Osy qujatqa sáıkes jyljymaly jáne jyljymaıtyn múlik túrindegi qaıtarylǵan aktıvter Qaıtarylǵan aktıvterdi basqarý kompanııasyna beriledi. Sáıkesinshe aqshalaı qarajattyń túsimin jınaqtaý úshin Qarjy mınıstrliginiń qolma-qol aqshany baqylaý shoty retinde Arnaýly memlekettik qor quryldy.
Resmı derekterge súıensek, 2024 jyldyń 20 jeltoqsanyndaǵy jaǵdaıǵa sáıkes Arnaýly memlekettik qorǵa barlyǵy 220,3 mlrd teńge túsken. Shyǵystardyń kólemi – 11,5 mlrd teńge. Qalǵan 208,84 mlrd teńgeniń ishinde 13 mlrd teńge somasy Basqarýshy kompanııadan aýdarylǵan. Onyń ishinde 12,6 mlrd teńge aktıvterdi satýdan, sol sekildi 0,5 mlrd teńge atalǵan aqshany basqarýǵa baılanysty qyzmetten (jaldaý, senimgerlik basqarý, dıvıdendter jáne t. b.) jınalǵan.
Osylaısha quzyrly organdar qaıtarylǵan aktıvterdi tıimdi basqarý arqyly qosymsha qarjylaı resýrstardy áleýmettik máselelerdi sheshýge baǵyttap otyr.
Tıisti zańǵa sáıkes atalǵan qordyń shottaryndaǵy aqsha densaýlyq saqtaý, bilim berý, buqaralyq sport jáne t.b. salalardaǵy áleýmettik jáne ınfraqurylymdyq nysandardy salýǵa baǵyttalady. Barlyq joba ekonomıkalyq saraptamadan ótip, odan ári qajetti qarjylandyrý máselesi Respýblıkalyq bıýdjet komıssııasynyń qaraýyna jiberilip, tıisti sheshim shyǵarylady.
Máselen, RBK sheshimi boıynsha qorda jınaqtalǵan qarajat kelesideı jobalardy júzege asyrýǵa jumsalady:
- Aqtóbe qalasynda 300 orynǵa eseptelgen erekshe balalarǵa arnalǵan arnaıy balabaqshany salý.
- Almaty oblysynda 50 oryndyq sport keshenin salý.
- Atyraý oblysyndaǵy mektep-ınternat.
- Shymkent qalasyndaǵy qosalqy mektep-ınternat kolledji úshin 300 orynǵa shaqtalǵan jataqhana salý.
- Petropavl qalasynda 280 oryndyq balabaqsha salý.
- Túrkistan oblysynda aýdandyq balalar mýzyka mektebiniń qurylysy.
- Ulytaý oblysynda 80 orynǵa eseptelgen 2 qabatty mektep salý.
- Jetisý oblysynda 30 oryndy qarastyratyn mektepke deıingi shaǵyn ortalyǵy bar 200 oryndyq mektep salý.
- Aqmola oblysynda sport zaly bar sport keshenin salý.
-Shyǵys Qazaqstan oblysyndaǵy aýrýhana kesheni.
Jylystatylǵan aktıvterdi qaıtarý elimizden kapıtaldy zańsyz shyǵarýdyń aldyn alýǵa kómektesedi. Al osy aktıvtermen júrgizilip jatqan jumysty ashyq kórsetý qazaqstandyqtardyń senimin arttyrady. Sondyqtan barlyq qarajat áleýmettik ınfraqurylymdy damytýǵa jumsalady. Onyń esebinen salynyp jatqan mektepter, balabaqshalar, sport keshenderi, jataqhanalar óńirlerdiń ekonomıkalyq ósimin nyǵaıtyp, halyqty jumyspen qamtýda septigi mol. Sonymen qatar qalalar men aýyldy jerlerde jaıly ortany qurýdy arttyrady.
