Sýretterdi túsirgen – avtor
Dástúrge aınalǵan búrkitshiler saıysy bıyl da halyqaralyq deńgeıde uıymdastyrylyp, Ulan aýdanyna qarasty Bozanbaı aýylynyń kóginde qyran samǵap, tósinde tazy júgirdi. Shabandoz jigitter asaý minip, aýyzdyqpen alysty. Ult rýhanııatyn ulyqtaǵan tartysty dodaǵa Qytaı, Mońǵolııa, Majarstan, Qyrǵyz Respýblıkasy men Reseı Federasııasynyń qusbegileri qatysty. Osyndaǵy qyzyqty sátti qalt jibermegen fotojýrnalıster aýqymdy sharanyń núktesin qoıǵandaı boldy búgin. Molbertke qaz-qatar tizilgen fotosýretterge kóz júgirtseńiz, birinde qusbegi bala bolsa, endi birinde tazysyn ertip ańǵa shyqqan aqsaqal kadrǵa ilingen. Shúrippeni dóp basqan fotograftar qaıtalanbas sátterdi beınelegen. Tipti qoıanǵa túse bergen búrkitke deıin ap-anyq tartylǵan. Úreıli qoıan, tegeýrindi búrkit. Qoıan úshin sońǵy dem bolsa, qyran úshin olja.
– Kórme ótkizýdiń sáti bıyl túsken eken. Áıtpese jylda josparlaıtynbyz. Mundaǵy maqsat sýretterimizdi áleýmettik jelide ǵana emes, úlken formatta kórermenge usynǵymyz keldi. Onyń ústine, neshe jyl ótse de, «Shyǵys salbýryny» festıvalin kórmegender bar eken. Solar kórmege kelip, tańdanystaryn bildirip jatyr, – deıdi fotojýrnalıst Aıaýjan О́teýlınova.
Festıvaldiń ótýine muryndyq bolǵan qusbegiler de ortamyzdan tabyldy. Bozanbaı aýylynyń turǵyny Marks Najıtban qusyn kóterip, qyzyn ertip, kórmeni tamashalaýǵa kelipti. Kishkentaı qyzy Aızere de qansonarda qus ushyryp júrgen naǵyz búrkitshi. Tipti búrkittiń uıasyna túsip, balapandaryn da alǵany bar.
Qaıta jańǵyrǵan qusbegilik ónerdi nasıhattap júrgen fotojýrnalısterdiń erekshe kórmesin tamashalaımyn degenderge, kitaphana esigi aıqara ashyq.
Shyǵys Qazaqstan oblysy
