О́ndiristi órkendetý kerek

Premer-Mınıstrdiń birinshi orynbasary B.Sa­ǵyntaev jumys saparymen Ońtústik Qazaqstan oblysyna kelip, ortalyq memlekettik organdar, ulttyq kompanııalar jáne óńirdiń iri óndiris oryndary basshylarynyń qatysýymen jergilikti mazmundy damytý jáne bıznestiń áleýmettik jaýapkershiligi máselelerine arnalǵan jıyn ótkizdi. Jıynda sóz alǵan B.Saǵyntaev otandyq bıznesti qoldaýda ult­tyq kompanııalardyń taýarlar men qyzmetterdi satyp alýda jer­gilikti mazmunnyń úles sal­ma­ǵyn arttyrý baǵytynda Úkimet tarapynan aýqymdy jumys­tar atqarylyp jatqanyn málimdedi. «Bul óz kezeginde otandyq kásip­oryndardyń damýyna, qýa­tyn arttyrýǵa jáne shyǵaratyn ónim túrlerin kóbeıtýge, eń bas­tysy, jumys oryndaryn saq­tap qalýǵa múmkindik beredi. Ju­mys oryndaryn saqtap qalý – bul Memleket basshysynyń ákim­derge júktep otyrǵan negizgi tap­syrmasy» dedi B.Saǵyntaev. Áńgime barysynda Baqyt­jan Saǵyntaev álemdik daǵda­rys­tyń alǵashqy tolqynyn «Ju­mys­pen qamtý-2020» sııaqty baǵdarlamalardyń arqasyn­da jurtshylyqtyń onshalyq­ty sezinbegenin, onyń paıdaly­lyǵyn eńbektegen baladan eńkeıgen qartqa deıin bilgendigin aıtty. Alaıda, munaı baǵasynyń túsýi, Reseıge baǵyttalǵan geosaıasat bıýdjetti qaıta eseptetip, orynsyz shyǵyndardyń azaı­tyl­ǵanyn, qıyn jaǵdaıda kórpege qaraı kósilý qajettigin alǵa tartty. Elbasynyń byltyrǵy qara­shada jarııalaǵan «Nurly Jol – bolashaqqa bastar jol» Jol­daýyndaǵy jeti baǵyt boıynsha atqarylyp jatqan jumystardyń negizgilerin atap ótti. Jıyn qorytyndysynda Ońtústik Qazaqstan obly­synyń ákimdigi men «Qazatom­prom», «Qazaqtelekom», «Qaz­­Mu­naıGaz», «Samuryq Energo» AQ-tar arasynda jergi­likti mazmundy damytý jónin­de memorandýmdarǵa qol qoıyldy. Jalpy, osy óńirde jergilikti mazmundy damytý sheńberinde quny 61 mlrd. teńgeni quraıtyn memorandýmdar bekitildi. Jumys oryndaryn saqtap qalý jáne óndiristik prosesterdi turaqtandyrý maqsatynda Ońtústik Qazaqstan oblysynyń ákimdigi men óńirdegi iri óndiris oryndary, onyń ishinde «Qazatomprom», «Kentaý transformator zaýyty» AQ, «PetroQazaqstan OılProdakts», «Standart sement» JShS, t.b. arasynda memorandýmdar túzildi. Tutastaı alǵanda, osy baǵyttaǵy ju­mys­tardyń nátıjesinde oblysta 50 myń jumys oryndaryn saqtap qalýǵa arnalǵan 1057 memorandýmǵa qol qoıyldy. Aıta ketsek, oblys ákimdigi tarapynan 2014 jyly óńirdegi kásiporyndardy qoldaýǵa arnalǵan is-sharalar jospary bekitilip, jyl sońyna qaraı óndiris óniminiń kólemin 104,5 paıyz arttyrýǵa nemese 650 mlrd. teńgege jet­kizýge múmkindik týdy. Bul res­pýblıkadaǵy úshinshi kórsetkish bolyp tabylady. Qolǵa alynǵan sharalardyń tıimdiligi eskerilip, oblys ákimdigi dál osyndaı qujatty 2015 jyly da qabyldap otyr. Qazirgi tańda óńirdegi óndiris oryndarynda kezdesip otyrǵan túıtkildi túıin­derdi der kezinde sheship otyrý úshin jumysshy toby qurylǵan. Búgingi tańda Ońtústik Qazaq­stan oblysy elimizdegi qýatty ındýstrııaly ortalyq­tardyń birine aınalyp keledi. Indýstrııalandyrý kartasy aıasynda quny 1,2 trln. teńgeni quraıtyn 223 joba iske asyrylýda, olardyń 65 paıyzy aýyldyq jerde júzege asyp keledi, dedi B.Saǵyntaev. Baqtııar TAIJAN, «Egemen Qazaqstan». ShYMKENT.