Soltústik Qazaqstanda kóktemde sý basyp qalý qaýpi bar

PETROPAVL. 4 aqpan. Qardyń kóp túsýine baılanysty bıyl Soltústik Qazaqstan oblysy aýmaǵynda kóktemgi sý tasqyny jyldyq ortasha kórsetkishten joǵary bolýy múmkin. Turǵyndardy, nysandardy jáne aýmaqtardy maýsymdyq sý tasqynynan qorǵaýǵa arnalǵan tótenshe jaǵdaılardyń aldyn alý jáne joıý jónindegi komıssııa májilisinde osyndaı boljam jasaldy. Bul týraly oblystyq tótenshe jaǵdaılar jónindegi departamenttiń baspasóz qyzmeti habarlady. Oblys ákiminiń orynbasary Vladımır Býbenko kóktemgi sý tasqyny kezinde oıpańdaǵy 18 eldi mekendi, 302 shaqyrym avtomobıl joly men 20 shaqyrym temir joldy sý basý múmkindigin joqqa shyǵarmady. Oblys aýmaǵynda 25 gıdrotehnıkalyq qurylys bar. Olardy kúrdeli jóndeýge respýblıkalyq jáne jergilikti qazynadann 347,388 mıllıon teńge bólindi. Birqatar sý qoımalaryna, Esil ózenine, gıdrotehnıkalyq qurylystarǵa turaqty túrde monıtorıng júrgiziledi. Maýsymdyq sý tasqyny sharalaryna jergilikti atqarýshy organdardyń bıýdjetinen 349,408 mıllıon teńge qarastyrylǵan. Aımaq basshysy Erik Sultanov kóktemgi sý tasqynyna baılanysty keshendi sharalardy júzege asyrý, eldi mekenderdi sý basý saldarynyń shyǵyndaryn barynsha azaıtý, aǵyndy sý ótetin qubyrlardy, ótkelderdi, jyralardy qardan, kóń-qoqystan tazartý, tótenshe jaǵdaılardy joıý úshin ınjenerlik jáne jol-qurylysy tehnıkalaryn ázirleý, sý qoımalaryna baqylaý jasaý, avtomobıl jáne temir joldardyń buzylýyna jol bermeý, ınertti materıaldardyń qajetti qoryn jasaý jóninde naqty tapsyrmalar berdi. О́mir Esqalı. Derek: Soltústik Qazaqstan oblystyq tótenshe jaǵdaılar jónindegi departamenttiń baspasóz qyzmeti. Sýret: bnews.kz.