Úkimette dárilik zattardy tańbalaý ári qozǵalysyn baqylaý júıesi jumysynyń aralyq nátıjeleri qarastyryldy. Premer-mınıstrdiń orynbasary Tamara Dúısenovanyń tóraǵalyǵymen ótken keńeske Densaýlyq saqtaý mınıstrligi, «SQ Farmasııa», «Qazaqtelekom» kompanııalarynyń ókilderi qatysty.
Densaýlyq saqtaý vıse-mınıstri Erbol Ospanovtyń keltirgen dereginshe, júıe engizilgeli beri eldegi emdeý mekemeleri 16,5 mln, al dárihanalar 21,5 mln-nan asa tańbalanǵan dárilik zattardy qabyldaǵan. Sonymen qatar shamamen 12 mln dári qaptamasyn satqan.
Aıta ketý kerek, dárilik zattardy tańbalaý jáne baqylaý júıesi elimizde óndirilgen nemese syrttan ákelingen árbir dári-dármektiń aınalymnan tolyq alyp tastaǵanǵa deıingi qozǵalysyn onlaın rejiminde qashyqtan baqylaýǵa múmkindik beredi.
– Basty maqsat – azamattardy qaýipsiz ári sapaly dári-dármekpen qamtamasyz etý. Ashyq baqylaý kontrafaktili dárilerdiń aınalymǵa túsýine jol bermeıdi jáne Densaýlyq saqtaý mınıstrligi men jergilikti ákimdikterge emdeý mekemeleriniń dárilik zattarmen qamtylý deńgeıin baqylaýǵa jaǵdaı jasaıdy. Sondaı-aq dári-dármektiń maqsatty qoldanylýyn qadaǵalaýǵa múmkindik beretinin atap ótkim keledi. Sondyqtan bul tetikti meılinshe paıdalana otyryp, qajet bolǵan jaǵdaıda tıisti sharalardy qabyldaý qajet, – dep tapsyrdy T.Dúısenova.
