Jas ǵalym Ulybrıtanııadaǵy Oksford jahandyq jáne aımaqtyq zertteýler mektebinde «Aımaqtaný» mamandyǵynda oqymaq. Oqýdy aıaqtaǵannan keıin Arystanbek Oksford ýnıversıtetiniń qaýymdastyrylǵan túlegi mártebesin alady. Buǵan deıin Garvardqa (AQSh) shaqyrtý alyp, ǵylymı qyzmetker retinde jumys istegen bolatyn.
Qytaıtaný kafedrasynan bastalǵan ǵylymı sapar ony Oksford ýnıversıtetine jetelep ákeldi. Shymkent qalasyndaǵy №40 mektep-gımnazııany «Altyn belgimen» bitirgen Arystanbek QazUÝ-ǵa oqýǵa túsip, shyǵystaný fakýltetinde bilim ala júrip, qytaı tilin jetik meńgerdi, ǵylymǵa degen qyzyǵýshylyǵyn shyńdady. Osy qabiletteriniń arqasynda Qytaı úkimetiniń tolyq grantyn jeńip alyp, Shanhaı halyqaralyq zertteýler ýnıversıtetinde bilimin jalǵastyrdy. Shanhaıda oqyǵan jyldary Qytaıdy ǵana emes, Azııa-Tynyq muhıty aımaǵynyń ózekti máselelerin zertteýmen aınalysty. Bul sapar oǵan aımaq elderiniń mádenıeti men saıasatyn tereń túsinýge múmkindik berdi. Sonymen qatar Ońtústik Koreıa, Sıngapýr, Malaızııada ótken halyqaralyq konferensııalarǵa qatysty.
Magıstrlik dıssertasııasyn aǵylshyn tilinde qorǵap, elge oralǵan Arystanbek óz mansabyn Aqparat jáne qoǵamdyq damý mınıstrliginde bastady. Halyqaralyq yntymaqtastyq pen jastar saıasaty salasynda jumys isteı júrip, eldegi mańyzdy jobalardy úılestirdi. Ǵylymı jumysqa degen yntasy ony QazUÝ-ǵa qaıta ákeldi. Ýnıversıtette shyǵystaný salasynan dáris oqyp, Azııa elderiniń jahandyq úderiske áserin zerttedi.
