Aýyl turǵyndaryna óz ónimderin óńdeýge jáne satýǵa múmkindik beretin ınfraqurylym qurý mańyzdy ekenin Prezıdent Qasym-Jomart Toqaev byltyrǵy Joldaýynda atap aıtty. Memleket basshysy bul oraıda Merki aýdanynda ashylǵan ortalyq tájirıbesin úlgi etken edi. Byltyr ashylǵan «Agro Saýat» oqý-ádistemelik ortalyǵynyń qyzmetkerleri az ýaqytta birshama jumys atqarǵan.
Jyl buryn irgetasy qalanǵan ortalyq basshysy Aıman Aqynbekovanyń aıtýynsha, «Agro Saýattyń» mamandary qaryzy bar turǵyndardyń máselesin sheshýge yqpal etý, olardyń tabysyn arttyrý maqsatynda ashylǵan eken. Tájirıbelik daǵdylarǵa arqa súıegen mamandar azamattardyń óndiristik kooperatıvterge birigýine jáne turaqty túrde tabys tabýyna kómektesedi. 30 adamǵa deıin qamtylǵan toptarda bilikti sarapshy-praktıkter tálim beredi. Olardyń qatarynda agronom jáne zootehnık sekildi mamandar bar.
«Bizdiń ortalyqta skrınıng jáne naqty mamandyqtar boıynsha praktıkalyq sabaqtar ótkizýge arnalǵan oqý alańdary bar. Sondaı-aq tyńdaýshylar úshin arnaıy oqý-ádistemelik quraldar, tehnologııalyq kartalar ázirlengen. Bul quraldardy bilikti mamandar kópshilik úshin túsinikti tilde jazǵan. Azamattardy oqytý barysynda qulpynaı, tańqýraı, alma, qant qyzylshasyn ósirý, sút jáne et baǵytyndaǵy iri qara maldy bordaqylaý, qus jáne qoı sharýashylyǵy sekildi baǵyttar qamtylady», deıdi Aıman Aqynbekova.
Ortalyqta osy kúnge deıin Merki aýdanynyń 130-dan astam turǵyny oqýdan ótipti. Kóbine ortalyqqa nesıesi bar, kepilge qoıatyn múlki joq, 90 kúnnen astam ýaqyt boıy bereshegin óteı almaǵan azamattar tabys kózin izdep keledi eken. Bilim jetildirgennen keıin taýarly nesıe rásimdeýge múmkindik alady. Mamandar tek tájirıbege arqa súıemeı, sharýalardy teorııalyq baǵytta da oqytady.
«Baýyrjan Arystanbaev degen azamat 2024 jyldyń sáýir aıynda 20 gektar jerge qulpynaı ósiretin qosalqy sharýashylyqty bastady. Ol tapqan tabysynyń 50 paıyzyn keshikken nesıesin jabýǵa jumsasa, 25 paıyzymen taýarly nesıeniń qaryzyn tóleıdi. Artylǵan 25 paıyz tabysy ózine qalady. Jańa is bastaýǵa nıet etken Baýyrjanǵa taýarly nesıe túrinde 10 000 kóshet berilgen. Buǵan deıin eki jyl egin sharýashylyǵymen aınalysypty. Alaıda bilim men tájirıbeniń jetispeýshiligi saldarynan aıtarlyqtaı tabysqa qol jetkize almaǵan. Qazir olqylyqtyń ornyn toltyryp, jańa is bastaý arqyly tabystyń kózin tabýǵa bekinip otyr», deıdi ortalyq basshysy.
Aýdanda jyl saıyn tek sharýaqojalyq ıeleri 3 myń tonnadan astam alma alady eken. Babyn keltirip ósirgenmen, kóńil kónshiterlikteı tabys taba almaıdy – ónimdi qaıta ótkizerin bilmeı dal bolady. Amalyn tappaǵan soń arzanǵa jiberedi. Al jańadan ashylǵan ortalyq qyzmetkerleriniń uıytqy bolýymen óndiristik seh uıymdastyrylǵan. Iаǵnı mamandar daıyn ónimge de tolyqqandy qoldaý kórsetedi.
«Maqsatymyz – aýyl turǵyndarynyń tabysyn arttyryp, qarjylyq saýatyn ashý jáne olardy qaryzsyz bolashaqqa bastaý. Egin sharýashylyǵy boıynsha tájirıbelik bilim berýge arnalǵan, jalpy kólemi 77 sharshy metr bolatyn oqý aýdıtorııasy jabdyqtalǵan. Mundaı aýdıtorııa mal sharýashylyǵy boıynsha bilim alýǵa kelgen azamattarǵa da qarastyrylǵan. Tyǵyryqqa tirelgen sharýalarmen birlesip jumys isteýge qashanda daıynbyz», deıdi A.Aqynbekova.
«Agro Saýat» oqý-ádistemelik ortalyǵy qyzmetkerleriniń aıtýynsha, qolǵa alynǵan bul ıgilikti bastama aldaǵy birneshe jyl bederinde aıtarlyqtaı nátıje bermek.
Jambyl oblysy,
Merki aýdany
