Mańǵystaý oblysynyń ákimi Nurdáýlet Qılybaıdyń málimetinshe, ushaq apaty bolǵan jerde 22 jedel járdem brıgadasy jáne 6 AMO (Apattar medısına ortalyǵy) brıgadasy jumys istedi. Oblystyq kópsalaly aýrýhanada 30 hırýrgııalyq jáne travmatologııalyq, sondaı-aq 10 reanımasııalyq tósek-oryn daıyndaldy.
Jalpy, aýrýhanalarǵa 29 zardap shekken adam jetkizildi. Onyń ishinde Mańǵystaý oblystyq kópsalaly aýrýhanasyna 27 adam tústi. Olardyń 13-i Ázerbaıjan, 9-y Reseı, 3-eýi Qyrǵyzstan azamattary. Úsh adamnyń jeke basy anyqtalyp jatyr. Sondaı-aq oblystyq balalar aýrýhanasynda eki kámeletke tolmaǵan bala bar.
Barlyq naýqastar tolyq kólemde medısınalyq kómekpen qamtylǵan.
Qanat Bozymbaev jaýapty tulǵalarǵa sapaly emdeý men tıisti kútimdi qamtamasyz etýdi tapsyrdy. Sondaı-aq Aqtaýǵa eldiń jetekshi ǵylymı medısınalyq ortalyqtarynan reanımatologtar, travmatologtar, hırýrgter, kombýstıologtar jáne basqa da joǵary bilikti mamandar toby kelgenin habarlady.
Odan keıin Qanat Bozymbaev Ázerbaıjannan kelgen úkimettik delegasııamen kezdesti. Vıse-premer Tótenshe jaǵdaılar mınıstri Kamaleddın Geıdarovpen jáne Sıfrlyq damý jáne kólik mınıstri Rashad Nábı oǵly Nábıovpen kelissózder júrgizdi.
Ázerbaıjan úkimettik delegasııasynyń ókilderi kórsetilgen kómek úshin Qazaqstan halqyna alǵys bildirdi.
Mańǵystaý oblysy
