2022 jyly Nomǵon-2 ǵuryptyq kesheninde júrgizilgen arheologııalyq jumystar kezinde ózge de mańyzdy tarıhı jádigerlermen qatar kóne túrik jáne soǵdy jazýlary qashalǵan bitiktastyń joǵarǵy bóligi tabylǵan bolatyn. Bul jazýlardy oqý nátıjesinde kóne túrik bitik jazýymen jazylǵan mátinniń 12 joly («Qutluq qaǵan Túrik ... Táńir uly ...») jáne soǵdy tilindegi mátinniń 6 joly («Kýtlýg hakan...») oqylyp, zertteldi. Málimetter osy arheologııalyq eskertkishtiń Qutlyq qaǵanǵa tıesili ǵuryptyq keshen bolǵanyn ǵylymı turǵydan dáleldeıdi.
2023 jyly joǵaryda atalǵan bitiktastyń tómengi bóligi tabyldy. Bul bólikte de jazýlar saqtalǵan. Alaıda qatty zaqymdalǵan ejelgi túrik jazýy oqýǵa kelmedi. Degenmen bitiktastyń artqy jaǵyndaǵy ishinara saqtalǵan qytaı ıeroglıfterin belgili bir deńgeıde oqýdyń múmkindigi týdy. О́tken jyly atalǵan eskertkish Túrki akademııasy men Mońǵolııa Ǵylym akademııasynyń Arheologııa ınstıtýty tarapynan Ulan-Batyr qalasynda tanystyryldy. Sol aralyqta Ishki Mońǵolııa ýnıversıtetiniń (Qytaı) mamandary — professor Borjıgıtaı Mórón, ǵylym doktorlary Chýı Nıng jáne Sýgar arnaıy shaqyrylyp, qytaı mátinin oqý-anyqtaý jumystary jalǵasqan bolatyn.
Bitiktastyń tómengi bóligindegi qytaı jazýy joǵarydan tómenge qaraı tańbalanǵan, al joldar ońnan solǵa qaraı ornalasqan. Bul bóliktegi 15 joldyń 3-8 joly oqyldy. Ár jolda shamamen 24 ıeroglıften bar, jalpy sany 290-300 ıeroglıfti quraıdy.
Ishki Mońǵolııa ýnıversıtetiniń joǵaryda atalǵan mamandarynyń kómegimen osy qańtarda bitiktastyń tómengi bóligindegi qytaı mátininiń bir bóligi syryn ashty. Osy jumys nátıjsinde, 4-jolda «Túrik» sózi men «Kutluq» ataǵy (qytaısha oqylýy: «Gý-dý-lý») anyqtaldy.
Túrki akademııasy men Mońǵolııa Ǵylym akademııasynyń Arheologııa ınstıtýty bul jańalyq Nomǵon-2 ǵuryptyq kesheniniń kóne túrik kezeńine, atap aıtqanda, Ekinshi Túrik Qaǵandyǵyn qurǵan Elteris Qutlyq qaǵan (682–692) dáýirine tıesili ekenin málimdep otyr.
