Birmaǵambet Aldııarov – Qostanaı okrýgi Qarabalyq aýdanynyń №10 aýylynda turǵan. 1927 jyly sol jerden tárkileýge ilikken. Biraq ol kisiniń keıingi ómiri beımálim. Alaıda dáýletti otbasynyń tutynǵan zattarynan halqymyzdyń ǵajaıyp murasyn kóremiz.
Máselen, qyzyl barqyttan altynmen ádiptelip tigilgen qazaq áıeliniń qamzoly qandaı ádemi. Oıý-órnegi de erekshe. Astary maqta-matadan jasalǵan. Qaltalary kókshil barqyttan tigilgen. Biraq qamzoldyń matasy ýaqyt óte kele tozypty. Sodan keıin ony 1994 jyly halyq sheberi Tursynkúl Jaılaýbaeva qaıtadan qalpyna keltirgen. Aıta keteıik, muny Birmaǵambet baıdyń báıbishesi kıgen. Sondaı-aq Buharanyń qymbat matasy – qamqadan tigilgen er adamǵa arnalǵan shapan da ózgeshe. Ony altyn sarǵysh tústi metall jippen zerlegen. Shapannyń qyzyl kúreń tústi gúlderi de kórkem. О́ńiri men jeńi tústi toqyma baýmen ádiptelip, astaryn Buharanyń jibegimen jasaǵan. О́kinishtisi, qazir shapannyń materıaly ábden tozǵan. Qaıta jańǵyrtý qajet.
Ásirese tóbesi bıik, etegi keń aıyr qalpaq aıryqsha. Onyń qaıyrmasyndaǵy joǵarǵy bóliktiń etegine syzyq salyp qondyrǵan. Etegi aq kıizden tigilip, eki jaǵy aıyrlanyp kelgen. Tolyǵymen altyndalǵan jippen zerlengen. Buryn erlermen birge áıelder de atqa mindi. Biraq sheberler er-toqymdy áıelderge bólek jasaǵan. Bul – áıelderge arnalǵan sondaı er-toqymnyń biri. Erdiń negizi aǵashtan jasalyp, terimen qaptalǵan. Aldyńǵy qasy artqy qasynan bıikteý, artqy qasy jalpaqtaý. Erdiń aldyńǵy bıik qasyna kúmisten japsyrma bekitilgen. Ony ósimdik tektes oıý-órnektermen júrgizgen. Kúmistiń betine qyzǵylt sary úsh aqyq jáne kógildir tústi perýzalar qondyrǵan. Er-toqym jaqsy saqtalǵan. Kózge birden túsedi.
Qazir bul jádigerlerge ǵasyrdan asa ýaqyt boldy. Biraq ony kórgenderge sol dáýirden syr shertkendeı áser beredi.
