foto: QR Oqý-aǵartý mınıstrligi
Ǵanı Beısembaevtyń aıtýynsha, 2024 jyly elimizde erekshe bilim berýdi qajet etetin balalardyń sany 230 myńnan asqan. Bul málimet barlyq bilim berý uıymdarynda birdeı ınklıýzııalyq bilim berýdiń qajettiligi men mańyzdylyǵyn kórsetedi. Osyny eskere otyryp, mınıstrliktiń qurylymynda alǵash ret Inklıýzıvti jáne arnaıy bilim berý departamenti qurylǵan.
«О́tken jyly ǵylymı qaýymdastyq jáne úkimettik emes uıymdarmen birlesip qyrýar jumys atqaryldy. Inklıýzııalyq jáne arnaıy bilim berý salasyndaǵy barlyq normatıvtik qujatqa taldaý júrgizilip, nátıjesinde 15 normatıvti-quqyqtyq akt qabyldandy. Osyǵan oraı balanyń dúnıege kelgen sátinen bastap oqý oqyp, mamandyq alǵan kezine deıin psıhologııalyq-pedagogıkalyq súıemeldeýdiń úsh deńgeıli úlgisi engizildi, qoldaý kabınetteri úshin jańa talaptar bekitildi, erekshe bilim berýdi qajet etetin balalarmen jumys úshin jeke baǵdarlamalar ázirlendi, odan bólek pedagog-assıstent, arnaıy pedagog, jeke kómekshi sekildi jańa laýazymdar paıda boldy», dedi mınıstr.
Sondaı-aq mınıstrlikte Ulttyq úzdiksiz ınklıýzıvti bilim berý ortalyǵyn qurý týraly sheshim qabyldanǵan. Onyń maqsaty pedagogterge ádistemelik súıemeldeý kórsetý, bilim berýdegi qıyndyqtardy anyqtaý jáne aldyn alý boıynsha ǵylymı zertteýler júrgizý, sondaı-aq psıhologııalyq-pedagogıkalyq súıemeldeý qyzmetin úılestirý jumystaryn júzege asyrý.
«Ásirese, balalardyń áleýmettik beıimdelýine erekshe kóńil bólinýde. Mine, dál osy maqsatta Almaty qalasyndaǵy Arnaıy jáne ınklıýzıvti bilim berý ortalyǵyn transformasııalaý qolǵa alynýda. Mańyzdylyǵyna basa nazar aýdarar taǵy bir jańalyq — byltyrdan bastap tehnıkalyq jáne kásiptik bilim uıymdarynda múmkindigi shekteýli balalar úshin kvota sany ósti. Onymen qosa «Erekshe bilim berý qajettilikteri bar balalarǵa keshendi qoldaý kórsetý týraly» jańa zań jobasy ázirlenýde. Bilim berý uıymdarynda jaıly orta qalyptastyrý barlyq bilim alýshylar úshin teń múmkindikterdi qamtamasyz etetin negizgi faktor», dep qorytyndylady mınıstr.
Esterińizge sala keteıik, elimizde búgingi tańda 500-ge jýyq arnaıy bilim berý uıymy jumys isteıdi. 2024 jyldyń qorytyndysy boıynsha el aýmaǵyndaǵy mektepterdiń 90%-da ınklıýzıvti bilim alýǵa jaǵdaı jasaldy, al balalardy arnaıy psıhologııalyq-pedagogıkalyq qoldaýmen qamtý 80%-ǵa jetken.
