Foto: ashyq derekkóz
Prezıdent bul qaǵıdanyń mán-mańyzy áldeqaıda tereń ekenin jetkizdi. Iаǵnı «Zań men tártip» qaǵıdasy quqyq qorǵaý salasyna ǵana arnalǵan dep tujyrymdaǵan durys bolmaıdy.
«Men bul qaǵıdany tereńirek túsinemin. «Zań men tártip» – memlekettik qurylystyń basty qaǵıdaty. Bul rette jazalaý sharalaryn qoldaný arqyly qoǵamǵa jappaı baqylaý ornatý týraly aıtyp otyrǵan joqpyz. «Zań men tártip» qaǵıdaty – shyn máninde kemel demokratııanyń tiregi, quqyqtyq memlekettiń negizi. «Zań men tártipke» baǵynbasaq, quqyq normalaryna qurmetpen qaramasaq, Ádiletti Qazaqstandy quryp, ony órkendegen memleket ete almaımyz.
Sondyqtan bizdiń mindetimiz – bul qaǵıdatty elimizdiń qundylyqtar júıesine barynsha kiriktirip, halyq bolmysynyń, qoǵam ómiriniń ajyramas bóligine aınaldyrý», dedi Prezıdent.
Qasym-Jomart Toqaev «Zań men tártipti» berik ornyqtyrý úshin kóp ýaqyt pen kúsh-jiger qajet ekenin aıtty.
«Bári birdeı bul qaǵıdatty qatań ustanýǵa, ony ómir saltyna aınaldyrýǵa áli daıyn emes. Biraq talaptanǵan adam qalaıda muratyna jetedi», dedi Memleket basshysy.
