Palata spıkeri spektakl men jazýshynyń jalpy shyǵarmashylyǵy otbasyn saqtaý, bardy baǵalaý sııaqty adamgershilik qundylyqtardy dáripteıtinin atap ótti. Tálimi men taǵylymy eshqashan eskirmeıtin, sol arqyly áli talaı býynǵa ónege beretin mundaı týyndylar ulttyq ádebıettiń jáne mádenıettiń qundy qazynasy ekeni anyq.
Aıta keteıik, «Gaýhartas» mýzykalyq dramasy – «UMAI-2023» ulttyq syılyǵynyń «Teatr óneri» atalymy boıynsha «Úzdik spektakl» atanǵan alǵashqy qoıylym. Spektakldiń qoıýshy rejısseri – Qazaqstannyń eńbek sińirgen qaıratkeri, Mýzykalyq jas kórermender teatrynyń dırektory, bilikti ustaz Ashat Maemırov.
Dýlat Isabekovtiń «Gaýhartas» povesi 1967 jyly jazylǵan. Shyǵarmada otbasylyq qundylyqtyń mańyzy jáne áıeldi qurmetteý sııaqty qazirgi kezde de óte ózekti sanalatyn taqyryp qozǵalady.
Astana qalasy ákimdiginiń Mýzykalyq jas kórermen teatry «Gaýhartas» mýzykalyq dramasyn sahnalaǵan bir jyl on aıdyń ishinde halyqtyń kózaıymyna aınalyp, kórermen nazaryna 250 márte usynylyp, Qazaqstan men Eýrazııanyń teatr keńistiginde rekordtyq kórsetkishke qol jetkizdi. Spektakldiń ár qoıylymy anshlagpen ótip, búgingi tańǵa deıin 100 myńnan asa kórermen tamashalady.
Qoıylym elordamyzdan bólek Almaty, Aqtaý, Atyraý, Oral, Taldyqorǵan, Taraz, Shymkent, Túrkistan, О́skemen, Semeı, Jańaózen qalalarynda, sonymen qatar Baıanaýyl, Oıyl, Syrym, Qaratóbe aýdandarynda kórsetilgen edi. Buǵan qosa Astana qalasynyń Máskeýdegi mádenıet kúnderi aıasynda Máskeý memlekettik «Drama óneriniń mektebi» teatrynda kórsetildi.
