ǵusmanovaǵa qyzmettik páter berilgen. Jas mamanǵa alańsyz qyzmet etetin barlyq jaǵdaı jasalǵan.
– Bizdiń Bórli aýdanynda «Aýylda densaýlyq saqtaýdy jańǵyrtý» ulttyq jobasy óte jaqsy júzege asyp keledi. Byltyr ǵana Aqsaı qalasynyń irgesindegi Araltal shaǵyn aýdanynda ambýlatorııa paıdalanýǵa berildi. Bıyl kúzden beri Qaraǵandy aýylynda feldsherlik-akýsherlik pýnkt, Jańaqonys, Oblavka, Aqsý aýyldarynda ambýlatorııa iske qosyldy. Bul jumys bolashaqta da jalǵasady. Buǵan qosa aýylda turatyn medısına qyzmetkerleri úshin «Sobol» markaly 6 avtokólik berildi, – deıdi Bórli aýdandyq aýrýhanasynyń dırektory Altynaı Baımuratova.
Batys Qazaqstan oblysy
