«1998 jyly irgesi qalanǵan zaýytta 6 óndiristik seh iske qosylǵan. Sterıldi jáne sterıldi emes qolǵaptar óndirý sehy, «Ýltra-Adsorb» saýda markasymen belsendirilgen kómir óndirý sehy, medısınalyq maqsattaǵy buıymdar óndirisi sehy, maqta men plastıkadan jasalǵan buıymdar óndirýge daıyndalǵan seh, etılen oksıdimen sterıldeý sehy jáne plastıkten jasalǵan buıymdar óndirisi sehy qalypty jumys istep keledi. Osy ýaqyt aralyǵynda úzdik kompanııalar qatarynan kórindi. 2 700 sharshy metrlik úsh qabatty ǵımarat 2020 jyly iske qosyldy», deıdi tehnolog Muhamedjan Jumabaıuly.
«Birinshi qabatynda medısınalyq qolǵaptar shyǵarý sehy jumys istese, ekinshi qabatynda tigilgen buıymdar jınaqtalady, ıaǵnı, otaǵa arnalǵan medısınalyq buıymdar jıyntyǵy, komplektasııa sehy bar. Sonymen qatar munda bir rettik shprıster jasalady. Úshinshi qabatta tigin sehy jumys isteıdi. Munda toqyma emes matadan buıymdar, ıaǵnı kúrdeli jáne jeńil otalarǵa arnalǵan medısınalyq halattar men jaıalyqtar tigiledi. Sonyń ishinde kúrdeli otaǵa qajet buıymnyń túri 40-qa jýyqtaıdy. Zaýyt tolyq avtomattandyrylǵan, zamanaýı stanoktarmen atqarylady», deıdi tehnolog.
Onyń aıtýynsha, kásiporynnyń tigin sehynda birneshe tigý ádisi paıdalanylady.
«Ýltradybystyq tigýde toqylmaǵan matany eritý arqyly bir-birine jabystyryp, jipsiz tigedi. Bul – zııansyz, óte berik tigý túri. Munda 35 adam jumys isteıdi. Orama materıaldar aldymen pishilip, kesilip kelgen soń osy sehta bólikter biriktirilip tigiledi. Tapsyrys kólemi artsa 2-3 aýysymmen jumys isteýge týra keledi. Tiginshiler jumysqa alynǵanda aldymen attestasııadan ótedi. Odan soń kompanııa ókilderi arnaıy kýrsta oqytady. Sebebi bul qarapaıym tigin sehy emes, kúrdeli otalarǵa arnalǵan buıymdar daıarlanatyndyqtan, oǵan úlken jaýapkershilik pen tártip, tazalyq qajet», deıdi tehnolog.
Osy kúni 330-ǵa jýyq adamdy eńbekpen qamtyp otyrǵan zaýytta Qoıanqus men Yntymaq shaǵyn aýdandarynyń jáne Almaty qalasynyń turǵyndary jumys isteıdi.
«Dolce» zaýytyndaǵy tazalyq klasy óte joǵary zonada ártúrli ólshemdegi medısınalyq shprıster shyǵarylady. Munda jylyna 150 mln dana shprıs shyǵarýǵa múmkindik bar. Sondaı-aq belsendirilgen kómir tabletkalary óndiriledi. О́nimder dıstrıbıýtorlik kompanııalar arqyly taratylady. Zaýyt eńbekkerleriniń 70 paıyzǵa jýyǵy áıelder bolsa, sterıldi sehta tek qana er azamattar jumys isteıdi.
«О́tken jyly zaýyttyń qurylǵanyna 25 jyl tolǵanyn atap óttik. Jylyna 350-450 myń dana medısınalyq buıym shyǵaramyz. Onyń ishinde bir rettik betperde, bahıla, halat, hırýrgııalyq, akýsherlik buıymdar óndiremiz. Karantın jyldary tabysy az bolsa da birneshe túrden turatyn betperdeler shyǵarýmen aınalystyq. Qazir óte kúrdeli kardıo jıyntyqtardy tigýmen aınalysyp jatyrmyz. Esimi elge tanymal akademık Iýrıı Pıa jetekshilik etetin UMC kardıoortalyǵynan tapsyrys alyp jatyrmyz. Jobany júzege asyrýǵa bizdiń tiginshiler daıarlanyp jatyr. Bul – óte úlken jetistik. «SK-Farmasııa» JShS-men kelisimshart aıaqtaldy. О́tken jylǵy ınvestısııa kólemi 9 mlrd teńgeni qurady. Biz ónim óndirýmen qatar, qaıyrymdylyq is-sharalaryna úzbeı qatysamyz. Jańadan qurylǵan Alataý qalasynyń aýmaǵyna kiretin medısınalyq mekemelerge, sondaı-aq Almatydaǵy «Sábıler úıine» merekelerde turaqty túrde qolushyn berýdi dástúrge aınaldyrdyq», deıdi zaýyt dırektory Marjan Omarova.
Keleshekte zaýyt irgesi keńeımek. Osy maqsatta 15 gektar jer bólingen eken. Investorlardyń kómegimen polımerlik zaýytty keńeıtý arqyly gınekologııalyq buıymdardy kóbeıtý, logıstıkalyq ortalyq salý ári ónimge kerek shıkizatty ózderinen óndirýdi maqsat etip otyr. Otandyq kompanııa óz ónimderin kórshiles elderge de eksporttaýdy da damytyp jatyr.
Almaty oblysy,
Alataý qalasy
