Orta dálizdiń Jezqazǵan men Qaraǵandy arasyndaǵy maqsatty bóligine aıtarlyqtaı qarjynyń salynýy nátıjesinde TRACE jobasy ulttyq jáne jergilikti kólik baılanystaryn aıtarlyqtaı jaqsartpaq. Sonymen qatar saýda baǵyttaryn da ońtaılandyra túsedi. Klımattyń ózgerýine qolaıly tózimdilik tanytatyn mundaı jobalar jergilikti azamattar úshin óte paıdaly bolmaq. Sebebi jumys orny men qyzmetterge degen qoljetimdilik ájeptáýir jeńildeıdi. Ulytaý men Qaraǵandy oblysyndaǵy ekonomıkalyq ósim oń nátıje kórsete bastaıdy.
Dúnıejúzilik banktiń Qazaqstandaǵy turaqty ókili Andreı Mıhnevtiń aıtýynsha, joba klımat ózgerisin basty nazarǵa alady jáne jol qurylysy men oǵan qyzmet kórsetý boıynsha ınnovasııalyq sheshimderdi engizedi. Jol qurylysyna aldyńǵy qatarly materıaldar paıdalanylady, sonymen birge, qar men burqasynǵa qalqan bolar qurylystar turǵyzylyp, sý tasqynynyń aldyn alatyn sharalar da qarastyrylady.
TRACE jobasy jobaǵa áıelderdiń qatysýyn da qamtamasyz etpek. Olarǵa jol sektorynda jumys orny men tájirıbeden ótý múmkindigin usynyp, kásibı teńsizdikti tómendetýge kúsh salady.
«Infraqurylymǵa ınvestısııalarmen qatar, jobanyń qyzmeti kelisimsharttar men tehnıkalyq qyzmet kórsetýdiń tıimdiligin ońtaılandyrýǵa, sondaı-aq jeke ınvestısııalardy tartýdy kózdeıtin reformalarǵa baǵyttalǵan. Joba sonymen qatar ósip kele jatqan kólik quraldarynyń shyǵaryndylarynan týyndaıtyn máselelerdi sheshýge jáne turaqtylyq pen qaýipsizdikke baǵyttalǵan joldardy jobalaýdyń zamanaýı standarttaryn ázirleýge negizdelgen», deıdi joba daıyndyǵy tobynyń jetekshisi Nıdjat Valıev.
Bastamany Úkimettiń memlekettik kepildigin ala otyryp «Qazavtojol» ulttyq kompanııasy júzege asyrmaq. Dúnıejúzilik bank pen Azııa ınfraqurylymdyq ınvestısııa banki birlese atqaratyn jobany 2032 jyldyń 30 maýsymynda aıaqtaý josparlanyp otyr.
