foto: Aqorda
Máýlen Áshimbaev úshinshi sessııa bastalǵannan beri Parlamenttiń 28 zań qabyldaǵanyn, onyń beseýine depýtattardyń bastamashy bolǵanyn jetkizdi. Atap aıtqanda, Prezıdent joldaýlary men tapsyrmalaryn júzege asyrý maqsatynda turǵyn úı saıasatyna, bilim berý jáne balalar quqyǵyn qorǵaýǵa, bilim salasyndaǵy jınaqtaý júıesine, bırja saýdasy men kásipkerlikke, sot júıesin reformalaý men esirtkiniń zańsyz aınalymyna qarsy kúreske qatysty zańdar qabyldanǵan.
Qazir Parlamentte jumysshylardyń eńbek quqyqtaryn qorǵaý, kreatıvti ındýstrııany qoldaý, orman sharýashylyǵy jáne erekshe qorǵalatyn tabıǵı aýmaqtar jónindegi zań jobalary qaralyp jatyr. Bul – senatorlardyń bastamasymen qolǵa alynǵan qujattar.
Spıkerdiń aıtýynsha, jyl basynan beri Senatta 50-ge jýyq is-shara ótkizilgen, senatorlar Úkimetke 67 depýtattyq saýal joldaǵan. Sonymen qatar parlamentaralyq yntymaqtastyqty keńeıtý aıasynda 40-tan astam halyqaralyq kezdesý uıymdastyrylǵan.
Máýlen Áshimbaev kelesi jyly joǵary Palatada Bıýdjet, Qurylys, Sý, Salyq kodeksteri, «Túrkistan qalasynyń erekshe mártebesi týraly» jáne «Tutynýshylardyń quqyǵyn qorǵaý týraly» zańdar qaralatynyn aıtty. Sondaı-aq Jumysshy mamandyqtary jylyna arnalǵan parlamenttik tyńdaýlar ótkizý josparlanyp otyr.
Budan bólek, Qasym-Jomart Toqaevqa Qazaqstannyń ornyqty damý salasyndaǵy ulttyq maqsattary men mindetterin iske asyrýdy monıtorıngteý jónindegi Parlamenttik komıssııanyń jumysy týraly aqparat berildi. Atalǵan komıssııa Memleket basshysynyń tapsyrmasymen qurylǵan bolatyn.
Senat tóraǵasy Prezıdenttiń óńirlerdi odan ári damytý jóninde júktegen mindetterin Palatanyń basymdyq beretin baǵyttarynyń biri ekenin atap ótti. Bul rette Senat máslıhattar depýtattarymen jumysty jandandyra túsken.
Kezdesý sońynda Máýlen Áshimbaev Qasym-Jomart Toqaevqa Álemdik jáne dástúrli dinder lıderleriniń VIII sezine daıyndyq barysyn baıandady. Atalǵan jıyn 2025 jyldyń qyrkúıek aıyna josparlanyp otyr.
