Ibraımov Qýanǵalı 1913 jyly Semeı oblysy Aıagóz aýdany Aqshataý aýylynyń Qońyrtaý bólimshesinde dúnıege kelipti. 1932 jyly asharshylyq kezinde sheshesin, eki baýyryn ertip, kórshiles Shar aýdanynyń Qarash aýylyna turaqtaıdy. Osy jerdegi Shar MTS-ke traktorshy bolyp jumysqa ornalasady.
1940 jyly ozat traktorshy retinde Máskeýge sletke jiberiledi. Bizdiń bala kezimizde aıtyp otyratyn: «Máskeýdi úsh ret kórdim», – dep. Birinshi ret ozat traktorshy retinde jiberipti. Ekinshi ret soǵys bastalǵanda jolaı ótipti. Úshinshi ret soǵys aıaqtalǵanda elge qaıtyp kele jatyp aıaldapty.
1941 jyldyń tamyzynda nemis basqynshylarynyń KSRO-ǵa qarsy soǵys jarııalaýyna baılanysty ákemniń otbasynan eki adamdy: ózi jáne úlken aǵasy Orazbaı Muqaevty áskerge alady. Orazbaı atamyzdy Qıyr Shyǵystaǵy japon mılıtarısteri qaýip tóndirip turǵan aımaqqa jiberedi. Ákem Qýanǵalıdy Batys maıdanǵa attandyrady. Osylaısha aǵaıyndy ekeýi elimizdiń Batysy men Shyǵysyn qorǵaýǵa atsalysady.
Ákeı 1941 jyldyń shildesinen 1941 jyldyń qyrkúıegi arasynda 3-shi atqyshtar polkinde, al 1941 jyldyń qyrkúıeginen 1943 jyldyń mamyryna deıin 73-shi tank brıgadasynda, 1943 jyldyń mamyrynan 1944 jyldyń qańtary aralyǵynda atqyshtar polkindegi bólimshe komandıriniń kómekshisi, 1944 jyldyń qańtarynan 1944 jyldyń qarashasyna deıin 121-shi atqyshtar polkinde rota starshınasy, 1944 jyldyń qarashasynan 1945 jyldyń aqpanyna deıin 153-shi atqyshtar polkindegi vzvod komandıriniń kómekshisi, 1945 jyldyń aqpanynan 1945 jyldyń tamyzyna deıin 698-shi atqyshtar polkinde rota starshınasy bolǵan. Soǵysta kórsetken erlikteri úshin «Qyzyl Juldyz» ordenimen jáne «Erligi úshin», «Berlındi alǵany», «Germanııany jeńgeni úshin» jáne basqa da medaldarmen nagradtalǵan. 1945 jyldyń tamyzynda Otanymyzdy qorǵaý boryshyn abyroımen atqaryp eline oralady.
Sodan bastap Semeı oblysynyń Shar aýdanyna qarasty Qarash aýylynda traktorshy, egis alqabynda brıgadır bolyp eńbek jolyn jalǵastyrdy. Adal eńbegi úshin aýdannyń, aýyldastarynyń qurmetine bólenip, zeınetke shyqqansha osy jerde eńbek etti. Zeınetke shyqqannan keıin týǵan jeri Aıagóz óńirine kóship keldi. Bes bala tárbıelep ósirip, olarǵa joǵary bilim áperdi. Soǵys jáne eńbek ardageri. Ol kisi 1994 jyly dúnıeden ótti. Jeńis kúni qarsańynda qatardaǵy maıdangerdi osylaısha eske túsirýdi paryzymyz dep bilemiz.
Qamarııa Ibraımova.
Shyǵys Qazaqstan oblysy,
Aıagóz qalasy.
