Densaýlyq saqtaý mınıstri Aqmaral Álnazarova «Qazaqstan Respýblıkasynyń keıbir zańnamalyq aktilerine densaýlyq saqtaý salasyndaǵy normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister engizý týraly» zań jobasy Prezıdenttiń «Memlekettik apparat qyzmetin bıýrokratııalandyrý jónindegi sharalar týraly» Qaýlysy negizinde ázirlengenin aıtty. Túzetýler artyq ákimshilik retteýdi azaıtýǵa múmkindik beredi.
– Osylaısha, memlekettik organnyń sheshimderdi qabyldaý jáne qabyldaý úderisin jedeldetý, onyń ishinde tıisti tártipti aıqyndaıtyn normatıvtik quqyqtyq aktilerdi ázirleý kezinde ókilettikterin keńeıtý arqyly asa mańyzdy qoǵamdyq qatynastardy jedel júzege asyrý múmkindigi paıda bolady. Densaýlyq saqtaý salasyndaǵy artyq ákimshilik retteýdi qysqartýǵa jáne densaýlyq saqtaý salasyndaǵy rásimderdi jeńildetýge baǵyttalǵan normalardy debıýrokratızasııalaýǵa jol ashylady, – dedi mınıstr.
Memlekettik organnyń arnaıy quzyretteri men ózge de naqtylaıtyn normalary budan bylaı zańǵa táýeldi aktiler deńgeıinde belgilenedi, memlekettik organdardyń zańnamalyq normalardy iske asyrý jónindegi ókilettikteri jazylady.
Depýtattar túrkitildes memleketterdiń yntymaqtastyq keńesin qurý týraly Nahchyvan kelisimine ózgerister engizý jónindegi hattamany ratıfıkasııalady. Kelisimge memleket basshylary 2022 jyly 11 qarashada Samarqand qalasynda qol qoıǵan edi. Syrtqy ister mınıstriniń orynbasary Álibek Baqaev negizgi kelisimge 10 ózgeris engizý qarastyrylǵanyn, onyń biri uıymnyń ataýy men nysanyn ózgertýge baǵyttalǵanyn atap ótti.
– Hattamanyń baptarynda negizgi kelisimniń ataýyn «Túrki memleketteri uıymyn qurý týraly Nahchyvan kelisimi» dep ózgertý, «Túrki memleketteri uıymy» dep atalatyn tolyqqandy halyqaralyq uıym qurý kózdelgen. Sondaı-aq túrki ıntegrasııasy sheńberindegi uıymdardy eki sanatqa bólý qarastyrylady: sabaqtas organdar retinde TÚRKSOI men TúrkPA aıqyndalyp, úlestes uıymdar retinde Túrki akademııasy men Túrki mádenıeti jáne murasy qory kórsetildi, – dedi Á.Baqaev.
Májilis depýtaty Iýlııa Kýchınskaıa hattamany ratıfıkasııalaý Qazaqstan Respýblıkasy úshin baýyrlas halyqtarmen ózara tıimdi qarym-qatynastyń jáne elimizdiń túrki álemindegi kóshbasshylyq ustanymyn nyǵaıtýdyń berik negizi bolatynyna nazar aýdardy.
Budan soń depýtattar 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Eýrazııalyq ekonomıkalyq odaqqa múshe memleketterdiń arasynda kedendik ákelý bajdarynyń somalaryn aýdarýǵa qatysty bólikte ózgerister engizý týraly hattamany ratıfıkasııalady.
Ulttyq bank tóraǵasy Tımýr Súleımenov hattamada Eýrazııalyq ekonomıkalyq odaq týraly shartqa Reseı Federasııasymen jáne Belarýs Respýblıkasymen kedendik bajdar boıynsha esep aıyrysýdy eki jyl merzimine Reseı rýblimen aýdarý jónindegi ózgerister engizilgenine toqtaldy. Depýtat Marhabat Jaıymbetov óz baıandamasynda ýaqytsha mehanızm engizýdiń sebebi Reseı men Belarýspen AQSh dollarymen esep aıyrysýdan bas tartý ekenin atap ótti. Ýaqytsha ózgerister engizý EAEO elderiniń bıýdjetterine keden bajdaryn úzdiksiz aýdarýdy qamtamasyz etýge múmkindik beredi.
Jalpy otyrysta «Túrkistan qalasynyń erekshe mártebesi týraly» zań men oǵan ilespe túzetýler ekinshi oqylymda qabyldandy. Zań Memleket basshysynyń tıisti tapsyrmasyn oryndaý maqsatymen ázirlengen.
– Túrkistan qalasyna erekshe mártebe berýdiń negizgi maqsattary, mindetteri men qaǵıdattary aıqyndalady, Túrkistan qalasynyń aýmaǵynda tarıh jáne mádenıet eskertkishterin qorǵaý qamtamasyz etiledi; ortalyq memlekettik organdardyń, sondaı-aq Túrkistan qalasynyń jergilikti ókildi jáne atqarýshy organdarynyń ókilettikterin qaıtadan qarastyryp, jańa quzyret beriledi, – dedi jumys tobynyń jetekshisi Temir Qyryqbaev.
Ilespe túzetýlerde sáýlet, qurylys jáne qala qurylysy qyzmetin normatıvtik retteýge jáne tarıhı-mádenı mura eskertkishterin qorǵaýǵa baǵyttalǵan 1 Kodeks pen 5 zańǵa ózgerister men tolyqtyrýlar engiziledi.
Májilis «Poshta týraly» zańǵa poshta baılanysy naryǵyn damytýǵa baǵyttalǵan parlamenttik túzetýlerdi ekinshi oqylymda qabyldady. Depýtat Ekaterına Smyshlıaeva sıfrlyq tehnologııalar arqyly tıisti pın-kod nemese kýar-kod bolǵan kezde úshinshi tulǵalarǵa poshtany qabyldap alý múmkindigi beriletinin aıtty. Sonymen qatar bul taýardy marketpleısterden poshta bólimshesine jáne úıge jetkizýdi jeńildetedi.
– Jobada sálemdemelerdi qabyldaý úshin poshtamattardy ornalastyrý jáne paıdalaný tártibi kózdeledi. Poshta ınfraqurylymyn saqtaý boıynsha normalar qabyldandy. Poshta fılıaldary jabylǵan kezde operator bul týraly jergilikti atqarýshy organdarǵa jabylǵanǵa deıin 3 aı buryn habarlaýǵa tıis. Ulttyq poshta operatory dári-dármekter men medısınalyq buıymdardy, jetkizýmen jáne saqtaýmen aınalysa alady, – dedi jumys tobynyń jetekshisi E.Smyshlıaeva.
Sondaı-aq jeke tulǵalarǵa memlekettik qoldaý sharalaryn usynýǵa arnalǵan «áleýmettik ámııanǵa» quqyqtyq mártebe beriledi. Jıynda Májilis ańshylyq salasy jáne janýarlar dúnıesin saqtaý máseleleri týraly zań jobasy men oǵan ilespe túzetýlerdi jumysqa qabyldady.
Ári qaraı depýtattar memlekettik organdarǵa ózekti áleýmettik-ekonomıkalyq máseleler boıynsha 13 depýtattyq saýal joldady.
