Qasym-Jomart Toqaev jedel kómek kórsetý qurylymdary apat kezinde shuǵyl ári úılesimdi áreket etkenine nazar aýdardy.
– Apattyń saldary budan da aýyr bolýy múmkin edi. Biz buǵan jol bergen joqpyz. Adam ómirin saqtap qaldyq. Qutqarý jumystary joǵary deńgeıde júrgizildi. Qajetti aqparattyń barlyǵy jurtshylyqqa ýaqytyly berilip turdy. Iаǵnı oqıǵa boıynsha tolyqqandy málimet bárine birdeı usynyldy. Azamattarymyz alǵashqy mınýttan bastap zardap shekkenderge kómek qolyn sozdy. Halqymyz janashyrlyq, uıymshyldyq jáne shynaıy tileýlestik qasıetin kórsetti. Jurt kezekke turyp, qan tapsyrdy. Ázerbaıjan elshiligi ǵımaratyna gúl shoqtaryn qoıdy. Bul týraly elimizdiń jáne sheteldiń buqaralyq aqparat quraldary jan-jaqty málimet taratty. Qutqarýshylardyń, dárigerlerdiń jáne volonterlerdiń adal qyzmetine kúlli álem kýá boldy. Ásirese, kórshiles ári seriktes elder – Ázerbaıjan, Reseı, Qyrǵyzstan azamattary aıryqsha alǵys bildirip jatyr, – dedi Memleket basshysy.
Prezıdent Úkimetke apat saldaryn joıýǵa atsalysqan adamdardyń erligi men eńbegin laıyqty atap ótý, erekshe kózge túsken azamattardy memlekettik nagradaǵa usyný jóninde tapsyrma berdi.
Sonymen qatar Memleket basshysy Úkimettik komıssııaǵa zardap shekken shetel azamattaryna qajetti medısınalyq jáne psıhologııalyq turǵydan tolyq kómek berýdi, qaıtys bolǵan Qazaqstan azamattarynyń týǵan-týystaryna aıryqsha qamqorlyq kórsetýdi tapsyrdy.
Úkimettik komıssııa men Bas prokýratýraǵa basqa quzyretti organdarmen birlesip, ushaq apatyna jan-jaqty ári obektıvti tergeý júrgizý mindeti júkteldi. Prezıdenttiń pikirinshe, bul rette aqparattyq arandatý men feıkke jol bermeý mańyzdy.
Budan bólek, Qasym-Jomart Toqaev elimizdegi avıasııalyq qaýipsizdiktiń jaı-kúıin muqııat tekserý qajet ekenin málimdedi.
Keńes barysynda Úkimettik komıssııa tóraǵasy, Premer-Mınıstrdiń orynbasary Qanat Bozymbaev, Bas prokýror Berik Asylov, Ulttyq qaýipsizdik komıtetiniń tóraǵasy Ermek Saǵymbaev, Ishki ister mınıstri Erjan Sádenov jáne Densaýlyq saqtaý mınıstri Aqmaral Álnazarova baıandama jasady.
