Bes kitaptan turatyn «Qazaq chempıondary» komıksi Parıj-2024 Olımpııa oıyndarynyń júldegerlerine arnalǵan. Sonyń ishinde dzıýdoshy Eldos Smetov, boksshy Nazym Qyzaıbaı men Aıbek Oralbaı, palýan Demeý Jadyraev, gımnast Narıman Qurbanov, dzıýdoshy Ǵusman Qyrǵyzbaev, mergender Aleksandra Le men Islam Sátbaev jáne dańqty boksshy, Ulttyq Olımpıada komıtetiniń prezıdenti Gennadıı Golovkın de bar.
«Maqsatymyz, komıks arqyly qazaq balasyna el namysyn qorǵap júrgen sportshylardyń naǵyz batyr ekenin jáne sol batyrlardyń aramyzda ekenin kórsetý. Ár úlken armannyń artynda qajyrly eńbek turǵanyn túsindirý», deıdi avtorlar.
Kitapta el namysyn qorǵaǵan sportshylardyń balalyq shaǵy, alǵashqy dodalarynan úlken saıystarǵa deıingi kásibı joly balaǵa túsinikti tilde usynylǵan.
Is-sharanyń alǵashqy quttyqtaý lebizin kitaphana basshysy Ǵazıza Qudaıbergenqyzy bildirdi. Ol komıks janry qazaq oqyrmandaryna alǵash ret Júsipbek Aımaýytulynyń «Jaman tymaǵy» arqyly jetkenin atap ótip, búgingi jaryq kórip jatqan kitaptar sonyń dáýir dıdaryna saı jandanǵan jalǵasy ekenin aıtty.
Kelesi kezekte sóz alǵan «Habar» agenttiginiń basqarma tóraǵasy Kemelbek Oıshybaev qos avtordyń bul taqyrypqa úlken izdenispen kelgenin jetkizdi. «Qazaq komıksiniń taqyryp aıasy keńeıip keledi. Buǵan deıin tarıhtaǵy batyr babalarymyzdyń ónegeli ómiri komıks betterine bederlengenin bilemiz. Al búgingi jaryq kórgen komıkster toptamasy osy zaman qaharmandaryn tanystyrady. Sol arqyly keshegi Qabanbaı men Bógenbaılar qazir de aramyzda júrgenin túsindiredi. Jańa dúnıeniń jarnamasyn arttyra bilsek, bul qazaq balalary men jasóspirimderiniń, tipti tutas ulttyń órkendeýine yqpal etetin áleýetti qural bola alady», dedi K.Oıshybaev.
Aıta keteıik, komıkster týrızm jáne sport ındýstrııasy qorynyń qoldaýymen jaryq kórip, elimizdiń barlyq sport mektepterine tegin taratylatyn bolady.
