ASTANA. 4 aqpan. Shymkentte bes jasar bala aýyr jaraqatpen aýrýhanaǵa tústi. Bul týraly Tengrinews.kz habarlady.
Jedel járdem toby teri asty qandy isikteri bar balany jan saqtaý bólimine jetkizdi.
Agenttik tilshisine osy jaıynda aıtyp bergen oblystyq balalar aýrýhanasy bas dárigeriniń orynbasary Bolat Nusqabaev: «Bala aýyr jaǵdaıda tústi. Ol júdep ketken. Munymen qatar, onyń basynan aıaǵyna deıin qandy isigi bar. Biz «qatal qaraý sındromy, bassúıek-mı jaraqaty, mıy shaıqalǵan, denesiniń kóp bóligi kógergen» degen dıagnoz qoıdyq», - dedi.
Balanyń jaraqatyn onyń anasynyń tanystary baıqaǵany anyqtaldy. 31 jastaǵy anasy Shahnoza Abdýlıeva Shymkent qalasyndaǵy bazarlardyń birinde jumys isteıtin áıelderden balasynyń jaraqatyn qarap berýdi suraǵan. Ol balanyń qoly birtúrli kórinetinin aıtyp, biraq qaı dárigerge qaratý kerek ekenin bilmegen. Áıelder jaraly balany kórgennen keıin birden dárigerlerdi shaqyrǵan.
«Balanyń qoly kesilgen, qan aǵyp jatty, isip ketken. Aıaǵy da, keýdesi de kógerip ketipti. Biz baladan: «Muny anań jasady ma?» degen kezde ol «joq» dep jaýap berdi», - dedi anasynyń tanysy Sanabar Tájıeva.
Shahnoza Abdýlıeva Qazaqstanǵa budan 5 jyl buryn Samarqandtan kelgen. Sodan beri qaıyrshylyqpen kún kórgen. Sońǵy aıda jaqsy tanys emes áıeldiń úıinde turypty. Biraq ol kún saıyn baspananyń 3 myń teńgelik qunyn tólep júrgenin aıtady.
«Úıdiń qojaıyn áıeli tapqan tıyn-tebenimizdi túgeldeı alyp qoıady. Maǵan keıde tamaq berip júrdi, biraq kúndelikti emes. Ol meni urmaıtyn, biraq balam onyń uratynyn aıtty, aıqaılap urysatyn», - dedi Shahnoza.
Áıeldiń aıtýynsha, ol ýaqytsha turaǵynan kete almaıdy. Áıel ony eki balasymen birge úıden shyǵarmaǵan. Ol eki balanyń birin mindetti túrde alyp qalyp otyrǵan. Sońǵy ret nápaqa tabýǵa shyqqanda, Shahnoza jaraly balasyn alyp shyǵady, al bir jasar qyzy Shabonany alyp ketýge kelgende, áıel ony qýyp jiberipti.
«Sol qojaıyn qyzdy asyrap alǵanyn aıtty. Mende 4 bala bar jáne osymen beseý bolady. Shahnoza kúnimen jylap shyǵady», - deıdi Sanabar Tájıeva. Áıel óz qyzynyń anasy ekenin dáleldeı almaıdy, birneshe jyl buryn qujattary, onymen qosa balanyń da týý týraly kýáligi joǵalǵan. Endi bul qujattardy qaıta jasatý kerek. Áıeldiń tanysy «Sana-sezim» áıelder bastamalarynyń quqyqtyq ortalyǵyna alyp kelgen. Munda onymen ál-Farabı aýdandyq ishki ister bóliminiń áıelderdiń quqyǵyn qorǵaý jónindegi aǵa ınspektory men ortalyqtyń psıhologtary áńgimelesti.
«Qazir quqyq qorǵaý organdaryna aryz toltyramyz. Sebebi ol qazir - adamdar saýdasynyń qurbany, ıaǵnı ol elden shyǵarylmaıdy. Onyń Qazaqstanǵa zańsyz kelýiniń sebebin anyqtaý qajet. Onyń qujattary joq, urlandy ma, tartyp alyndy ma, aldanyp, aqsha tabýǵa mindetteldi me, - osyny anyqtaý kerek», - deıdi quqyqtyq ortalyqtyń vıse-prezıdenti Shahnoza Hasanova.
Qazirgi tańda áıelge ýaqytsha baspana beriledi, tamaqpen qamtamasyz etilip, zańgerdiń kómegi usynylady.
Shahnoza balalaryn qaıtarǵannan keıin О́zbekstanǵa qaıtyp ketpekshi.
Qurysh Nurymbet.
Derek, foto: Tengrinews.kz.
