Soltústik Qazaqstanda astyq satyp alýǵa 4 mlrd. teńge bólindi

PETROPAVL. 4 aqpan. Aýyl sharýashylyǵy taýaryn óndirýshilerdiń aımaqtyq keńesinde «Astyq korporasııasy» AQ-nyń jergilikti ókilderi astyq satyp alýǵa 4 mıllıard teńgeniń bólingenin málimdedi. Bul týraly oblystyq aýyl sharýashylyǵy basqarmasynyń baspasóz qyzmeti habarlady. Byltyr jaz, kúz maýsymdary óte jaýyn-shashyndy bolyp, egin kesh pisti. Sonyń saldarynan astyq shyǵymy men sapasyna eleýli nuqsan keldi. Tabıǵattyń tosyn minezinen birqatar sharýashylyqtar zııan shegip, memleket aldyndaǵy qaryzyn óteı almaı otyr. Sharýashylyqtardyń kompanııa aldyndaǵy qaryzy 234 mıllıon teńgeden asady. Olar kelisim boıynsha mindettemelerin 2014 jyldyń 1 jeltoqsanyna deıin oryndaý tıis bolatyn. Jaǵdaıdyń óte kúrdeli bolǵanyn eskerip, shart merzimi uzartyldy, deıdi kompanııa ókili Ǵanı Ábenov. Onyń aıtýynsha, kóktemgi egis jumystaryn oıdaǵydaı ótkizýge Úkimet tarapynan barlyq múmkindikter jasalǵan. Qajetti qujattardy jınastyrý jeńildetilgen. Endi jańa talap boıynsha taýar óndirýshi óz mindetin astyqpen ǵana óteı alady. Al aýa raıy sebebinen qıynshylyqqa urynǵan jaǵdaıda qaryzdy aqshalaı qaıtarý jaǵy da eskerilgen. О́mir Esqalı. Derek: Soltústik Qazaqstan oblystyq aýyl sharýashylyǵy basqarmasynyń baspasóz qyzmeti. Sýret: «QazAqparat».