О́SKEMEN. 4 aqpan. О́skemen qalasynyń ákimi Temirbek Qasymjanov oblys ortalyǵynyń Ablaketka jáne Oktıabr aýdandarynyń turǵyndarymen eseptik kezdesý ótkizdi. Bul týraly egemen.kz tilshisi habarlady.
Qala ákimi atap ótkendeı, ótken jyly atalǵan aýdandarda asfalt jabyndylary tóselip, 18 shaǵyn sáýlettik músinder ornatyldy.
Turǵyn úı-kommýnaldyq sharýashylyǵyn jańǵyrtý baǵdarlamasy sheńberinde Áýezov dańǵyly men Qazaqstan, Qaısenov, Protozanov, Krylov, Pravda, Ostrovskıı kóshelerindegi 11 úıdiń jylý jáne sý júıeleri aýystyrylyp, káriz qubyrlary, samaldyqtary men shatyrlary jóndeldi. Úılerdiń tozyǵy jetken qasbeti qalpyna keltirildi.
Krasına men Log Shmelev shaǵyn aýdandaryn sapaly sý qubyrymen qamtamasyz etý úshin jobalyq-smetalyq qujattar jasalýda. Aǵymdaǵy jyly №3 qazandyqtan «Prombaza» turǵyn úı aýdanyna deıin jylý trassasynyń qurylysy bastalady.
Oblys ortalyǵynyń kóriktendirilýin jaqsartý jáne turǵyndardyń qaýipsizdigin qamtamasyz etý maqsatynda Myza kóshesiniń boıyndaǵy zańsyz saýda núkteleri joıyldy. Dál osyndaı jumystar Býrov kóshesi men «Berezka» dúkeniniń aýmaǵynda júrgizilýde. Ruqsat etilmegen qoqys oryndary da joıyldy.
Qala turǵyndarynyń biri Elena Pogodına О́skemenniń jyl ótken saıyn óńi kirip, jańaryp, jasaryp kele jatqanyn turǵyndar ǵana emes, qonaqtar da baıqap júrgenin aıta kelip, ózi turatyn kópqabatty úıde jedelsatynyń paıdalaný merzimi ótip ketkenin, onyń qashan aýystyrylatynyn surady.
Qala basshysynyń aıtýynsha, О́skemende 560 jedelsaty qyzmet kórsetedi. Búginde 130 jedelsaty kommýnaldyq menshikke alynǵan. Onyń 71-i jóndeýden ótti.
«Bul máseleni sheshýdiń eki joly bar. Jedelsatyny bıýdjet esebinen jóndeýdi kútý kerek nemese TÚKSh jańǵyrtý baǵdarlamasy aıasynda tezirek jóndeýden ótkizip, ıgiligin kórýge bolady», – dedi Temirbek Qasymjanov.
Dýman Anash.
Derek: egemen.kz.
Sýret: О́skemen qalasy ákimdiginiń baspasóz qyzmeti.
