Zamanaýı standarttarǵa saı salynǵan akademııada fýtbolshylar jyl boıy jattyǵatyn úlken jabyq manej bar. Sondaı-aq ǵımaratta jattyǵý zaly, ońaltý jáne emdeý-saýyqtyrý kabınetteri qarastyrylǵan. Qazirgi tańda akademııada 6 men 18 jas aralyǵyndaǵy myńǵa jýyq bala fýtboldyń qyr-syryn úırenip júr. Kúnine eki ret jattyǵady.
Juldyz Súleımenova jattyqtyrýshylarmen áńgime barysynda Memleket basshysy Qasym-Jomart Toqaev Qazaqstan halqyna Joldaýynda depýtattarǵa sport salasyndaǵy zańnamany jańartýdy tapsyrǵanyn eske saldy. Prezıdent óz sózinde bul túzetýlerdiń jańa chempıondar býynyn daıyndaýǵa negiz bolatynyn erekshe atap ótken edi. Byltyr qarasha aıynda Májilis depýtattary dene shynyqtyrý jáne sport máseleleri týraly zań jobasyn alǵashqy oqylymda maquldaǵan bolatyn.
«Bul zań jobasy sporttyń basym baǵyttaryn anyqtaýdan bastap, sportshylardy daıyndaý standarttaryn jetildirýge deıingi birqatar ózekti bastamany qamtıdy. Ol buqaralyq jáne balalar sportyn damytýǵa serpin beredi. Balalarymyz – elimizdiń bolashaǵy. Al bul fýtbol akademııasy – jasóspirimderdi tárbıelep, olardyń tártip pen jaýapkershiligin nyǵaıtatyn erekshe orta», dedi J.Súleımenova.
Qazybek Álishev balalardy sportqa belsendi tartýdyń mańyzdylyǵyna toqtaldy. Onyń aıtýynsha, bul olardyń densaýlyǵy men erik-jigerin nyǵaıtyp qana qoımaı, olardy jaman ádetten saqtaýǵa kómektesedi.
«Bizdiń qoǵam nashaqorlyq, lýdomanııa, áleýmettik jeli men ınternetke táýeldilik sııaqty zulymdyq túrlerimen kúresetini jasyryn emes. Májilis depýtattary memleket, ata-analar, bıznes senim arta alatyn zańnamalyq baza qurady. Sportpen aınalysý arqyly bala zııandy ádetterden aýlaq bolady ári pikirles adamdar ujymynda qoldaý men motıvasııa tabady. Bul – energııany durys baǵytqa baǵyttaýdyń eń tıimdi joly», dedi depýtat.
Buqaralyq sportty damytý «AMANAT» partııasynyń basty nazarynda. О́tken jyly Aqtóbe oblysynda partııanyń saılaýaldy ýádeleri aıasynda Alǵa aýdany Bestamaq aýylynda jáne Áıteke bı aýdany Qumqudyq aýylynda sport keshenderi paıdalanýǵa berildi. Yrǵyz aýdany Yrǵyz aýylynda dene shynyqtyrý-saýyqtyrý kesheniniń qurylysy aıaqtaldy.
